HA SAꞌAY BASHSHAAPPE ATTANEE?
WORAA
WORAY issi uri paxa deꞌanaadan maaddiya goofine mala gidiyogaa amarida eranchchati yootoosona. Ayssi giikko, mittati goofiniyagaadan nu shemppiyo carkkuwa geeshshoosona. Eti nuna qohana danddayiya karbon dayokisaydiya banttawu ekkoosona. Qassi, nuuni shemppanawu keehi koshshiya oksiijiiniya bantta giddoppe kessoosona. Saꞌaa bolli deꞌiya dozatuppenne medoosatuppe xeetaappe 80 kushe gidiyageeti woran deꞌoosona. Woray xayikko, nuuni deꞌon deꞌana danddayokko.
Woray Waaniiddi Deꞌii?
Layttan layttan, biiloniyan qoodettiya mittay qanxxettees; hegaappe dariya baggay qanxxettiyoy biittaa goshshawu goꞌettanaassa. Alamiyan deꞌiya woraappe baggay, 1940 wurssetta heeraappe doommidi deꞌiya wodiyan xayiis.
Woray xayiyo wode, A giddon deꞌiya dozatinne medoosati muleera xayoosona.
Ha Saꞌay Bashshaappe Attanaadan Giigidi Merettiis
Woray daro mittay qeexettido sohuwankka zaarettidi aakkana danddayees. Daro mittay qanxxettido sohoy eesuwan zaaretti diccidi gita wora gidana danddayiyogaa Heeraa Hanotaabaa Xannaꞌiyageeti mata wode akeekidi malaalettidosona. Ha leemisota beꞌa:
Pilggiyageeti, biittaa goshshawu goꞌettanawu woraa qeexidi guyyeppe goꞌettennan aggi bayido sohotun haniyabaa xannaꞌidosona. Amarkkaaninne Arggo Afirkkan 2,200u hegaa mala sohota xannaꞌidobay, tammu layttaa giddon hegaa mala sohotun mittay zaaretti diccidi, kaseegaadan gita wora gidana danddayiyogaa qonccissees.
Pilggiyageeti 100 gidiya layttaa giddon woray barkka, qeexettanaappe kase deꞌiya hanotawu simmana danddayees giidi qoppiyogaa Saynise maxeetiyan kiyida issi xinaatee qonccissees.
Mata wode Brazilen deꞌiya saynttistteti, hegaa mala sohotun woray zaarettidi eesuwan kumiyoy barkka dicciyogaanakko woy asay mittaa tokkin dicciyogaanakko geeddarssidosona.
He pilggidaageetubaa yootiyogan, Nashinal Jografik maxeetee hagaadan giis: “Mittaa tokkiyogee koshshiyaba gidennaagaa akeekidi ufayttidosona.” He pilggido sohotun ichchashu layttaa giddon ayba mittanne tokkennan, “he heeran mokkiya mittati yan kumana danddayoosona.”
Metuwa Pagalanawu Asay Ay Oottiiddi Deꞌii?
Kumetta saꞌan asay haꞌꞌi deꞌiya woraa naaganawunne qohettidageeta kase sohuwawu zaaranawu bawu danddayettidabaa oottiiddi deꞌees. Hegaappe denddidaagan, Kawotettatu Issippetettay yootiyogaadan, aadhdhida 25 layttaa giddon “kumetta saꞌan woraa qeexiyogee xeetaappe 50 kushe gidiyagaa kaseegaappe guuxxiis.”
Shin woray xayennaadan naaganawu hegaa xallay gidenna. “Hombbiya heeratun qeexettida woraa hanotay aadhdhida amarida layttatun darin laamettibeennaagaa” Kumetta Saꞌaa Woraa Xeelliya dirijjitee kessido irpporttee qonccissees.
Kawoy paqqadennan mittaa qanxxidi zalꞌꞌiyageeti daro biiloone doolaariya demmoosona; hegee hombbiya heeratun deꞌiya woray xayanaadan oottiiddi deꞌees.
Woraa naagiyageeti ceeggida mittata qanxxidi eta sohuwan haraa tokkiyogan woraa naaganawu koshshiyabaa oottiiddi deꞌoosona.
Saꞌay Bashshaappe Attanaagaa Ammaniyo Gaasota—Geeshsha Maxaafay Woygii?
“[Yihooway, NW]a xeellanau lo77iya, maanaukka mal77iya ubba qommo mittaa biittaappe mokissiis.”—Doomettaabaa 2:9.
Woraa Medhdhidaagee, woray asay ubbatoo appe goꞌettanaadan zaarettidi barkka mokkanaadan oottidi medhdhiis. I nuuni woraanne malaaliya hanotan merettida saꞌan deꞌiyabata qohuwappe naaganaadan koyees.
Ba xallaa siiqiya asay ha saꞌaanne saꞌan deꞌon deꞌiyabata xayssanaadan Xoossay mule paqqadennaagaa Geeshsha Maxaafay yootees. Sinttaa 15n, “Ha Saꞌay Bashshaappe Attanaagaa Xoossay Qaalaa Geliis” giya huuphe yohuwa xeella.
a Yihoowa giyogee Xoossawu buzo sunttaa.—Mazamure 83:18, NW.