Xoossay Abrahaama Ammanuwaa Paacciis

ABRAHAAMEE hagan ay oottiiddi deꞌiyaakko beꞌay? Mashshaa oyqqiis; qassi ba naꞌaa gooraꞌana haniyaabaa milatees. A hegaa malabaa ootissiyaabi aybee? Ane koyro, Abraameenne Saara bantta naꞌaa waati yelidaakko beꞌoos?

Xoossay eti naꞌa yelanaagaa qaalaa gelidoogaa hassaya. SHin Abrahaameenne Saara keehi cimido gishshau, hegee hananaba milatenna. Gidikkonne, Xoossay hanennaba milatiyaabaakka oottana danddayiyoogaa Abrahaamee ammaniis. Yaatin, hanidabay aybee?

Xoossay qaalaa geloosappe laytta kumettay aadhdhiis. Hegaappe guyyiyan, Abrahaamessi 100⁠u laytta, qassi Saarissi 90⁠u laytta gidiyo wode, Yisaaqa geetettiya naꞌaa yelidosona. Xoossay ba gelido qaalaa naagiis!

SHin, Yisaaqi diccidi gitatido wode, Yihooway Abrahaama ammanuwaa paacciis. I: ‘Abrahaamaa!’ giidi xeessin, Abrahaameekka: ‘Yee’ giidi koyiis. Hegaappe guyyiyan Xoossay: ‘Neeni siiqiyo ne mexi issi naꞌaa Yisaaqa ekkada ba; baada yan taani nena bessiyo issi deriyaa bollan a yarshsho oottada taayyo yarshsha’ yaagiis.

Abrahaamee ba naꞌaa keehippe siiqiyo gishshau, he azazoy Abrahaama ay keena azzanttideeshsha! Qassi, Xoossay Abrahaama naati Kanaane biittan deꞌanaagau qaalaa gelidoogaa hassaya. SHin Yisaaqi hayqqiyaaba gidikko, hegee waani polettana danddayii? Abrahaamee hegee waani hananaakko eriyobi baawa shin, hegankka Xoossaassi azazettiis.

Abrahaamee deriyaa kiyido wode, Yisaaqa qachchidi, yarshshanau gimbbido sohuwan zinꞌꞌissiis. Hegaappe kaallidi, ba naꞌaa gooraꞌanau mashshaa ekkiis. SHin sohuwaara Xoossaa kiitanchchay: ‘Abrahaamaa, Abrahaamaa!’ yaagidi xeesiis. Abrahaameekka: ‘Yee’ yaagidi koyiis.

Xoossay hagaadan giis: ‘Naꞌaa qohoppa; a aynne oottoppa; neeni tana ammaniyoogaa taani haꞌꞌi eraas; aybissi giikko, neeni ne mexi issi naꞌaakka tana diggabaakka’ yaagiis.

Abrahaamee Xoossan ayba wolqaama ammanoy deꞌiyo asee! I Yihoowassi danddayettennabi aybinne baynnaagaanne Yihooway Yisaaqa hayquwaappekka denttana danddayiyoogaa ammaniis. SHin Abrahaamee Yisaaqa woranaadan Xoossay tumuppe koyibeenna. Hegaa gishshau, Xoossay matasan dorssa issoy buuran qaxetti uttanaadan oottidi, Abrahaamee ba naꞌaa gishshaa a yarshshanaadan yootiis.