Nuna Medhdhidaagee So Asaa Ufayssawu Maaddiya Aadhdhida Eratettaa Immees

Azinatoo, Intte Machchota Siiqite

“Azinai ba maccaasiyo ba bollaadan siiqanau bessees; ba machchiyo siiqiyaagee bana siiqees. Aissi giikko, ba bollaa ixxiya asi mulekka baawa; shin . . . ooninne ba bollaa mizeesinne naagees.”—EFISOONA 5:28, 29.

Azinay ba soo asawu huuphe. (Efisoona 5:23) SHin loꞌꞌo azinay meqettaa iita woy laꞌatettaa diggiyaagaa gidenna. I ba machchiyo nashshees, qassi asatettaabaaninne qofan iyyo koshshiyaabaa kunttees. I ta giidoogaa xallay hano giidi zozzu giyoogaappe, O ufayssanawu keehi baaxetees. (Piliphphisiyuusa 2:4) I bawu siyettiyaabaanne ba qofaa iyyo qoncciyan yootees, qassi A yootiyoobaa siyees. I bolli ‘hanqquwan suullenna’ woy asatettaaban woykko meqetti baynnabaa haasayiyoogan O qohenna.—Qolasiyaasa 3:19, NW.

Machchotoo, Intte Azinaa Bonchchite

“Maccaasa ubbaikka bantta azinaa azinaa bonchchanau bessees.”—EFISOONA 5:33.

Issi machchiya ba azinaa bonchchiyaabanne I kuuyiyooban maayettiyaaba gidikko, so giddon sarotettay deꞌanaadan maaddawusu. I balabaa oottikko, A ubbatoo ashkkenne bonchchiyaaroppe attin karukku. (1 PHeexiroosa 3:4) Issi metuwaabaa ayyo yootanawu koyiyo wode, loꞌꞌo wodiyaa doorawusu, qassi bonchchuwan awu yootawusu.—Eranchchaa 3:7.

Ne Aqo Laggiyawu Ammanetta

“Asi . . . , ba machcheera issippe de7ees; eti naa77ai issi asho gidoosona.”—DOOMETTAABAA 2:24.

Attumaageenne maccaara aqo oyqqiyo wode, eta dabbotay keehi minnees. Yaatiyo gishshawu, aqo laggeti issoy issuwaara wozanappe haasayiyoogaaninne issoy issuwawu kehiyoogan bantta aqo deꞌuwaa minttanawu ubbatoo baaxetana koshshees. Ba aqo lagge gidenna uraara mattumaa gayttennan aggiyoogankka issoy issuwawu ammanettana koshshees. Ba aqo laggiyawu ammanettenna uri aqo deꞌuwan daro metuwaa kaalettees. Hegee ammanettennaadaaninne so asay shaahettanaadan oottana danddayees.—Ibraawe 13:4.

Yelidaageetoo, Intte Naata Loohissite

“Na7i waanidi de7ana bessiyaakko tamaarissa; yaatikko, i cimidikka hegaa aggenna.”—LEEMISO 22:6.

Yelidaageeti bantta naata loohissanaadan Xoossay etawu aawatettaa immiis. Hegee eti waani deꞌanaakko tamaarissiyoogaanne etawu loꞌꞌo leemiso gidiyoogaa gujjees. (Zaarettido Wogaa 6:6, 7) Issi naꞌi mooriyo wode, akeekanchcha gidida yelidaageeti bessiyaagaappe aaruwan hanqqettokkona. I woy A ‘siyanawu eesotoosona; shin haasayanawunne hanqqettanawu eesotokkona.’ (Yaaqooba 1:19) Yelidaageeti bantta naata seerana koshshikko, hanqquwan gidennan siiquwan seerana koshshees.

Naatoo, Inttena Yelidaageetussi Azazettite

“Naatoo, inttena yelidaageetuyyo . . azazettite . . . ne aawaanne ne aayyiyo bonchcha.”—EFISOONA 6:1, 2.

Naati banttana yelidaageetuyyo azazettananne wozanappe eta bonchchana koshshees. Naati banttana yelidaageeta bonchchiyo wode, so giddon ufayssaynne sarotettay deꞌanaadan oottoosona. Gamma gakkida naati yelidaageeti eta loytti dichchidoogaa yootiyoogan eta bonchchoosona. Hegee eti deꞌiyo keettay loꞌꞌo gidanaadan maaddiyoogaa woy koshshiyaabaa kunttanawu miishshan eta maaddiyoogaa gujjiyaaba gidana danddayees.—1 Ximootiyoosa 5:3, 4.