Nuuni Merinau Deꞌana Danddayiyo Ogiyaa

HA GUUTTA naꞌiyanne i laggeti ay nabbabiiddi deꞌiyaakko eray? Ee, hegee neeni nabbabaydda deꞌiyo ha maxaafaa​—Geeshsha Maxaafaa Taariketa Tamaariyo Maxaafaa. Qassi eti neeni nabbabaydda deꞌiyo, “Nuuni Merinau Deꞌana danddayiyo ogiyaa” yaagiya taarikiyaa nabbabiiddi deꞌoosona.

Eti ay tamaariiddi deꞌiyaakko eray? Nuuni merinau deꞌanau, koyro Yihoowanne a Naꞌaa Yesuusa erana koshshiyoogaa tamaaroosona. Geeshsha Maxaafay: ‘Tumu Xoossaa gididaagaabaanne qassi, i saꞌaa kiittido Naꞌaa, Yesuus Kiristtoosabaa eriyoogee, hegee merinaa deꞌo oge’ yaagees.

Nuuni Yihoowabaanne a Naꞌaa Yesuusabaa waati erana danddayiyoo? Issi ogee Geeshsha Maxaafaa Taariketa Tamaariyo Maxaafaa doomettaappe wurssettaa gakkanaashin nabbabiyoogaana. Ha maxaafay Yihoowabaanne Yesuusabaa darobaa yootees; gidennee? Qassi eti oottido darobatubaanne biron oottanau deꞌiyo darobatubaa yootees. SHin nuuni ha maxaafaa nabbaabiyoogaa xalaalaappe aadhdhiyaabaa oottana bessees.

Hara maxaafaykka hegan deꞌiyaagaa beꞌay? Hegee Geeshsha Maxaafaa. Ha maxaafan deꞌiya taariketi ekettido sohuwaa Geeshsha Maxaafaappe neessi asi nabbabidee? Geeshshaa Maxaafay nuuni ubbay i koyiyo ogiyan Yihoowayyo oottidi, merinaa deꞌuwaa demmanau nuussi koshshiya ubbabaa yootees. Yaatiyo gishshau, nuuni Geeshsha Maxaafaa ubbatoo Xannaꞌiyoogaa meeze oottana koshshees.

SHin, Xoossaa Yihoowabaanne Yesuus Kiristtoosabaa tamaariyoogaa xallay gidenna. Etabaanne eti tamaarissidobaa loytti erikkonne, merinaa deꞌuwaa demmennan aggana danddayoos. Hara koshshiyaabi aybakko eray?

Nuuni tamaaridobaarakka moggotidi deꞌana koshshees. Asqqorootu Yihudaa hassayay? Yesuusi ba kiitettidaageeta ootti doorido 12tuppe i issuwaa. Yihuday Yihoowabaanne Yesuusabaa darobaa erees. SHin i waanidee? Guutta wodiyaappe guyyiyan bana siiqiya asa gidiis; yaatidi Yesuusa a morkketuyyo 30u biran aatti immiis. Yaatiyo gishshau, Yihuday merinaa deꞌuwaa demmenna.

Nuuni 69tta Taarikiyan abaa tamaarido bitaniyaa, Gehaaza hassayay? I babaa gidenna amarida mayuwaanne miishshaa amottiis. Hegaa gishshau, i hegaa demmanau worddotiis. SHin Yihooway a qaxxayiis. A higgiyau azazettennan ixxikko, i nunakka qaxxayana.

SHin ubbatoo ammanettidaageeta gididi, Yihoowassi oottida daro asati deꞌoosona. Nuuni eta mala gidanau koyoos; koyokkonii? Guutta Sameeli nuuni kaallana bessiya loꞌꞌo leemiso. Nuuni 55tta Taarikiyan beꞌidoogaadan, i Yihoowayyo a dunkkaaniyan oottiyoogaa doommiyo wode, assi layttay oydda woykko ichchasha xalla gidiyoogaa hassaya. Yaatiyo gishshau, neeni ay keena guutta naꞌa gidikkokka, Yihoowassi oottanau naatettay nena diggenna.

Nuuni ubbay kaallana koyiyo leemisoy Yesuus Kiristtoosa gidiyoogee qoncce. I naatettankka saluwan deꞌiya ba Aawaabaa haratussi yootiiddi, beeta maqidasiyan deꞌiyaagaa, 87tta Taarikiyan beꞌida. A leemisuwaa ane kaalloos. Nu Xoossaa wolqqaamaa, Yihoowabaanne a Naꞌaa, Yesuus Kiristtoosabaa nuuyyo danddayettidaagaa keena daro asaayyo yootoos. Nuuni hageeta oottikko, Xoossaa ooratta gannatiyan saꞌaa bolli merinau deꞌana danddayoos.