SHEMPPO HOSPPUNAA
Ne Soo Asaa Qohiyaabaappe Naaga
1-3. (a) So asaa qohiya, hirggissiyaabay awuppe gakkii? (b) Yelidaageeti so asaa naaganau oottana koshshiyo bessiyaabay aybee?
NE NAꞌAA timirtte keetti yeddana hanaasa; shin iray bukkees. Yaatin, neeni oottanabay aybee? Ne naꞌaa iraappe ashshiyaabaa mayzzennan coo yeddayiiyye, woy deexxidi hemetaa diggiya, iraappe ashshiya daro maayuwaa mayzzay? Neeni he naaꞌꞌaakka oottennaagee qoncce. Naꞌay iraappe attanau maaddiyaaba xalla immaasa.
2 Hegaara issi mala ogiyan, daro sohuwaappe, giishin wodiyaa aattiyoobaappe, gaazeexaappe, eraadooniyaappenne televizhiiniyaa malabatuppe, laggetuppenne ubba qassi timirtte keettaappe iraadan bukkiya, qohiyaabaappe yelidaageeti so asaa naaganau maaddiya ogiyaa koyana koshshees. Yelidaageetuppe issoti issoti so asaa naaganau oottiyoobi he keena woy mule aybanne oottokkona. Harati qassi, darobaa qohiyaabadan xeelliyo gishshau, naati xibbuwan tuccido eceriyaadan hanana gakkanaassi eta biyoosaa yiyoosaa diggoosona. Hegaara gayttidaagan bessiyaabaa oottana danddayettii?
3 Ee, danddayettees. Bessiyaagaappe aarobaa oottiyoogee maaddenna; qassi qohana danddayees. (Eranchchaa 7:16, 17) SHin Kiristtaane aawaynne aayyiyaa so asaa bessiyaagaadan waatidi naagana danddayiyoonaa? Hegaadan oottiyo heezzu ginata ane beꞌoos: timirttiyaa, laggetanne wodiyaa aattiyoobaa.
NE NAATA TAMAARISSIYAY OONEE?
4. Yelida Kiristtaaneti timirttiyaa ayba ogiyan xeellana koshshii?
4 Yelida Kiristtaaneti timirttiyaa xoqqu oottidi xeelloosona. Naati nabbabanau, xaafanaunne bantta qofaa loyttidi qonccissanau, qassi gakkiya metuwaa giigissanau, timirttee maaddiyoogaa yelidaageeti eroosona. Eti issibaa waatidi tamaarana danddayiyaakkokka akeekanau timirttee maaddees. Ha wodiyan alamiyan metiyaabay deꞌikkokka, timirtte keettan demmiyo eray naati hegaa xoonidi kiyaanaadan maaddana danddayees. Hegaa bollikka, loꞌꞌo timirttee eti qara oosancha gidanaadan maaddana danddayees.—Leemiso 22:29.
5, 6. Naati timirtte keettan bessenna ogiyan asho gaytotettaabaa waatidi tamaarana danddayiyoonaa?
5 SHin, naati timirtte keettan suure xeelay baynna hara daro naatuura gayttoosona. Leemisuwau, asho gaytotettaanne kandduwaa xeelliyaagan etau deꞌiya xeelaa qoppa. Nayjeeriyaa biittan naaꞌꞌantto xekka timirtte keettan tamaariya, daro asaara asho gaytotettaa poliya naꞌiyaa asho gaytotettaa xeelliyaagan ba laggeta issi issibaa zorawusu. A pornograafe maxeetiyaappe demmido pattennabaa yootiyaaba gidikkokka, naati hegaa ufayttidi siyidosona. Macca naatuppe amaridaageeti a zoridoogaadan oottidosona. Hegaappe denddidaagan, issi naꞌiyaa azinaa gelennan shahaarada hegaa kessanau malaydda hayqqaasu.
