Yerusalaame Dirssaa Gimbbiyaa

HAGAN oosettiiddi deꞌiya oosuwaa ubbaa beꞌa. Israaꞌeeleti Yerusalaame dirssaa gimbbiyaa shemppoy baynnan gimbboosona. Kawuwaa Naabukadanaxoori 152u layttappe kase Yerusalaame xayssido wode, i dirssa gimbbiyaa laaliisinne katamaa penggetakka taman xuuggiis. Israaꞌeeleti Baabilooneppe bantta biitti simmido koyro wode, dirssaa gimbbiyaa zaaretti gimbbibookkona.

Yan deꞌiya asay bantta katamay dirssi baynnan hegaa keena layttassi deꞌiyo wode, etassi aybbi siyettees gaada qoppay? Eti hirggan deꞌidosona. Eta morkketi metootennan gelidi eta qohana danddayoosona. SHin haꞌꞌi wurssettan dirssaa gimbbiyaa zaarettidi gimbbanaadan, ha bitanee Nahimee asaa maaddiiddi deꞌees. Nahimee oonakko eray?

Nahimee Marddikiyoosinne Asttira deꞌiyo Suusa katamaappe yiida Israaꞌeele asa. Nahimee kawo keettan oottiido gishshau, Marddikiyoosassinne Kawee Asttirissi mata lagge gidennan aggenna. SHin Geeshsha Maxaafay Nahimee Asttiri azinaa Kawuwaa Ahishawiroosassi oottidoogaadan yootenna. I oottidoy appe kaallidi kawotida Kawuwaa Arxxekssiisassa.

Arxxekssiisi, Iziri Yihoowa beeta maqidasiyaa giigissanau Yerusalaame biyo wode, he ubba miishshaa ekki baanaadan oottida loꞌꞌo kawuwaa gidiyoogaa hassaya. SHin Iziri laaletti uttida katamaa dirssaa gimbbiyaa gimbbibeenna. Nahimee he oosuwaa waati oottana danddayidaakko ane beꞌoos.

Iziri beeta maqidasiyaa giigissanaadan Arxxekssiisi miishshaa assi immoosappe 13u laytta gidiis. Nahimee haꞌꞌi Kawuwaa Arxxekssisassi woyne eessaa tigiyaageetu halaqa. Hegaa giyoogee, kawuwaassi woyne eessaa immiyoogaanne ooninne marzziyaa yeggidi kawuwaa qohenna mala naagiyoogaa yaagiyoogaa. Hegee keehi gita ooso.

Issi gallassi Nahimiyaa ishay Hanaaninne hara asati Israaꞌeeleppe Nahimiyaara gayttanau biidosona. Eti Israaꞌeeleti beꞌiiddi deꞌiyo metuwaanne, Yerusalaame dirssaa gimbbeekka he wode gakkanaashin, laalettidi ay mala hanotan deꞌiyaakko assi yootidosona. Nahimee hegan daro azzanidi, hegaa xeelliyaagan Yihoowakko woosaa shiishshiis.

Issi gallassi Nahimee azzanidoogaa kawoy eridi: ‘Neeni hagaa keena ayssi azzanadii?’ yaagidi oychchiis. Nahimee Yerusalaamee hegaa mala iita hanotan deꞌiyo gishshataassanne dirssaa gimbbeekka kunddi uttido gishshataassa gidiyoogaa kawuwaassi yootiis. Kawoy: ‘Neeni koyiyoobay aybee?’ yaagidi oychchiis.

Nehimee: ‘Taani Yerusalaame baada, dirssaa gimbbiyaa zaarada gimbbanaadan yeddarkkii?’ yaagidi oychchiis. Kawuwaa Arxxekssiisi daro keha asa. I Nahimee baana danddayiyoogaa yootidi, amarida oosuwau goꞌettiyo mittaa demmana malakka maaddiis. Nahimee Yerusalaame simmosaarakka, ba halchchidobaa asaassi yootiis. Eti a qofaa dosidi: ‘Gimbbiyoogaa doommoos’ yaagidosona.

Israaꞌeeletu morkketi dirssaa gimbbee xoqqiiddi biyaagaa beꞌidi: ‘Nuuni pude kiyi eta woridi, he oosuwaa esissana’ yaagidosona. SHin Nahimee hegaa siyidi, gimbbiyaageetussi bisuwaanne tooraa immiis. Qassi i: ‘Nu morkketuyyo yayyoppite. Intte ishanttussi, intte naatussi, intte machchotussinne intte keettaassi olettite’ yaagiis.

Asay keehippe xala. Eti bantta ola miishshaa oyqqidi, gimbbiyaa gallassinne qammi gimbbiyoogaa aggibookkona. Yaatiyo gishshau, dirssaa gimbbee 52u gallassa xallan gimbbetti wuriis. Haꞌꞌi asay kataman hirggi baynnan deꞌana danddayees. Nahimeenne Iziri Xoossaa higgiyaa asaa tamaarissin, asay ufayttiis.

SHin haꞌꞌikka gidin ubbabay Israaꞌeeleti omooddettidi Baabiloone baanaappe kase deꞌiyaagaa mala gidenna. Asaa haariyay Parsse kawuwaa gidiyo gishshau, eti ayyo oottana bessees. SHin Yihooway asaassi ooratta kawuwaa denttanaagaanne he kawoy asaassi sarotettaa ehaanaagau qaalaa geliis. He kawoy oonee? I saꞌan sarotaa waati ehaanee? He yohuwaabaa gujjidi erennan 450u laytta gidiyaagee aadhdhiis. Hegaappe asa naatu yeletan xoqqa sohoy immettiyo naꞌay yelettiis. SHin hegee hara taarike.