Guutta Naꞌay Xoossaayyo Oottiis

HA GUUTTA naꞌay loꞌꞌennee? A sunttay Sameela. Qassi ba kushiyaa Sameela huuphiyan wottidaagee, Israaꞌeele qeesetu halaqaa Eela. Sameela Eelakko ehiiddi deꞌiyageeti hegeeti, a aawaa Elqqaananne a aayyiyo Haanno.

Sameeli mexi oyddu woykko ichchashu laytta naꞌa. SHin i Eelaaranne hara qeesetuura, hagan Yihoowa dunkkaaniyan deꞌana. Elqqaaninne Haanna ha qii guutta naꞌaa Sameela, Yihoowa dunkkaaniyan oottanaadan immidoy aybissee? Ane beꞌoos.

Guutta layttappe kase Haanna keehi azzanaasu. Hegau gaasoy, Haannissi naꞌi baynnaagaa gidishin, a naꞌa yelanau keehippe amottausu. Hegaa gishshau, Haanna Yihoowa dunkkaaniyaa biido wode, Yihoowakko: ‘Abeet Yihoowau, tana dogoppa! Ne taassi naꞌa immikko, i ba deꞌo laytta ubban neeyyo oottanaadan ta a neessi immanau qaalaa gelayis’ yaagada woossaasu.

Yihooway Haanni woosaa siyin, amarida aginatuppe guyyiyan a Sameela yelaasu. Haanna ba guutta naꞌaa siiqiyo gishshau, i qii guuttan deꞌishin doommada Yihoowabaa a tamaarissaasu. Ba azinaassi: ‘Sameeli xanttaa duuttosaara, i yan Yihoowassi oottanaadan taani a gayttiyo dunkkaanee deꞌiyosaa ekka baana’ yaagaasu.

Ha misiliyan Elqqaaninne Haanna oottishin nu beꞌiyoogeekka hegaa. Qassi a yelidaageeti Yihoowabaa a loyttidi tamaarissido gishshau, Sameeli hagan Yihoowa dunkkaaniyan Yihoowassi oottana danddayidoogan daro ufayttiis. Haannanne Elqqaani layttan layttan he dumma dunkkaaniyan goynnanaunne bantta guutta naꞌaa beꞌanau yoosona. Qassi layttan layttan Haanna Sameelassi, a giigissido ooratta qoliyaa ekkada yausu.

Layttaappe layttay aadhdhi aadhdhi biyo wode, Sameeli Yihoowa dunkkaaniyan oottiyoogaa aggibeenna gishshau, Yihoowaynne asay a dosoosona. SHin qeesetu halaqaa Eela naati Hofiniininne Piinihaasi, loꞌꞌo asa gidokkona. Eti daro iitabaa oottidosonanne hara asaykka Yihoowassi azazettennaadan oottoosona. Eeli eta qeesetettaappe diggana bessees shin diggibeenna.

Dunkkaane giddon oosettiya iitabay, yelaga Sameela Yihoowassi oottiyoogaa agganaadan oottibeenna. SHin Yihoowa wozanappe siiqiya asay keehi guutta gidiyo gishshau, Yihooway asaa haasayisoosappe daro wodee aadhdhiis. Sameeli guuttaa gitatoogaappe guyyiyan hanettidabay kaallidi deꞌiyaagaa:

Sameeli Yihoowa dunkkaane giddon xiskkidaashin, issi cenggurssay a xeesin beegotiis. Yaatin i ‘Yee’ yaagidi koyiis. Denddidi Eelakko woxxi biidi, ‘Neeni xeesin hekko yaas’ yaagiis.

SHin Eeli zaaridi: ‘Taani nena xeesabeykke, baada zinꞌꞌa’ yaagiis. Yaagin Sameeli biidi zinꞌꞌiis.

Hegaappe: ‘Sameelaa!’ giidi naaꞌꞌanttuwaa xeesiis. Sameeli denddidi zaarettidikka Eelakko woxxi biidi, ‘Neeni xeesin hekko yaas’ yaagiis. SHin Eeli zaaridi: ‘Ta naꞌau ta nena xeesabeykke. Haꞌꞌikka baada zinꞌꞌa’ yaagiis. Yaagin Sameeli biidi zinꞌꞌiis.

He cenggurssay heezzanttuwaakka: ‘Sameelaa!’ yaagidi xeesiis. Yaatin Sameeli Eelakko woxxi biidi, ‘Tana haꞌꞌi xeesiday nena gidana, hekko yaas’ yaagiis. Eeli naꞌaa xeesiyaagee Yihoowa gidiyoogaa haꞌꞌi eriis. Yaatiyo gishshau, Eeli Sameela: ‘Haꞌꞌikka baada zinꞌꞌa; zaarettidi xeesiyaaba gidikko, “Yihoowau, yoota; taani ne ashkkaray siyayis” yaaga’ yaagiis.

Yihooway zaarettidi xeesin, Sameeli hegaadan giidi zaariis. Hegaappe Yihooway Eelanne a naata qaxxayanaagaa Sameelassi yootiis. Takkidi Hofiniininne Piinihaasi Pilisxxeematuura olettiiddi hayqqidosona; qassi Eeli hanidabaa siyido wode kunddidi, garbbalee meqqin ikka hayqqiis. Yaatiyo gishshau, Yihooway giidobay polettiis.

Sameeli diccidi, Israaꞌeelen wurssetta daanna gidiis. I cimido wode, asay a: ‘Nuna haariya kawuwaa doora’ yaagidi oychchiis. Yihooway tumuppe etayyo kawo gidiyo gishshau, Sameeli hegaadan oottana koyibeenna. SHin asay giyoobaa siyanaadan Yihooway assi yootiis.