Marddikiyoosanne Asttiro

IZIRI Yerusalaame biido wodiyaappe guuttaa kasetiya wodiyaa ane qoppi ekkoos. Marddikiyoosinne Asttira Parsse kawotettaa giddon deꞌiya Israa⁠ꞌeeletu ubbaappe aadhdhidi erettidaageeta. Asttira kawiyo; qassi i aawaa ishaa naꞌay Marddikiyoosi kawuwaappe kaallidi maatay deꞌiyo asa. Hegee waanidi hanidaakko ane beꞌoos.

Asttiri aawaaynne aayyiyaa a qii guuttan deꞌishin hayqqido gishshau, o Marddikiyoosi dichchiis. Parsse kawuwaa Ahishawiroosassi Suusa kataman kawo keettay deꞌees; qassi Marddikiyoosi a ashkkaratuppe issuwaa. Issi gallassi kawuwaa machchiyaa Asxxiina ayyo azazettennan ixxaasu; yaatiyo gishshau, kawoy ooratta machchiyo kawiyo gidanaadan dooriis. I doorido maccaasiyo eray? Ee, a loꞌꞌiya yelaga Asttiro.

Asay ayyo ziggiyo ha otoranchcha bitaniyaa beꞌay? Hegee Hamaana. I Parssen gita maatay deꞌiyo asa. Hamaani, ha ne beꞌiyo uttida bitanee, Marddikiyoosikka ayyo zigganaadan koyiis. SHin Marddikiyoosi ziggenna. Hegaa mala iita asassi ziggiyoogee ayyo likke milatibeenna. Hegee, Hamaana keehippe yiilloyiis. Hegaa gishshau, i kaallidi deꞌiyaagaadan oottiis.

Hamaani Israaꞌeeleta xeelliyaagan kawuwassi worddobaa yootiis. I: ‘Eti ne higgiyassi azazettenna iita asa. Eti hayqqana bessees’ yaagiis. Ahishawiroosi ba machchiyaa Asttira Israaꞌeele biitta asa gidiyoogaa erenna. Yaatiyo gishshau, i Hamaani giidobaa siyidi, ubba Israaꞌeeleti issi gallassi hayqqanaadan higgiyaa kessiis.

Marddikiyoosi kiyida higgiyaa siyido wode, keehippe unꞌꞌettiis. I Asttirikko: ‘Kawuwaayyo yootada, i nuna ashshana mala woossana bessees’ yaagidi kiittiis. Kawoy xeesennan deꞌishin kawuwaakko biyoogee, Parsse biittaa higgiyan digettidabaa. SHin Asttira xeesettennan kawuwaakko gelaasu. Kawoy ba worqqa xamꞌꞌaa ikko micciis; hegee a hayqqukku yaagiyoogaa. Asttira gita gibiraa giigissada kawuwaanne Hamaana shoobbaasu. He sohuwan kawoy Asttiro, i iyyo ay oottanaadan koyiyaakko oychchiis. Asttira, wonttetta gallassikka a giigissiyo hara gibiraayyo inne Hamaani yiyaabaa gidikko, assi odanaagaa yootaasu.

He gibiran Asttira kawuwaayyo: ‘Ta asaanne tana woranau deꞌoosona’ yaagaasu. Yaagin, kawoy keehippe yiillotiis. I: ‘Hegaa oottanau xalidaagee oonee?’ yaagidi oychchiis.

Asttira: ‘He bitanee, he morkkee, ha iita Hamaana!’ yaagaasu.

Kawoy he wode iita yiillotiis. I Hamaani hayqqana mala azaziis. Hegaappe simmidi, kawoy Marddikiyoosa baappe kallidi maatay deꞌiyoogaa oottidi sunttiis. Yaatin Marddikiyoosi, Israaꞌeeleti hayquwaa naagi uttido gallassan, eti bantta bolli yiyabaa oletti teqqanaadan ooratta higgiyaa kessiis. Marddikiyoosi haꞌꞌi hegaa mala gita maatay deꞌiyo asa gidiyo gishshau, daro asay Israaꞌeeleta maaddin, eti bantta morkketuppe attidosona.