Asay So Asaa Bonchchiyogaa Aggidoy Aybissee?

SO ASAA BONCHCHIYOGEE KEEHI KOSHSHIYOY AYBISSEE?

So asay issoy issuwa bonchchiyo wode, so giddon sarotettaynne woppay deꞌees.

Aqo Deꞌoy Giiga Gidanaadan Oottiya Laappun Maarata giya maxaafay aqo laggeti issoy issuwa bonchchiyo wode, “gitaban gidennan galla galla oottiyo guuttabankka” issoy issuwa siiqiyogaa bessiyogaa yootees.
Harata bonchchanaadan loohida naati, banttabaa loꞌꞌobaa qoppiyogaa, banttana yelidaageetuura ufayssiya hanotan deꞌiyogaanne qofan keehi unꞌꞌettennaagaa issi xinaatee bessees.

AY OOTTANA DANDDAYAY?

Oottanabaa so asaara issippe halchcha. Koyruwan, “bonchchiyogaa” giyogee woygiyogaakko so asa ubbay akeekidaakkonne era. Naaꞌꞌanttuwan, so asawu deꞌana bessiya eeshshatanne eti aggana bessiya eeshshata xaafa. Heezzanttuwan, intte naatuyyonne intteyyo issi mala qofay deꞌanaadan halchchidobaa so asay issippe tobbite.

“Mino oosanchchaa halchchoi dureyees.”—Leemiso 21:5.

Leemiso gida. Intte so asay balidoban amassalay, eta qofaa boray, qassi eti nena haasayissiyo wode sheneho gay woy kelttiya gelay?

Maaddiya qofaa: Bonchchiyogee etawu bessiyabadan woy bessennabadan neeni qoppiyaba gidikkokka, ne aqo laggiyanne ne naata bonchcha.

“Harata bonchchanawu sintta xeera gidite.”—Roome 12:10.

Neeni haratuura maayettenna wodekka eta bonchcha. Neeyyo siyettiyabaa yootiyo wode, “ne ubbatoo yaataasa,” woy “ne mulekka yaatakka” giyogaa malabaa haasayoppa. Hegaa mala amassalee intte so asaa qohananne yiilloyana danddayees, qassi maayettenna guuttabay gitaba gidanaadan oottana danddayees.

“Liiqo haasayai hanqquwaa zarbbissees; shin porddolla qaalai hanqquwaa denttettees.”—Leemiso 15:1.

Issi yelagiya jw.org saytiyan biiduwa beˈawusu.

YIHOOWA MARKKATI AY OOTTIIDDI DEꞌIYONAA?

Yihoowa Markkati so asay issoy issuwa bonchchanaadan minttettoosona; asay miishsha qanxxennan demmana danddayiyo nuuni giigissiyo huuphe yohotun, maxaafatun, broshuretuuninne biidotun darotoo hegaabay kiyees.

AQO OYQQIDAAGEETUYYO: Kaalli kaalli kiyiya So Asaa Maaddiyabaa giya huuphe yohoy azinatanne machchota kaallidi deꞌiyabatun maaddana danddayees:

Loytti ezggiyageeta gidanaadan
Lancciyogaa agganaadan
Palamettiyogaa agganaadan

(“So Asaa Maaddiyabaa” giyagaa jw.org saytiyan koya)

YELIDAAGEETUYYO: Kaalli kaalli kiyiya So Asaa Maaddiyabaa giya huuphe yohoy yelidaageeti kaallidi deꞌiyabatun bantta naata loohissanaadan maaddana danddayees:

Azazettiyageeta gidanaadan
So giddon issi issibata oottidi maaddiyageeta gidanaadan
“Hayyanaa” qassi “galatays” giyageeta gidanaadan

(“Naata Dichchiyogaa” qassi “Panttatettan Deꞌiya Naata Dichchiyogaa” giyageeta jw.org saytiyan koya)

Qassikka, Yelagati Oychchiyo Oyshaa—Oosuwan Peꞌiya Zaaruwa, Shaaho 1 (Amaarattuwa) giya maxaafan, “Yelidaageeti Oychchiyo Oyshaa” giya gujo qofaa xeella. (“Yelidaageeti Oychchiyo Oyshaa” giyagaa jw.org saytiyan koya)

YELAGATUYYO: Panttatettan Deꞌiya Naatanne Yelagata giya jw.org saytiyan deꞌiya shaahuwan, yelagata kaallidi deꞌiyabatun maaddana danddayiya huuphe yohoti, biidotinne oottiyobati deꞌoosona:

Yelidaageetuura, qassi bantta ishaara woy michcheera maayettidi deꞌanaadan
Yelidaageetuura eti kessiyo higgetubaa bonchchuwan haasayanaadan
Yelidaageeti etan ammanettiyogeeta gidanaadan

(“Panttatettan Deꞌiya Naatanne Yelagata” giyagaa jw.org saytiyan koya)

jw.org saytiya goꞌettiyogee miishsha qanxxissenna. Miishsha qanxxiyogee, sabiskkiraybe oottiyogee, woy yame gidiyogee koshshenna, qassi ne buzobaa xaafanaadan oychchiyabi baawa.