6 Naati timirtte keettan asho gaytotettaa xeelliyaagan issi issi balabaa siyiyoy naatuppe gidennan, asttamaaretuppe gidiyoogee azzanttees. Timirtte keettati asho gaytotettaabaa tamaarissiyo wode, kandduwaanne aawatettaa xeelliyaagan naata aybanne tamaarissenna gishshau, daro aawatinne aayeti keehi hirggoosona. Issi 12 laytta naꞌee aayyiyaa, “Nuuni haymaanootiyaanne wogaa mintti kaalliya heeran deꞌoos; shin nu heeran deꞌiya naaꞌꞌantto xekka timirtte keettan naatuyyo konddomiyaa immoosona!” yaagaasu. He naꞌee laggeti asho gaytotettaa banttanaara polana mala o oychiyoogaa i aawaynne aayyiyaa siyido wode keehi hirggidosona. Yelidaageeti so asaa qohiya hegaa mala hanotaappe waatidi naagana danddayiyoonaa?
7. Naati asho gaytotettaabaa bessenna ogiyan tamaarenna mala waatiyoogee loꞌꞌoo?
7 Naata naaganau giidi asho gaytotettaabaa aybanne yootennaagee loꞌꞌoo? Loꞌꞌo gidenna. Ne naata asho gaytotettaabaa neeni tamaarissiyoogee loꞌꞌo. (Leemiso 5:1) Awurooppaaninne Huuphessa Amarkkan issi issi heeran deꞌiya aawatinne aayeti asho gaytotettaabaa mule denttennaagee tuma. Hegaadan, Afirkkan issi issi biittan deꞌiya aawatinne aayeti asho gaytotettaabaa bantta naatuura darotoo haasayokkona. Seeraaliyoone biittan deꞌiya issi aaway, “Hegaadan oottiyoogee Afirkka biittaa woga gidenna” yaagiis. Issi issi aawatinne aayeti, naata asho gaytotettaabaa tamaarissiyoogee eti shori baynnabaa hananaadan oottees giidi qoppoosona. SHin Xoossaa xeelay aybee?
ASHO GAYTOTETTAA XEELLIYAAGAN XOOSSAA QOFAA
8, 9. Asho gaytotettaa xeelliyaagan Geeshsha Maxaafan ayba loꞌꞌo qofay deꞌii?
8 Asho gaytotettaabaa bessiya ogiyan denttidi haasayiyoogee yeellayiyaaba gidennaagaa Geeshsha Maxaafay qoncciyan yootees. Israaꞌeela biittan, Muuse Higgiyaa xoqqu oottidi nabbabiyo wode, siyana mala ‘naata’ gujjin, Xoossaa asay shiiqana mala etau odettiis. (Zaarettido Wogaa 31:10-12; Yaasa 8:35) Kushe qitaa, attumatettaappe goggiya zerettaa, shaaramuxiyoogaa, wodiraa laammiyoogaa, attuma asay attuma asaara, qassi macca asay macca asaara, dabbuwaaranne mehiyaara asho gaytotettaa poliyoogaa xeelliyaagan Higgee darobaa qoncciyan yootees. (Wogaabaa 15:16, 19; 18:6, 22, 23; Zaarettido Wogaa 22:22) Hegaa malabay nabbabetti simmin, eranau oychiya yelagatussi aaway woy aayyiyaa darobaa qonccissana koshshiyoogee erettidaagaa.
9 Leemiso maxaafan ichashantta, usuppunttanne laappuntta shemppuwan, bessenna asho gaytotettaa poliyoogee kaalettiyo metuwaa xeelliyaagan siiqiya aaway zoriyo zoree deꞌees. SHori baynna kanddoy issi issitoo paacciyaaba gidana danddayiyoogaa ha xiqiseti bessoosona. (Leemiso 5:3; 6:24, 25; 7:14-21) SHin shori baynna kanddoy iita gidiyoogaanne keehi qohettanaadan oottiyoogaa, qassi yelagati shori baynna kandduwaappe haakkanaadan maaddiya kaaletuwaa ha xiqiseti qonccissoosona. (Leemiso 5:1-14, 21-23; 6:27-35; 7:22-27) Hegaa bollikka, shori baynna kanddoy, aqo oyqqidaageeti bessiya ogiyan poliyo asho gaytotettan ufayttiyo hanotaappe dumma gidiyoogaakka qonccissees. (Leemiso 5:15-20) Hagee yelidaageeti tamaarissiyo wode kaallana bessiyo loꞌꞌo leemiso!
