Ayyaana Alamiyaa Giddon Denddida Makkalaa
Seexaanay, shooshshan goꞌettidi Hewaano haasayissido wode, a Seexaanaa bagga gidada Xoossaa bolli makkalaasu
Yihooway ayyaana meretata medhdhido wode ubbaykka loꞌo. Guyyeppe issi kiitanchchay iita gidiis. I Seexaanaa Dablloosa. Seexaanay, saꞌan deꞌiya asay Yihoowaayyo goynniyoogaa aggidi baassi goynnanaadan koyiis. Hanidabay kaallidi deꞌiyagaadana:
Edene gannatiyaa giddon, maanau malꞌiya ayfe ayfiyaa daro mittay deꞌees. Yihooway Addaameenne a machchiya Hewaana he mittatu ayfiyaappe coo maanaadan yootiis. Shin gannte giddon Xoossay mooppite giido issi mittay deꞌees. Eti appe miikko, tumu hayqqiyoogaa yootiis.—Doomettaabaa 2:9, 16, 17.
Issi gallassi Hewaana barkka deꞌishin shooshshay o haasayssiis. O haasayssidaagee tumuppe shooshshaa gidenna; shooshshay haasayiyaaba malatanaadan oottaagee Seexaanaa Dablloosa. Seexaanay, Hewaana he mittaa ayfiyaappe miidaba gidiyaakko, a Xoossaadan aadhdhida eranchcha gidana danddayiyoogaadan yootiis. A hayqqana danddayenaagaakka yootiis. Ha naaꞌu odottikka worddo. Gidikkokka, Hewaana Seexaanaa ammanada mittaa ayfiyaappe maasu. Hegaappe guyyiyaan, Addaameyyo immin ikka miis.—Doomettaabaa 3:1-6.
Ha tumu taarikiyaappe, Seexaanay makkalanchchanne worddanchcha gidiyoogaa tamaaroos. Seexaanay, Hewaaniyyo Xoossaa azazetennaba gidikko, hayqqakka yaagidi yootiis. Hegee worddo. Akka hayqqaasu, Addaamakka gidin hayqqiis. Seexaanay nagaraa oottido gishshau he wode hayqqana xayikkokka, sinttappe hayqqanaagee attenna. Gidikkokka i xayana gallassay gakkanaashin, asaa naata balettiyoogaa aggenna. I hanno gakkanaukka worddanchcha, qassi asay Xoossaa higgiyaa menttana mala i oottennabi baawa.—Yohaannisa 8:44.
Hara Kiitanchchatikka Makkalidosona
Takkidi, hara kiitanchchati iita gididosona. Ha kiitanchchati saꞌan deꞌiya macca asay puulanchcha gidiyoogaa beꞌidi etaara asho gayttotetta polanau koyidosona. Hegaa gishshau saꞌaa yiidi attuma asa gididi ashuwaa maayidosona. Hegaappe simmidi he macca asata banttassi ekkidosona. Hagee Xoossaa halchchuwaara eqettiyaaba.—Doomettaabaa 6:1, 2; Yihudaa 6.
Iita kiitanchchati saꞌaa yiidi macca asaara shaaramuxidosona
Hagee asaa naatu bollikka daro metuwaa kaalettiis. Ha kiitanchchatu machchoti naata yelidosona, shin he naati asaa naatuppe dumma. Eti diccidi keehi wolqqaamanne gita, qassi makkalanchchanne meqetti baynnaageeta gididosona. Wurssettan biittay makkalan kummido gishshau Yihooway iita asata gita bashsha haattan xayssanau kuuyiis. He bashsha haattaappe attida asati xillo gidida Nohanne a so asaa xalaala.—Doomettaabaa 6:4, 11; 7:23.
SHin iita kiitanchchati, ayyaana alamiyau simmidi biidosonappe attin hayqqibookkona. Gidikkokka, qaxxayettidosona. Xoossaa yuushuwan deꞌiya xillo kiitanchchati deꞌiyoosa simmennaadan teqettidosona. Hegaa bollankka, Yihooway eti zaarettidi asadan ashuwaa maayennaadan digiis. Qassikka wurssettan eti gita pirddan hayqqidi xayana.—2 PHeexiroosa 2:4; Yihudaa 6.
Seexaanay Saluwaappe Goodettiis
Seexaanaynne a iita kiitanchchati saluwaappe goodettidosona
Saluwan olay, 1914M.Ln denddiis. Geeshsha Maxaafan Ajjuutaa maxaafay he wode aybi hanidaakko odees: “Hegaappe guyyiyan, saluwan olai denddiis. Mikaa7eeli [hayquwaappe denddida Yesuus Kiristtoosi] ba [xillo] kiitanchchatuura issippe miimminttiyaara [Seexaanaara] olettiis; miimmintteekka ba [iita] kiitanchchatuura gididi, zaarettidi olettiis. SHin miimminttee xoonettiis. Xoonettin miimminttiyaassinne a kiitanchchatussi saluwan sohoi xayiis. Gita miimminttee, xalahe halaqaa woikko Seexaanaa giyoogee, beni shooshshai, sa7a ubbaa balettiyaagee olettiis; i ba kiitanchchatuura issippe duge sa7au olettiis.”
Wurssettan aybi hanidee? Qonccissoy hagaatuwaa gees: “Hegaa gishshau, saluwaunne salo giddon de7iyaageetoo, ufaittite.” Xillo kiitanchchati ufayttana danddayoosona; aybissi giikko, Seexaanaynne iita kiitanchchati woykko iita ayyaanati hegaappe guyyiyaan saluwan deꞌokkona. Saꞌan deꞌiya asaayyo shin? Geeshsha Maxaafay: “sa7aunne abbau aayye7ana! Aissi giikko, xalahe halaqai baayyo guutta wodee attidoogaa eriyo gishshau, wolqqaama hanqquwaara duge inttekko wodhdhiis” yaagees.—Ajj. 12:7-9, 12.
Ee, Seexaanaynne a kaalliya iita yameti saꞌan deꞌiya asaa balettoosonanne aayyeꞌana giissiya wolqqaamabaa oottiiddi deꞌoosona. Ha iita kiitanchchati daydanttata woykko xalaheta geeteti xeegettoosona. Eti Xoossaa morkketa. Eti ubbaykka iita.