Tekinolojee Ne Qofaa Waati Qohana Danddayii?

Asay timirttiyawu, oosuwawu woy harabawu gidin darobaa tamaarees. Eti tamaaranaadan tekinolojee maaddana danddayees. Asi deꞌido wode awudeegaappenne aaruwan asay ha wodiyan sooppe kiyennan, ubba uttosaappe denddennan darobaa erana danddayees.

SHin tekinolojiyaa loytti goꞌettiya asati kaallidi deꞌiyaabati banttana gakkana danddayiyoogaa akeekidosona.

Nabbabiyo wode eta qofay shaahettees.
Eta qofay eesuwan shaahettees.
Banttarkka deꞌiyo wode sohuwaara salettoosona.

NE ERANA KOSHSHIYAABAA

Darobaa issi kutti oottiya yelagiyo. A ba zammaana moobayliyan kiitaa xaafawusu; ba laggeera biiduwan haasayawusunne tamaare keettaa maxaafaa xannaꞌanawu kompputeriyaa goꞌettawusu.

NABBABIYO WODE

Elektronike miishshata darotoo goꞌettiya asay issi issitoo kumetta huuphe yohuwaa nabbabidi wurssana danddayenna gishshawu, waanna qofaa eesuwan nabbabees.

Issi oyshaa zaaruwaa demmanawu neeni koyiyo wode eesuwan nabbabiyoogee loꞌꞌo. SHin issibaa neeni eranawu tumuppe koyiyaaba gidikko, hegaadan nabbabiyoogee loꞌꞌo gidenna.

QOPPANA KOSHSHIYAABAA: Issi adussaa xuufiyaa ay keena loytta nabbabay? Hegaadan oottiyoogan kaseegaappe aaruwan loytta nabbabanawu waatana danddayay?—LEEMISO 18:15.

QOFAY SHAAHETTANAADAN OOTTEES

Amarida asati issi kutti darobaa oottanawu tekinolojiyaa goꞌettoosona. Leemisuwawu, xannaꞌiiddi laggetussi kiitaa kiittoosona. SHin eta qofay shaahettiyo gishshawu, eti issuwaakka loytti oottokkona.

Qofay shaahettennan issibaa oottiyoogee metiyaaba gidikkonne, baaxetiyoogee nena keehi maaddana. Gireeso giyo yelagiyaa hagaadan gaasu: “Darotoo balabaa oottennaagee, unꞌꞌettennaadan maaddees. Issi kutti issibaa xallaa oottiyoogee qofay shaahettennaadan oottiya keehi loꞌꞌoba gidiyoogaa akeekaas.”

QOPPANA KOSHSHIYAABAA: Tekinolojee ne qofay shaahettanadaaninne xannaꞌidobaa hassayennaadan oottii?—LEEMISO 17:24.

NERKKA DEꞌIYO WODE

Issi issi asati boorasiyo gishshawu, allaxxanawu tekinolojiyaa goꞌettoosona. Oliviya giyo maccaasiyaa hagaadan gaasu: “Ta silkkiyaa, taabiletiyaa woy televizhiiniyaa dooyennan 15 daqiiqa takkiyoogeekka tana salettees.”

SHin asay tamaaridobaa barkka wotti dentti qoppanawu wodiyaa bazzana koshshees.

QOPPANA KOSHSHIYAABAA: Neeni nerkka deꞌiyo wodiyaa wotta dentta qoppanawu goꞌettay?—1 XIMOOTIYOOSA 4:15.

AY OOTTANA DANDDAYAY?

TEKINOLOJIYAA NEENI GOꞌETTIYO OGIYAA QORA

Neeni issibaa eranaadan maaddiya ogiyan tekinolojiyaa waata goꞌettana danddayay? Tekinolojee ne qofay shaahettanadaaninne issibaa neeni akeekennaadan waati oottana danddayii?

GEESHSHA MAXAAFAY YOOTIYO MAARAA: “Lo77o aadhdhida eratettaanne adussi qoppiyoogaa naaga.”—LEEMISO 3:21.

NENA HAGAADAN OYCHCHA.

Taani elektronike miishshan nabbabiyo wode ta qofay shaahettii? Yaatikko, ta qofay shaahettanaadan oottiyaabay aybee?
Qofay shaahettanaadan oottiya hegaa malabaa xayssanawu waatana danddayiyaanaa?

Maaddiya Qofaa: Koyro amaridaagaa nabbabiyoogan doommada, loddan loddan gujja. Ne nabbabiyooban qofaa wottada cenggurssa xoqqu oottada nabbaba.

Taani nabbabiyoobaa loytta qoppanawu wodiyaa bazziyaanaa?

Maaddiya Qofaa: Xinaatiyawu bazzido wodiyaappe 10 daqiiqan xannaꞌidobaa zaaretta.

Taani issi kutti darobaa oottanawu maliyoy awudee?
Ta qofay eesuwan shaahettennaadan waatana danddayiyaanaa?

Maaddiya Qofaa: Ne nabbabiyoobaa akeekanawu xannaꞌiyo wode ne qofaa shaakkiyaabaa diggargga.

GEESHSHA MAXAAFAY YOOTIYO MAARAA: “Aadhdhida eratettaanne akeekaa [demma].”—LEEMISO 4:5.