Waata Kuuyana Danddayay?

Saloynne saꞌay, qassi deꞌuwan deꞌiya mereta ubbay Xoossay medhdhidobeeyye, aybinne baynnasaappe coo beettidabee? Ha huuphe yohuwan beꞌido piizikisiyaa eranchchatinne Doomettaabaa 1:1y he oyshawu yootiyo zaaroy issoy haraagaappe keehi dummatees. Ha naaꞌꞌu ginatunkka odettiyaabata likke giidi ammaniya asay deꞌees. SHin daro asay eti ammaniyoobay tumakkonne shaakki erenna. Hegaa xeelliyaagan asay palamettido qofay keehi erettida maxaafatun xaafettiis; qassi televizhiine prograametunkka shiiqees.

Ne timirtte keettaa asttamaareti Medhdhidaagee baawa, qassi saloy saꞌaynne deꞌon deꞌiya ubbabay aybinne baynnasaappe coo yiis giidi minttidi yootennan waayi aggana. Gidoppe attin, eti Medhdhidaagee baawa giya qofaa qonccissanawu neeyyo naqaashaa yootana danddayiyoonaa? Hara baggaara qassi, haymaanootiyaa kaalettiyaageeti Medhdhidaagee deꞌees giidi tamaarissishin siyennan aggakka. SHin eti yootiyoobawu naqaashaa shiishshiyoonaayye, Xoossay deꞌiyoogaa naqaashi baynnan neeni coo ammanana koshshees giyoonaa?

Neeni he oyshaabaa qoppennan waaya aggana. Woy medhdhidaagee deꞌiyoogaa bessiya ammanttiyaabaa ooninne yootana danddayennabadan qoppennan aggakka. Qassi, ha oyshaa zaaruwaa eriyoogee tumuppe koshshiyaabee? gaada oychchana danddayaasa.

Ha Beegottite! maxeetee, daro asay medhdhidaagan ammananaadan oottidabaappe amaridaageeta kasetidi qonccissana. Hegaappe kaallidi, deꞌuwaa doomettaa xeelliyaagan denddiya oyshatu zaaruwaa eriyoogee keehi koshshiyoy aybissakko qonccissana.