10. Asho gaytotettaara gayttidaagan naatussi Xoossaagaa mala xeelay deꞌanaadan tamaarissiyoogee eti shori baynnabaa hananaadan minttettenna giyoy aybissee?
10 Hegaa mala timirttee naati shori baynnabaa hananaadan oottii? Hegaappe dumma ogiyan, Geeshsha Maxaafay, “Xilloti eran kessi ekkoosona” yaagees. (Leemiso 11:9) Ha alamiyan deꞌiya qohiyaabaappe ne naati kessi ekkanaadan koyikkii? Issi aaway hagaadan giis: “Nu naatussi naatettaappe doommidi, asho gaytotettaara gayttidabaa aynne qottennan yootanau baaxetida. Hegaa gishshau, hara naati asho gaytotettaabaa yootiyo wode, siyanau yeemottokkona. Hegee xuura yoho gidenna.”
11. Dumma gidida bollaa qommotuura gayttidaagan, wodiyaappe wodiyan naata waatidi tamaarissana danddayettii?
11 Hagaappe kasetiya shemppotun akeekidoogaadan, asho gaytotettaabaa naatettaappe doommidi tamaarissana koshshees. Guutta naata bollaa qommuwaa sunttaa tamaarissiyo wode, yeellayiyaabadan qoppada, eta attumatettaa woy eta maccatettaa sunttaa yootennan aggoppa. Naati dicciyo wode, eta kalluwaa asi beꞌana koshshennaagaa tamaarissiyoogee bessiyaaba. He bollaa qommoti keehi dumma gidiyoogaa, hara asi bochana woy beꞌana koshshennaagaanne bessenna ogiyan hegeetubaa haasayana bessennaagaa aawaynne aayyiyaa naata tamaarissiyoogee loꞌꞌo. Naati gitatiyo wode, issi maccaasiyaa waana shahaariyaakko etau yootana koshshees. Wodalla woy geelꞌo gidiyo wode, eta dichaara gayttidaagan gakkana danddayiya issi issi oorattabaa naati kasetidi erana bessees. SHemppo 5n qonccidaagaadan, hegaadan tamaarissiyoogee hara asi eta cimmidi asho gaytotettaa polennaadan naata teqqanau maaddana danddayees.—Leemiso 2:10-14.
YELIDAAGEETI OOTTANA BESSIYAABAA
12. Naati timirtte keettan darotoo tamaariyo bala gidida qofay aybee?
12 Naati timirtte keettan tamaarana danddayiyo worddo qofaa, giishin lodda laamiyaa, yelettido biittaa siiqiyoogaa woy muleera tuma gididabi baawa giyo qofaanne alamiyaa era gidida harabaa eqettanau yelidaageeti giigi uttidaageeta gidana koshshees. (1 Qoronttoosa 3:19; Doomettaabaa 1:27ra, Wogaabaa 26:1ranne Yohaannisa 4:24; 17:17ra gatta xeella.) Timirtte keettan suntta gidida daro ashkke asati naati gujo timirttiyaa tamaaranaadan keehippe minttettoosona. Gujo timirttiyaa tamaariyoogee issi asi ba huuphe kuuyana bessiyaaba gidikkonne, ooninne giiga deꞌuwaa deꞌanau hegaadan oottiyoogee keehi koshshees giidi issi issi asttamaareti yootoosona.a—Mazamure 146:3-6.
13. Tamaariya naata bala qofaappe naagana danddayiyoy ayba ogiyaanee?
13 Yelidaageeti bala gidida timirttiyaa eqettanau, eta naati ay tamaariiddi deꞌiyaakko erana koshshees. Yaatiyo gishshau, yelidaageetoo, inttekka oottana bessiyaabay deꞌiyoogaa hassayite! Intte naati tamaariyoobaa wozanappe eranau koyite. Timirtte keettaappe yi simmin etaara haasayite. Eti ay tamaariiddi deꞌiyaakko, eti keehippe dosiyoobay aybakko, qassi eta keehi metiyaabay aybakko oychite. Tamaare naatussi son oottanaadan imettida oosuwaa, eta dawutaraanne paaciyaa woraqataa xeellite. Eta asttamaaretuura erettite. Asttamaaretu oosuwaa nashshiyoogaanne intteyyo danddayettida keena ubban maaddanau koyiyoogaa asttamaaretuyyo yootite.
