SHaahuwaa 1

Xoossay Tumuppe Nuussi Qoppii?

1, 2. Asay Xoossaa xeelliyaagan ay oyshaa oychchii? Aybissii?

NTTE deꞌo layttan issi wode, ‘Nuussi tumuppe qoppiya Xoossi deꞌikko, keehi daro tuggaa ayssi coꞌꞌu giidi xeellii?’ giidi oychchennan aggekketa. Nuuni ubbaykka tuggaa beꞌida woykko tuggatida ura eroos.

² Tumakka, taarike wode ubban asay olaappe, meqetti baynna hanotaappe, danuwaappe, pirddaa pacaappe, naamisaappe, harggiyaappenne siiqiyo asa hayquwaappe denddidaagan metuwan tuggattiiddinne wazanan seelettiiddi deꞌiis. Laatamantta xeetu layttatu xalaalan, 100 miilooniyaappe dariya asay olan hayqqiis. Xeetu miilooniyan qodettiya haraati, asatettan qohettidosona woykko bantta keettaanne aquwaa xayidosona. Nu wodiyan gakkida ay wodiyaagaappenne dariya yashshiyaabati, qoodi baynna asay keehippe azzananaadan, keehi afuxxanaadaaninne hidootaa xayanaadan oottidosona.

3, 4. Xoossay tuggay deꞌishin coꞌꞌu giidi xeelliyoogau darotussi aybi siyettii?

³ Issoti issoti keehippe camettidi, Xoossi deꞌiyaaba gidikkokka, tumuppe nuussi qoppenna yaagidi qoppoosona. Woy ubba Xoossay baawa yaagidi qoppana danddayoosona. Leemisuwau, 1^ro Alamiyaa Olan a laggetinne a soo asay hayqqanaadan zariyaa dummatettaa ixoy gaaso gididonne akka tuggayido issi bitanee: “Nuuni a koyido wode Xoossay awa biidee?” yaagidi oychchiis. Naazeti 2^ntto Alamiyaa Olan, miilooniyan qoodettiyaageeta worishin attida issi bitanee, i beꞌido tuggay keehi a azzanttido gishshau: “Intte ta wozanaa laacci beꞌana danddayiyaakko, inttena marzze marzze gaana” yaagiis.

⁴ Yaatiyo gishshau, daro asay keha gidida Xoossay iitabay deꞌishin aybissi coꞌꞌu giidi xeelliyaakko akeekanau metootoosona. I nuussi tumuppe qoppiyoogaa woykko i deꞌiyoogaakka siroosona. Etappe dariyaageeti asi deꞌido keena ubban, tuggay aara ubbatoo deꞌiyaabadan qoppoosona.

[Sinttaa 2, 3n Deꞌiya Misiliyaa]

Tuggay baynna ooratta alamee matattidee?