Xoossaa Dabbuwaa Abrahaama

BASHSHA Haattaappe simmin, asay deꞌanau biido sohotuppe issoy Uura geetettees. He sohoy amarida loꞌꞌo keettati deꞌiyo erettida katama gidiis. SHin yan deꞌiya asati eeqatussi goynnoosona. Hegee eti Baabeelan deꞌiiddikka oottidoba. Uuraninne Baabeelan deꞌiya asay, Yihoowassi oottiyoogaa aggibeenna Nohanne a naꞌaa Seema mala gidokkona.

Bashsha haattay gakki simmin 350⁠u layttaa takkidi, ammanettida Nohee hayqqiis. Hegaappe naaꞌꞌu layttaa takkidi, ha misiliyan neeni beꞌiyo bitanee yelettiis. I Xoossaassi keehi dumma asa. A sunttay Abrahaama. I ba soo asaara he katamaa Uuran deꞌiis.

Issi gallassi Yihooway Abrahaama: ‘Neeni Uura katamaappenne ne dabbotuppe shaahettada taani nena bessiyo biitti ba’ yaagiis. Abrahaamee Xoossaassi azazettidi, Uuran deꞌiya injje duussaa aggidi biidee? Ee, biis. Abrahaamee Xoossaa dabbo geetettidoykka, i ubbatoo Xoossaayyo azazattido gishshataassa.

Abrahaamee Uura katamaa aggidi biyo wode a soo asaappe amaridaageeti aara issippe biidosona. A aawaa Taari issippe biis. A ishaa naꞌay Looxeekka aara biis. Qassi, a keettayiyaa Saarakka issippe biidoogee qoncce. Guyyeppe, eti Kaaraane giyoosaa gakkidosona; hegeekka Taari hayqqidosaa. Hegee Uurappe daro haaho soho.

Guutta wodiyaappe guyyiyan, Abrahaameenne a soo asay Kaaraaneppe kiyidi Kanaane giyo biitti biidosona. He sohuwan Yihooway: ‘Taani ne naatussi immana biittay hagaa’ yaagiis. Abrahaamee Kanaane biittan dunkkaaniyan deꞌiis.

Xoossay Abrahaama maaddido gishshau, assi cora dorssa wudee, hara mehetinne xeetan qoodettiya ashkkarati deꞌana danddayidosona. SHin Abrahaamee Saarippe naꞌa yelibeenna.

Abrahaame layttay 99 gidiyo wode Yihooway ayyo: ‘Neeni daro deriyaa asau aawaa gidana’ yaagiis. SHin Abrahaameenne Saara naꞌa yelanau keehippe cima gidishin, hegee waanidi hanana danddayii?