NE NAATU LAGGETA
14. Xoossaa ufayssanau koyiya naati loꞌꞌo laggeta dooriyoogee keehi koshshiyaaba gidiyoy aybissee?
14 “Qassi hagaa awuppe tamaaradii?” Bessennabaa bantta naati haasayiyo woy oottiyo wode dagammidi, hegaadan oychiya yelidaageeti ay keenee? He oyshaa zaaroy darotoo timirtte keettan deꞌiya ooratta laggetuura woy shooron deꞌiya laggetuura gayttidaba gidennee? Yelagatakka gasttatakka laggeti moorana danddayiyoogee tuma. Kiitettida PHauloosi, “Cimettoppite; iita laggetettai lo77o hanotettaa moorees” yaagidi zoriis. (1 Qoronttoosa 15:33; Leemiso 13:20) Yelagatu eeshshay moorettanaadan laggeti oottana danddayoosona. Eti banttanan ammanettennaageeta gidana danddayoosona; qassi laggeta ufayssiyoogee eta issi issitoo keehi qofissana danddayees. Yaatiyo gishshau, eti loꞌꞌo laggeta dooriyoogee keehippe koshshiyaaba!
15. Naati laggeta dooranaadan yelidaageeti waati maaddana danddayiyoonaa?
15 Ubba aawatinne aayeti eriyoogaadan, naati loꞌꞌo dooruwaa dooriyoy ubba wode gidenna; etau issi issi kaaletuwaa koshshees. Hegee, yelidaageeti etau laggeta doorana koshshees giyoogaa gidenna. SHin, eti dicci dicci biyo wode, akeekancha gidanaadan tamaarissite; qassi laggetu eeshshatuppe xoqqu oottidi xeellana koshshiyoy awugeetakko akeekanaadan maaddite. Eti akeekana koshshiyo waanna eeshshay, Yihoowa siiqiyoogaanne a xeelan suure gididabaa oottiyoogaa. (Marqqoosa 12:28-30) Ammanettiyaageeta, kehiyaageeta, loꞌꞌo eeshshay deꞌiyoogeetanne minnidi oottiyaageeta siiqanaadaaninne bonchanaadan eta tamaarissa. So asaa goynuwaa wode, hegaa mala eeshshay deꞌiyo, Geeshsha Maxaafan odettida asata naati akeekanaadan maadda; qassi gubaaꞌiyan hegaa mala eeshshay deꞌiyoogeeta akeekanaadan maadda. Ne laggetakka hegaa mala ogiyan dooriyoogan leemiso gida.
16. Yelidaageeti bantta naati laggeta dooriyo ogiyaa waati kaallana danddayiyoonaa?
16 Ne naatu laggeti oonakko eray? Ne naatu laggeta loytta eranau, ne naati eta soo ehaana mala ayssi yootikkii? He laggeta hara naati ayba ogiyan xeelliyaakkokka ne naata oychana danddayaasa. Eti suure deꞌiyoogan erettiyaageeteeyye woy naaꞌꞌu qommo deꞌuwaa deꞌiyoogan erettiyaageetee? Eti naaꞌꞌu qommo deꞌuwaa deꞌiyaageeta gidikko, hegaa mala naatuura laggetiyoogee qohana danddayiyoogaa ne naati akeekanaadan maadda. (Mazamure 26:4, 5, 9-12) Ne naatu eeshshay, maayoy, xeelay woy haasayay kaseegaappe moorettidaba gidikko, eta laggeti oonakko oychiyoogee koshshana danddayees. Ne naati bantta eeshshay moorettanaadan oottiya laggetuura wodiyaa aattennan waayi aggana.—Doomettaabaa 34:1, 2ra gatta xeella.
17, 18. Yelidaageeti bantta naati iita laggetuppe haakkanaadan zoriyoogaa bolli waati maaddana danddayiyoonaa?
