Israaꞌeele Loꞌꞌo Kawotuppe Wurssettaa

OOSIYAASI tohossa bagga Israaꞌeele naaꞌꞌu zaretu kawo gidiyo wode ayyo layttay hosppuna xalla. Issi uri kawo gidiyo layttappe hegee keehi guutta. Yaatiyo gishshau, koyro heeran amarida gastta asati, i deriyaa haaranaadan maaddidosona.

Yoosiyaasi kawotoosappe laappun laytta gidiyo wode, Yihoowa koyiyoogaa doommiis. I Daawita, Yosaafixanne Hizqqiyaasa mala loꞌꞌo kwotu leemisuwaa kaalliis. Hegaappe, Yoosiyaasi biron yelagatettan deꞌiiddi issi xala ooso oottiis.

Israaꞌeeletuppe daroti daro wodiyaassi keehippe iita gididi deꞌidosona. Eti tumu Xoossa gidenna eeqatussi goynnidosona. Yaatiyo gishshau, Yoosiyaasi ba asatuura biidi, biittaappe eeqaa goynnuwaa xayssiyoogaa doommiis. Daro asay worddo xoossatuyyo goynniyo gishshau, hegee keehippe wolqqaama ooso. Yoosiyaasinne a asati hagan eeqa xoossata menttereettiyaageeta beꞌana danddayaasa.

Hegaappe guyyiyan, Yoosiyaasi Yihoowa beeta maqidasiyaa bottokoniyo oosuwan heezzu asata sunttiis. Oosettiyaabau qanxxana mala asaappe miishshay shiiqidi ha asatuyyo imettiis. Eti Beeta Maqidesiyan oottishin, qeese ubbatu halaqay Hilqqee issi keehippe koshshiyaabaa he sohuwan demmiis. Hegee keehi daro wodiyaappe kase Yihooway Muusa xaafissido higgiyaa maxaafaa. I daro wodiyaassi xayidi takkiis.

Maxaafaa Yoosiyaasakko efin, Yoosiyaasi baassi a nabbabana mala oychchiis. Nabbabiyo wode Yoosiyaasi ezggiiddi, Yihoowa higgiyaa asay naagibeennaagaa akeekiis. I hegan daro azzanidi, hagan neeni be⁠ꞌiyoogaadan ba maayuwaa pooshshi aggiis. I: ‘Nu aawati ha maxaafan xaafettida higgiyaa naagibeenna gishshau, Yihooway nu bolli yiillotiis’ yaagiis.

Yoosiyaasi bantta bolli Yihooway ehaanabaa erana mala qeesetu halaqaa Hilqqiya azaziis. Hilqqee hananabaa yootiya maccaasee Hulddikko biidi, o oychchiis. A Yihoowappe yiida ha kiittaa Yoosiyaasassi yootanaadan Hilqqiyassi yootaasu: ‘Asay eeqaassi goynnido gishshaunne biittay iitatettan kummido gishshau Yerusalaameenne ubba asay qaxxayettana. SHin Yoosiyaasaa neeni, loꞌꞌobaa oottido gishshau, ha qixaatee gakkanay ne hayqqa simmiina’ yaagaasu.