Xoossay Kawuwaa Hizqqiyaasa Maaddiis

A BITANEE Yihoowakko woossiyoy aybissakko eray? I ha dabddaabbeta Yihoowassi yarshshiyoosaa sinttan miccidoy aybissee? He bitanee Hizqqiyaasa. I tohossa Israaꞌeele naaꞌꞌu zaretu kawo. I haꞌꞌi daro metuwan deꞌees. Aybissi?

Asooretu olanchchati huuphessa bagga Israaꞌeele 10u zareta xayssidosona. Eti keehippe iita gidido gishshau hegaa Yihooway diggibeenna. Haꞌꞌi qassi Asooretu olanchchati naaꞌꞌu zaretu kawotettaara olettanau yi uttidosona. Hizqqiyaasa qofissidabay hegaa.

Asoore biittaa kawoy, Kawuwaa Hizqqiyaasassi dabddaabbiyaa kiittiis. Hizqqiyaasi Xoossaa sinttan miccidoy he dabddaabbeta. Dabddaabbeti Yihoowa qilliccidobatanne, Hizqqiyaasi hidoota qanxxanaadan giidi xaafidobata. Hizqqiyaasi: ‘Abeet Yihoowau, Asoore kawuwaa kushiyaappe nuna ashsha. Hegaappe dere ubbay neeni tumu Xoossa gidiyoogaa erana’ yaagidi woossidoy hegaassa. Yihooway Hizqqiyaasa woosaa siyanee?

Hizqqiyaasi loꞌꞌo kawo. I Israaꞌeele 10u zaretu kawotettaa iita kawotu mala woykko ba iita aawaa Kawuwaa Akaaza mala gidenna. Hizqqiyaasi Yihoowa higgiyaa ubbaa akeekan azazettiis. Yaatiyo gishshau, Hizqqiyaasi woosaa wurssi simmin, hananabaa yootiya Isiyaasi: ‘Asoore kawoy Yerusalaame yeenna. A wotaaddaratuppe issoynne Yerusalaamekko matenna. Eti katamaakko issi zubiyaanne yeddokkona’ yaagiya Yihoowappe siyido kiitaa akko kiittiis.

Hagan deꞌiya misiliyaa xeella. Ha hayqqida wotaaddarati ubbay oonakko eray? Eti Asooreta. Yihooway ba kiitanchchaa kiittin, he kiitanchchay issi qamman 185,000u Asooretu wotaaddarata woriis. Yaatiyo gishshau, Asooretu kawoy hidootaa qanxxidi ba biitti simmiis.

Naaꞌꞌu zaretu kawotettay attiis; hegaappe asay guutta wodiyau saruwan deꞌiis. SHin Hizqqiyaasi hayqqi simmin a naꞌay Minaasee kawotiis. Minaaseenne appe simmidi kawotida a naꞌay Amooni, naaꞌꞌaykka keehippe iita kawota. Yaatiyo gishshau, biittay zaarettidikka danuwaaninne makkalan kumiis. Kawuwaa Amoona a ashkkarati worin, a naꞌay Yoosiyaasi naaꞌꞌu zaretu kawotettan kawo gidiis.