17 SHin ne naati iita laggetuppe haakkanaadan tamaarissiyoogaa xallay gidenna. Eti loꞌꞌo laggeta dooranaadan maadda. Issi aaway hagaadan giis: “Nuuni ubbatoo eti iita laggeta aggidi loꞌꞌo laggeta dooranaadan maaddoos. Hegaa gishshau, nu naꞌay timirtte keettan kuwaasiyaa kaaꞌanaadan doorettido wode, hegee i yan ooratta laggetuura gayttanaadan oottiyo gishshau, loꞌꞌo gidennaagaa taaninne ta keettaayiyaa aara haasayida. Yaatidi, gubaaꞌiyan deꞌiya amarida naatuura kuwaasiyaa kaaꞌiyoosaa biidi kaaꞌanau qofaa qachida. Hegaadan oottidi metuwaa giigissida.”
18 Erancha gidida aawaynne aayyiyaa bantta naati loꞌꞌo laggeta dooranaadan maaddoosona; qassi etaara loꞌꞌoban wodiyaa aattiyoogan ufayttoosona. SHin yelida darotuyyo wodiyaa aattiyoobaara gayttidabay metiyaagaa gidana danddayees.
ALLAXXIYOOBAY AY MALA GIDANA BESSII?
19. So asay kaaꞌiyoogee nagara gidennaagaa bessiya Geeshsha Maxaafaa leemisoti awugeetee?
19 Geeshsha Maxaafay kaaꞌiyoogaa diggii? Diggenna! Geeshsha Maxaafay, “Miiccanaukka wodee de7ees. . . . Qassi ufaittidi yexxanaukka wodee de7ees” yaagees.b (Eranchchaa 3:4) Beni Israaꞌeelan Xoossaa asay yettan, durssan, kaassaaninne qanꞌꞌishiyaa kaaꞌiyoogan ufayttees. Yesuus Kiristtoosi bullachaa biis; qassi Maatiyoosa giyo Leewi “daro imatuwaa” makkidi ba son a mokkiis. (Luqaasa 5:29; Yohaannisa 2:1, 2) Yesuusi ufayttiyoogaa diggibeennaagee qoncce. Miichaanne kaassaa ne soo asay nagaradan mule xeellana bessenna!
Issippe nabbabiyoogaa mala, loytti dooridi allaxxiyoobay naati tamaaranaadaaninne ayyaanaaban diccanaadan maaddana danddayees
20. Yelidaageeti so asau wodiyaa aattiyoobaa giigissiyo wode ay hassayana koshshii?
20 Yihooway “ufayttiya Xoossaa.” (1 Ximootiyoosa 1:11, NW) Hegaa gishshau, Yihoowayyo goynniyoogee keehippe ufayssiyaaba gidana koshsheesippe attin, ufayttennaadan oottiyaaba gidana koshshenna. (Zaarettido Wogaa 16:15ra gatta xeella.) Naati kaaꞌiyoogaaninne wodiyaa aattiyoogan ufayttoosona; etau hegaadan oottiyo wolqqay deꞌees. Loytti dooridi allaxxiyoobay kaassa xalla gidenna. Hegee, issi naꞌi akeekanaadaaninne gastta gidanaadan oottiya oge. Wodiyaa aattiyoobaa gujjin, ba soo asau koshshiya ubbabaa kunttiyo aawatettay keettaawaagaa. SHin, akeekancha gidana bessees.
21. Wodiyaa aattiyoobaara gayttidaagan ha wodiyan, qohiyaabi aybi deꞌii?
21 Geeshsha Maxaafay kasetidi yootidoogaadan, ha wayssiya “wurssetta gallassi . . . Xoossaappe aattidi, ufaittiyoobaa” dosiya asay kumiis. (2 Ximootiyoosa 3:1-5) Darotuyyo, eta deꞌuwan keehi gitabay wodiyaa aattiyoobaa. Keehippe koshshiyaabaa oottennaadan diggana danddayiya, wodiyaa aattiyo keehi darobay deꞌees. Hegaa bolli, ha wodiyan wodiyaa aattiyoobaappe daro baggay shori baynna asho gaytotettaa, makkalabaa, jallissiya xaliyaa bessenna ogiyan goꞌettiyoogaanne qohiya hara iitabata bessiyaagaa. (Leemiso 3:31) Wodiyaa aattiyo qohiyaabaappe yelaga naata naaganau ay oottana danddayettii?
