Gacino Naꞌay Muusee Waanidi Attidaakko

MACCAASEE biradhdhiyaa oyqqidi yeekkiya gacino naꞌaa xeella. Hegee Muusa. He loꞌꞌiya maccaasiyaa oonakko eray? A Gibxxe kawuwaa Paaroona naꞌiyo.

Muuse aayyiyaa ba naꞌaa Gibxxeti worenna mala koyido gishshau, au heezzu agina gidanaashin qottaasu. SHin Muusa hara asi demmikko woriyoogaa erada, a ashshanau kaallidi deꞌiyaagaadan oottaasu.

Keeshiyaa daddada ayba haattinne gelennaadan oottada meeshaasu. Hegaappe Muusa a giddon wottada, he keeshiyaa Nayle SHaafaa doonan mokkida adussa maataa giddon wottaasu. Muuse michchiyaa Miiriyaama hanettiyabaa matasan eqqada beꞌanaadan azazettaasu.

Sohuwaara Paaroona naꞌiyaa bollaa meecettanau Nayle SHaafaa wodhdhaasu. Qoppennan he adussa maataa giddon deꞌiya keeshiyaa beꞌaasu. Ba macca ashkkaratuppe issinniyo xeesada: ‘Baada he keeshiyaa tau ekkada ya’ yaagaasu. Kawuwaa naꞌiyaa keeshiyaa pogiyo wode, a beꞌidoy ayba loꞌꞌiya naꞌee! Guutta naꞌay Muusee yeekkiyaagaa kawuwaa naꞌiyaa beꞌada ayyo qarettaasu. I hayqqanaadan koyabuukku.

Hegaappe Miiriyaama yaasu. O ha misiliyan beꞌana danddayaasa. Miiriyaama, Paaroona naꞌiyo: ‘Neeyyo ha naꞌaa xanttanau Israaꞌeela maccaasa issinno xeesanau boo?’ yaagada oychchaasu.

Kawuwaa naꞌiyaa: ‘Hayyanaa ba’ yaagaasu.

Hegaa gishshau, Miiriyaama ba aayeessi yootanau woxxaasu. Muuse aayyiyaa kawuwaa naꞌeekko yin, kawuwaa naꞌiyaa: ‘Ha naꞌaa efaada, taayyo xanttashsha; taani neeyyo damoozaa qanxxana’ yaagaasu.

Hegaa gishshau, Muuse aayyiyaa ba naꞌaa loytta dichchaasu. Guyyeppe Muusee gitaa gidin, a aayyiyaa efaada ba naꞌadan dichchiya Paaroona naꞌeessi immaasu. Muusee Paaroona son diccana danddayidoy hegaassa.