Hidootay Deꞌanaadan Oottiya Timirtteta
Xoossay mata wode ufayssiyaabaa oottanawu qaalaa geliis. I waayiyaa xayssiyoogan saꞌan deꞌiya asaa deꞌoy ufayssiyaagaa gidanaadan oottana. (Mazamure 37:11) I qaalaa gelidobaa nuuni ammanettana danddayiyoy aybissee? “Xoossai worddotanau asa gidenna” gishshataassa. (Qoodaabaa 23:19) Nuna Medhdhidaagee oottana loꞌꞌobatuppe amaridaageeta ane beꞌoos.
Xoossay Iita Asata Xayssana
“Iitati maataadan diccikkokka, iita oottiya ubbati daayikkokka, eti merinaayyo xayana.”—MAZAMURE 92:7.
Iitabay gujji gujji biidoogaa hagaappe kasetiya huuphe yohuwan beꞌida. Hegan nuuni maalaalettokko, ayssi giikko, ‘wurssettaa gallassan’ deꞌiya asay keehi iita gidanaagaa Geeshsha Maxaafay 2 Ximootiyoosa 3:1-5n kasetidi yootiis. ‘Wurssettaa gallassaa’ giyoogee woygiyoogee? Hegaa giyoogee Xoossawu azazettanawu koyenna ha alamiyaa giyoogaa. Bantta iita oosuwaa aggennan ixxidaageeta Xoossay mata wode xayssana. Hegaappe simmin, Xoossawu azazettiya loꞌꞌo asa xallay attana. “Xilloti biittaa laattananne yan merinau de7ana.”—Mazamure 37:29.
Xoossay Seexaanaa Xayssana
“Sarotettaa Xoossai Seexaanaa . . . gaacci qolana.”—ROOME 16:20.
Seexaanay, daydanttatinne iita asay ubbay xayiyo wode saꞌan sarotettay deꞌana. “Ai asinne [nena] yashissenna” giidi nuna Medhdhidaagee qaalaa geliis.—Mikiyaasa 4:4.
Xoossay Harggiyaanne Hayquwaa Xayssana
“Xoossaa keettai asaara de7ees; . . . Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna.”—AJJUUTAA 21:3, 4.
Seexaanay, Addaameenne Hewaana oottidobaa, qassi nu nagaraa gaasuwan yiida waayiyaanne harggiyaa Xoossay xayssana. Hegaappe simmin, ‘hayqoykka’ deꞌenna. Medhdhidaagaa siiqiyaanne awu azazettiya asay merinawu deꞌana. SHin eti deꞌanay awaanee?
Nuna Medhdhidaagee Saꞌaa Gannate Oottana
“Bazzoinne mela biittai ufaittana; bazzoi ufaissaa poocu giiddi, ciishshaa ciyyana.”—ISIYAASA 35:1.
Xoossay iitatettaa xayssiyo wode saꞌay gannate gidana! Keehi loꞌꞌiya daro ataakiltte sohotinne gidi palahiya qumay deꞌana. (Mazamure 72:16) Ano abbay, abbaynne shaafay xillana, qassi deꞌuwan deꞌiyaabati yan kumana. He wode “hambbalaashiyoogaa” giya qaalaa asay mule hassayenna! Asay baayyo keettata keexxidi etan deꞌana. Qassi keetti baynna asi, namisettidaagee woy hiyyeesi mule deꞌenna.—Isiyaasa 65:21, 22.
Xoossay Hayqqidaageeta Denttana
“Haiquwaappe denddana.”—OOSUWAA 24:15.
Ne siiqiyo hayqqidaageeta zaarettada beꞌanawu yeemottay? Ubbaa danddayiya Xoossay Gannate gidida saꞌan hayquwaappe eta denttiyo wode, neeni eta erana, etikka nena erana. Intte ay keena ufayttanaakko qoppite! He hidootay polettanaagaa nuuni ammanettana danddayiyoy aybissee? Xoossay hayquwaappe denttin daro asay beꞌidonne zaarettidi bantta soo asaara gayttida gita asaabaanne naatubaa Geeshsha Maxaafay yootiyo gishshataassa. Qassi Yesuusi daro asay beꞌishin hayqqidaageeta denttiis.—Luqaasa 8:49-56; Yohaannisa 11:11-14, 38-44.