22. Yelidaageeti bantta naati wodiyaa aattiyoobaa eratettan dooranaadan waatidi loohissana danddayiyoonaa?
22 Hegaara gayttidaagan yelidaageeti dambbiyaa kessana koshshees. SHin hegaappekka aaruwan, wodiyaa aattiyoobaappe awugee iitakko, qassi allaxxiyoogee bessiyaagaappe aadhiis giyoy awudekko, naati eranaadan yelidaageeti tamaarissana koshshees. Hegaadan loohissiyoogee wode ekkiyaabanne baaxeyiyaaba. Ane issi leemisuwaa beꞌa. Naaꞌꞌu naati deꞌiyo issi aaway, bayra naꞌay eraadooniyan issi ooratta xaabiyaa darotoo ezggiyoogaa akeekiis. Hegaa gishshau, aaway ooso keetti kaamiyaa laaggidi biiddi, he xaabiyaa dooyiis. I issi issitoo kaamiyaa essidi, yettatu danttuwaappe amaridaagaa xaafiis. Hegaappe simmidi, siyidobaa ba naatuura haasayiis. Naati bantta qofaa yootanaadan, “Intte qofay aybee?” gi oychidi, eti yootiyoobaa danddayan ezggiis. Hegaara gayttidabaa Geeshsha Maxaafaa goꞌettiyoogan haasayi simmin, naati he xaabiyaa siyiyoogaa agganau maayidosona.
23. Yelidaageeti bantta naata wodiyaa aattiyo iitabaappe waatidi naagana danddayiyoonaa?
23 Erancha gidida Kiristtaane aawatinne aayeti bantta naati dosiyo muuziqaa, televizhiine prograamiyaa, biiduwaa, asaa miichanau giigissiyo maxaafata, biiduwaa kaassaanne pilimeta kaalloosona. Bollaara deꞌiya misiliyaa, danttuwaa, siidiyaa malabaa yeggiyoogaa bolli xaafettidabaa beꞌoosona; hegaa xeelliyaagan gaazeexan kiyidabaa nabbaboosona; qassi hegaara gayttidaagan qantta qonccissuwaa beꞌoosona. Ha wodiyan naatussi giigissiyo, wodiyaa aattiyooba giyo issi issibaa beꞌiyo wode daroti dagammoosona. Bantta naata qohiyaabaappe naagana koyiyaageeti soo asaara hegaabaa tobboosona; hegaadan oottanau Geeshsha Maxaafaanne a amppidi giigissiyo, Yelagati Oychiyo Oyshaa—Oosuwan Peꞌiya Zaaruwaa giya maxaafaa, Wochiyo Keelaanne Beegottite! maxeetiyaa mala xuufetun kiyiya huuphe yohota goꞌettoosona.c Yelidaageeti mino dambbiyaa kessidi, bantta qofaa laammennaageetanne bessiyaagaadan haniyaageeta gidiyo wode, darotoo loꞌꞌo ayfiyaa demmoosona.—Maatiyoosa 5:37; Piliphphisiyuusa 4:5.
24, 25. So asay ufayssiya hanotan wodiyaa aattana danddayiyo issi issibay aybee?
24 Wodiyaa aattiyo qohiyaabaappe naagettanaadan oottiyoogaa xallay gidenna. He qohiyaabaa qohennaban laammana koshshees; yaatana xayikko naati bala ogiyaa kaallana danddayoosona. Daro Kiristtaane keettaa asay, qanꞌꞌishiyaanne saddiqaa kaaꞌiyoogan, haysiyaa yootiyoogan, dabbota woy laggeta issippe biidi oychiyoogan ufayssiya hanotan issippe wodiyaa aattidoogaa hassayoosona. Issoti issoti wodiyaa aattanau cenggurssaa xoqqu oottidi nabbabiyoogan keehippe ufayttoosona. Harati naaciyoogan woy ufayssiya taarikiyaa yootiyoogan wodiyaa aattoosona. Harati qassi banttana ufayssiyaabaa issippe oottoosona; leemisuwau, arssaanne wombbaraa malabaa waaxoosona, harabaa oottiyo hiillan issippe oottoosona, qassi yettaa yexxoosona, misiliyaa medhoosona woy Xoossay medhidobaa xannaꞌoosona. Hegaa malaban wodiyaa aattiya naati iitaban wodiyaa aattiyoogaappe naagettoosona; qassi wodiyaa aattiyoobaa giyoobay aybanne oottennan coo allaxxiyoogaa gidennaagaa akeekoosona. Issibaa oottiyoogee coo xeelliyoogaappe aaruwan ufayssees.
