Yayyibeenna Bitaniyaa

SAY ha yelaga bitaniyaa qillicciyaaga beꞌa. I oonakko eray? Hegee Ermaasa. I keehi erettida hananabaa yootiya Xoossaa asa.

Kawuwaa Yoosiyaasi eeqaa biittaappe xayssi simmin daronne gamꞌꞌennan, Ermaasi hananabaa yootiyaagaa gidanaadan Yihooway assi yootiis. Gidikkonne, Ermmaasi hananabaa yootanau bana keehippe guutta naꞌa giidi qoppiis. SHin Yihooway a maaddanaagaa yootiis.

Ermmaasi Israaꞌeeleti iitabaa oottiyoogaa agganaadan yootiis. I: ‘Israaꞌeele gidenna asay goynniyoy eeqatussa’ yaagiis. SHin daro Israaꞌeeleti tumu Xoossaa Yihoowaassi goynniyoogaappe eeqau goynnoosona. Eramaasi eta iitatettaa gishshau Xoossay eta qaxxayanaagaa yootido wode, eti a bollan miiccidosona.

Daro layttay aadhdhiis. Yoosiyaasi hayqqin, heezzu aginay aadhdhi simmin a naꞌay Yoꞌaqeemi kawotiis. Ermaasi asaassi zaari zaaridi: ‘Intte intte iita oosuwaa aggana xayikko, Yerusalaamee xayana’ yaagiis. Qeeseti Ermmaasa oyqqidi: ‘Neeni hagaa giido gishshau hayqqana koshshees’ yaagidi qaalaa xoqqissidi haasayidosona. Hegaappe Israaꞌeele biittaa daannatuyyo: ‘Ermaasi nu katamay xayees giidi yootido gishshau, i hayqqana bessees’ yaagidosona.

Ermaasi haꞌꞌi ay oottanau deꞌii? I yayyibeenna! I eta ubbaayyo: ‘Tana Yihooway intteyyo hagaa yootanaadan kiittiis. Intte intte iita oosuwaa aggana xaykko, Yihooway Yerusalaame xayssana. SHin: ‘Intte tana woriyaabaa gidikko, bali baynna asa woriyoogaa erite’ yaagiis.

Daannati Ermmaasa woribookkona shin, Israaꞌeeleti bantta iita oosuwaa aggibookkona. Takkidi Baabiloone kawoy Naabukadanaxoori yiidi, Yerusalaame oliis. Wurssettan Naabukadanxoori Israaꞌeeleta ba ashkkarata oottiis. I daro shaꞌan qoodettiyaageeta Baabiloone ekki efiis. Ne erenna asay nena ne deꞌiyo heeraappe ne erenna biitti efiyaakko neessi aybi siyettanaakko ane qoppa!