Abigaalonne Daawita

AAWITAARA gayttanau yiya ha loꞌꞌiya maccaasiyaa oonakko eray? I sunttay Abigaalo. A loꞌꞌo akeekay deꞌiyo asa gidiyo gishshau, Daawiti issi iitabaa oottenna mala teqqaasu. SHin hegaa tamaaranaappe kase, Daawiti waaniiddi takkidaakko ane beꞌoos.

Daawiti Saaꞌoolappe baqatoogaappe guyyiyan, issi gonggolo giddon qosettiis. A ishanttinne a soo asati harati, he sohuwaa akko yiidosona. Muleera 400 gidiya attuma asay akko yin, Daawiti eta halaqa gidiis. Hegaappe Daawiti Mooꞌaaba kawuwaakko biidi: ‘Taani waananaakko beꞌana gakkanaashin ta aayyiyonne ta aawaa ne matan wottashsharkkii’ yaagiis. Hegaappe Daawitinne a asati deretiyasan qosettiyoogaa doommidosona.

Daawiti Abigaaliira gayttidoy hegaappe simmiina. I azinaa Naabaali daro gadee deꞌiyo dure asa. Ayyo 3,000u dorssaynne 1,000u deeshshay deꞌees. Naabaali meqeti baynna iita asa. SHin a machchiyaa Abigaala loꞌꞌobaa oottiyo ogiyaa eriya asanne keehippe mera loꞌꞌiya asa. Issi gallassi ubba, ba soo asaa hayquwaappe ashshaasu. Ane a waatada hegaadan oottidaakko beꞌoos.

Daawitinne a asati Naabaalassi kehabaa oottidosona. Eti a dorssata qohuwaappe naagidosona. Yaatiyo gishshau, issi gallassi Daawiti, Naabaali baassi kehanaadan oychchanau ba asatuppe amaridaageeta akko kiittiis. Daawita asati Naabaalakko yi gakkiyo wode, inne a oosanchchati dorssaa ikisiyaa meedoosona. Hegee bullachcha gallassa mala gidiyo gishshau, Naabaalassi miyo daro loꞌꞌobay deꞌees. Yaatiyo gishshau, Daawita asati: ‘Nuuni neessi kehabaa oottida. Ne dorssatuppekka aybanne wuuqqibookko, ubba eta naagiyoogan maaddida. Hayyana haꞌꞌi nuussi miyo amaridabaa immarkkii’ yaagidosona.

Naabaali: ‘Taani intte mala asau ta qumaa immikke’ yaagiis. I keehi iita hanotan haasayiis; qassi Daawitakka cayiis. Asati Daawitakko simmi biidi hanidabaa assi yootin, Daawiti keehi yiillotiis. I ba asata ‘Intte bisuwaa bisuwaa gixxite!’ yaagiis. Eti Naabaalanne a son deꞌiya attuma asaa woranau denddidi biidosona.

Naabaali haasayido iitabaa siyida a asatuppe issoy, hanettidabaa Abigaalissi yootiis. Abigaala sohuwaara amarida qumaa giigissaasu. Hegaa amarida haretun caanada biyoogaa doommaasu. Daawita beꞌanne ba hariyaappe wodhdhada a sinttan ziggada: ‘Hay ta godau, ta azinay Naabaali giidobaa siyopparkkii. I eeyya; qaassi i oottiyoobikka eeyyabaa. Taani ehiido imotaa hayyanaa ekkada, hanida ubbabaa nuussi atto yaagarkkii’ yaagasu.

Daawiti: ‘Neeni loꞌꞌo qofaara deꞌiya maccaasa. Taani Naabaala worada a iitatettau ta haluwaa kiyennaadan ne teqqadassa. Haꞌꞌi ne soo saro simma’ yaagiis. Guyyeppe Naabaali hayqqin, Abigaala Daawita machchotuppe issinno gidaasu.