Tumu Haymaanootiyaa SHaakki Eriyo Ogiyaa

Xoossaa dabbo gidanau koyikko, Xoossay nashshiyo haymaanootiyan simerettanau koshshees. Yesuusi “tumaappe goinniyaageeti” Xoossau ‘tumaara’ moggottiya ogiyan goynniyoogaa yootiis. (Yohaannisa 4:23, 24) Xoossaayyo goynniyo issi tumu oge xallay deꞌees. (Efisoona 4:4-6) Tumu haymaanootee merinaa deꞌuwau kaalettees; worddo haymaanootee qassi bashshau kaalettees.—Maatiyoosa 7:13, 14.

A giddon simerettiya asaa xeelliyoogan, tumu haymaanootiyaa akeekana danddayaasa. Yihooway loꞌꞌo gidiyo gishshau, ayyo tumuppe goynniyaageetikka loꞌꞌo asa gidana koshshees. Loꞌꞌo burttukkaaniyaa mittay loꞌꞌo burttukkaniyaa ayfiyoogaadan, tumu hayimaanoteekka loꞌꞌo asaa ayifees.—Maatiyoosa 7:15-20.

Yihoowa dabboti Geeshsha Maxaafaa keehippe bonchchoosona. Geeshsha Maxaafay Xoossaappe yiidoogaa eroosona. Geeshsha Maxaafay yootiyoobay eta deꞌuwan eta kaalettanaadan, gayttiya metuwaa kiyanau maaddanaadaaninne Xoossaabaa tamaaranau maaddanaadan oottooson. (2 Ximootiyoosa 3:16) Eti sabbakkiiddi deꞌiyoobata oosuwan peeshshanau baaxetoosona.

Yihoowa dabboti issoy issuwaara siiqettoosona. Yesuusi Xoossaabaa tamaarissiyoogaaninne harggidaageeta pattiyoogan asaa siiqiyoogaa bessiis. Tumu haymaanootiyan simerettiyaageetikka haraata siiqiyoogaa bessoosona. Yesuusaagaadan, etikka hiyyeesa woy banttappe dumma sheeshsha gidida asaa karokkona. Yesuusi bana kaalliyaageeta issoy issuwau bessiyo siiquwan asay eranaagaa yootiis.—Yohaannisa 13:35.

Xoossaa dabboti, Yihoowa geetettiya Xoossaa sunttaa bonchchoosona. Issi asi nena ne sunttan xeeganau koyennaba gidikko, he asi neessi mata dabbo gidana danddayii? CHii! Nuussi mata dabbo asi deꞌikko, a a sunttan xeegoosinne abaa loꞌꞌobaa haratuyyo yootoos. Hegaa gishshau Xoossaa dabbo gidana koyiyaageeti a sunttaa goꞌettanaunne abaa hara asaayyo yootana koshshees. Yihooway nuuni hegaadan oottanaadan koyees.—Maatiyoosa 6:9; Roome 10:13, 14.

Yesuusaagaadan, Xoossaa dabboti asaa Xoossaa Kawotettaabaa tamaarissoosona. Xoossaa Kawotettay saꞌaa gannatiyau laammiya saluwaa ayso. Xoossaa dabboti Xoossaa Kawotettaabaa, ha mishsraachchuwaa, haratuyyo yootoosona.—Maatiyoosa 24:14.

Yihoowa Markkati Xoossaa dabbo gidanau baaxetoosona. Geeshsha Maxaafaa bonchchoosonanne issoy issuwaara siiqettoosona. Xoossaa sunttaakka goꞌettoosonanne bonchchoosona; qassi Xoossaa Kawotettaabaakka hara asaa tamaarissoosona. Ha wodiyan saꞌaa bolli tumu haymaanootiyan simerettiyaageeti Yihoowa Markkata.