Qarettiyoogaa Bessa
Metuwaa
Nuuni harati nuuppe dummatiyo ogiyaa xalla qoppikko, he dummatettay mooro woy bala giidi qoppana danddayoos. Yaatiyo gishshawu, hegee nuuppe dummatiya asaa coo ixxanaadan oottana danddayees. Issitoo harata iita ayfiyan xeelliyoogaa doommikko, qarettiyoogee metiyaaba gidana danddayees. Qarettennan aggiyoogee asaa coo ixxiyoogawu malaata gidana danddayees.
Geeshsha Maxaafay Yootiyo Maaraa
“Ufaittiyaageetuura ufaittite; yeekkiyaageetuurakka yeekkite.”—ROOME 12:15.
Ha xiqisiyaappe nuuni ay tamaariyoo? Ha xiqisee nuuni qarettana bessiyoogaa tamaarissees. Qaretaa giyoogee hara ura gakkidabay nuna gakkidabadan, qassi hara urawu siyettiyaabay nuussi siyettiyaabadan qoppiyoogaa giyoogaa.
Qarettiyoogee Waati Maaddii?
Nuuni issi urawu qarettiyo wode, he ura hanotay nuugaara waani issi mala gidanaakko akeekoos. Nuuyyo siyettiyaagaadan etawu siyettana, qassi nu oottiyo ogiyan eti oottana danddayiyoogaa nuuni akeekoos. Qaretay nuuni ubbay issi mala gidiyoogaa akeekanaadan maaddees. Hara asaa nunaara issi mala oottiyaabaa koyikko, eta xeelliyaagan nu qofay loꞌꞌo gidana.
Qarettiyoogee harata nuuni bonchchanaadankka oottees. Ane-Maariya Senegaale biittan daro asay guutti xeelliyo asaa citaappe yaasu. Qarettiyoogee O waati maaddidaakko hagaadan gaada yootaasu: “He asay ay keena tuggatidaakko taani beꞌiyo wode, taani hegaadan tuggatiyaakko tawu aybi siyettanaakko qoppaas. Hegaa gishshawu, taani he asaappe aadhdhennagaa akeekiyoogaa doommaas. Taani etappe aadhdhanaadan oottiya, ta oottidobi aybinne baawa.” Ee, hara ura gakkida metuwaa nuuni akeekanawu baaxetikko, eta boriyoogaappe etawu qarettana danddayoos.
Neeni Oottanabaa
Issi citaa neeni iita ayfiyan xeellikko, nena etaara issi mala oottiyaabaa akeekanawu mala. Leemisuwawu, eti kaallidi deꞌiyaabata oottiyo wode etawu aybi siyettiyaakko qoppa
Qaretay nuuni ubbay issi mala gidiyoogaa akeekanaadan maaddees
Eti bantta so asaara qumaa miyo wode
Daafurssiya oosuwaa wurssi simmiyo wode
Laggetuura wodiyaa aattiyo wode
Eti dosiyo muuziqaa siyiyo wode
Yaata simmada, eta hanotay nena gakkidabadan qoppanawu mala. Nena hagaadan oychcha:
‘Issi uri taani maaddennabadan taassi siyettanaadan oottikko, ta waatanee?’
‘Harati tana eranawu malanaappe kasetidi tana bala ogiyan akeekikko, tawu aybi siyettanee?’
Taani harati iita ayfiyan xeelliyo citaa yara gidiyaakko, tana eti waati oyqqanaadan koyiyaanaa?