25 Hara daro asaara issippe kaaꞌiyoogeekka wodiyaa aattiyo, keehi ufayssiyaaba gidana danddayees. Hegaa loyttidi kaallikko, qassi hegee daridi wodiyaa wurssennaba gidikko, ne naati ufayttiyoogaappekka aadhiyaabaa tamaaranaadan oottana danddayees. Hegee gubaaꞌiyan deꞌiyaageeti kaseegaappe aaruwan siiqettanaadan maaddana danddayees.—Luqaasa 14:13, 14ranne Yihudaa 12ra gatta xeella.
NE SOO ASAY ALAMIYAA XOONANA DANDDAYEES
26. So asaa qohiyaabaappe naagiyoogaara gayttidaagan keehippe koshshiya eeshshay awugee?
26 Ne soo asaa ha alamiyan deꞌiya qohiyaabaappe naagiyoogee baaxeyiyaaba gidiyoogee sirissenna. SHin so asaa qohuwaappe naaganau ubbabaappe aaruwan maaddiya issibay deꞌees. Hegee siiquwaa! So asay issoy issuwaara keehi siiqettiyoogee ne keettay woppu giidi shemppiyo soho gidanaadaaninne issoy issuwaara loꞌꞌo hanotan haasayanaadan oottees; hegee qassi so asaa qohiyaabaappe naaganau keehippe maaddees. Hegaa bolli qassi, Yihoowa siiqiyoogee ubbabaappe aaruwan keehi koshshiyaaba. So asay Yihoowa siiqiyaagaa gidiyo wode, naati alamiyan deꞌiya qohiyaabaappe haakkiyoogan Xoossaa ufayssennabaa ixxiyaageeta gididi diccana danddayoosona. Yihoowa wozanappe siiqiya aawaynne aayyiyaa, i siiqiyaagaa, bessiyaagaadan haniyaagaanne loꞌꞌo eeshshay deꞌiyoogaa gidiyo gishshau, a leemisuwaa kaallanau koyoosona. (Efisoona 5:1; Yaaqooba 3:17) Yelidaageeti hegaadan oottiyaaba gidikko, naati Yihoowayyo goynniyoogaa higgee daridobadan woy kaaꞌiyoogaanne miicciyoogaa diggiyaabadan xeellidi, appe baqatanau koyiyo gaasoy deꞌenna. Hegaappe dumma hanotan, Xoossaayyo goynniyoogee ufayssaanne woppaa demmiyo deꞌo oge gidiyoogaa eti akeekana danddayoosona.
27. So asay alamiyaa xoonana danddayiyoy ayba ogiyaanee?
27 Bessiyaanne ufayssiya oosuwaa Xoossaayyo oottiya, issippetettay deꞌiyo so asati ha alamee gattiyo qohiyaabaappe naagettidinne “pokkoinne boree bainnaageeta gididi,” deꞌanau wozanappe baaxetiyoogee Yihoowa keehippe ufayssees. (2 PHeexiroosa 3:14; Leemiso 27:11) Hegaa mala so asay, Seexaanaa alamee a mooranau oottido ubbabaa eqettida Yesuus Kiristtoosa leemisuwaa kaallees. Saꞌan deꞌido wurssetta heeran, Yesuusi, “Taani sa7aa xoonaas” yaagiis. (Yohaannisa 16:33) Ne soo asaykka alamiyaa xoonidi merinau deꞌanaadan amottoos!
a Gujo timirttiyaa xeelliyaagan aaho qofaa demmanau, Yihoowa Markkati attamissido, Yihoowa Markkatanne Timirttiyaa giya brooshuriyaa sinttaa 4-7 xeella.
b Ha sohuwan “miicciyoogaa” geetettida Ibraysxxe qaalay, “kaaꞌiyoogaa,” “ufayttanaadan oottiyoogaa,” “gibiraa kessiyoogaa,” woy “ufayssiyaabaa oottiyoogaa” geetettidi hara ogiyankka birshshettana danddayees.
c Yihoowa Markkati attamissidoogeeta.