Yesuusi Harggidaageeta Pattiis

YESUUSI Israaꞌeele biitta ubbasaa biiddi, harggidaageeta pattiis. He maalaalissiyaabatu odoy moottatunne katamatu ubbaa gakkiis. Yaatiyo gishshau, asay wobbeta, qooqeta, tulletanne hara daro hargganchchata akko ehiis. Yesuusi eta ubbaa pattiis.

Yohaannisi Yesuusa xammaqoosappe haꞌꞌi heezzu laytta kumidi aadhdhiis. Yesuusi gamꞌꞌennan Yerusalaame baanaagaa, yan a asay woranaagaanne hayquwaappe i denddanaagaa ba kiittidoogeetuyyo yootiis. Hegee gakkanaashin, Yesuusi harggidaageeta pattiiddi takkiis.

Yesuusi issi Sambbata gallassan tamarissiiddi deꞌees. Sambbatay Ayhudatussi shemppo gallassa. Hagan neeni beꞌiyo maccaasiyaa keehippe sahettaasu. A sitti gaada eqqanau danddayennan, 18n layttaa quunnada deꞌaasu. Hegaa gishshau, Yesuusi ba kushiyaa i bolli wottin, sitti ga eqqiyoogaa doommaasu. A paxa aggaasu!

Hegee haymaanootiyaa kaalettiyaageeta yiilloyiis. Etappe issoy shiiqida asaayyo qaalaa xoqqu oottidi: ‘Nuuni ooso oottanau koshshiyo usuppun gallassati deꞌoosona. Intte yiidi paxanau bessiyoy he gallassatuunappe attin, Sambbataana gidenna!’ yaagiis.

SHin Yesuusi: ‘Ha iita asatoo, intte ubbay Sambbatan intte hariyaa birshshidi haattaa ushshanau efeeta. Yaatin, 18n layttau hargga deꞌida ha qarettiya maccaasiyaa Sambbatan paxana bessennee?’ yaagidi zaariis. Yesuusa zaaroy he iita asata yeellayi aggiis.

Hegaappe takkidi, Yesuusinne i kiittidoogeeti Yerusalaame biiddi deꞌoosona. Eti Yarkko katamaappe kiyiiddi deꞌishin, naaꞌꞌu qooqe woosanchchati Yesuusi ogiyaara aadhdhiiddi deꞌiyoogaa siyidosona. Hegaa gishshau, eti bantta qaalaa xoqqu oottidi: ‘Yesuusaa, nuna maaddarkkii!’ yaagidosona.

Yesuusi qooqeta baakko xeesidi: ‘Taani inttessi ay oottanaadan koyeetii?’ yaagidi oychchiis. Eti: ‘Godau, nu ayfiyaa dooyarkkii’ yaagidosona. Yesuusi eta ayfiyaa bochchiin, sohuwaarakka eta ayfee xeelli aggiis! Yesuusi hagaa mala maalaalissiya darobata oottidoy aybissakko eray? I asaa siiqiyo gishshataassanne eti banan ammananaadan koyiyo gishshataassa. Yaatiyo gishshau, i Kawo gididi haariyo wode saꞌan deꞌiya ooninne sahettenaagaa ammanana danddayoos.