Yesuusi Daydanttatuppe Keehi Wolqqaama

XOOSSAA kiitanchchatuppe issoy Seexaanaa Dabloosa ayssi gididaakko hassayay?— I goynuwaa baassi ekkanawu koyidoogee, I Xoossaa bolli makkalanaadan oottiis. Hara kiitanchchatikka Seexaanaa kaallidonaa?— Ee kaallidosona. Geeshsha Maxaafay eta Seexaanaa kiitanchchata woykko daydanttata yaagees.—Ajjuutaa 12:9.

Ha iita kiitanchchati woy daydanttati Xoossaa ammaniyoonaa?—Geeshsha Maxaafay daydanttati ‘Xoossay deꞌiyoogaa ammanoosona’ yaagees. (Yaaqooba 2:19) SHin ha wodiyan eti yayyoosona. Eti ayssi yayyiyoonaa? Eti oottido iitabaa gishshawu Xoossay banttana qaxxayanaagaa eriyo gishshawu yayyoosona. Eti oottido iitabay aybee?

He kiitanchchati eti deꞌana bessiya saluwaa aggidi, asa gididi saꞌan deꞌanawu yiidoogaa Geeshsha Maxaafay yootees. Eti saꞌan deꞌiya loꞌꞌiya macca asaara mattumaa gayttanawu koyido gishshawu hegaadan oottidosona. (Doomettaabaa 6:1, 2; Yihudaa 6) Mattumaa gaytettaabaa neeni ay eray?

Issi attumaageenne issi maccaara dumma siiquwaa siiqettiyo wode mattumaa gayttoosona. Hegaappe simmin, aayee uluwan guutta naꞌi diccana danddayees. SHin kiitanchchati mattumaa gayttiyoogee bala. Xoossay eketti gelettida issi attumaageenne issi maccaari xalaalay mattumaa gayttanaadan koyees. Hegaadan issi naꞌay yelettikko, azinaynne machchiya he naꞌaassi koshshiyaabaa kunttana danddayoosona.

Kiitanchchati asaagaa mala bollaa maayidi saꞌan deꞌiya macca asaara mattumaa gayttido wode, yelettida naati diccidi keehi gita gididosona. Eti keehi iita, qassi asaa shocoosona. Yaatiyo gishshawu, kiitanchchatu naatanne iita asaa ubbaa xayssanawu Xoossay bashshaa haattaa ehiis. SHin loꞌꞌobaa oottida amarida asay he bashshaappe attanaadan, Xoossay Nohee wogga markkabiya keexxanaadan oottiis. Bashshaa haattaa wode hanidabaa hassayana koshshiyoogaa Gita Asttamaaree yootiis.—Doomettaabaa 6:3, 4, 13, 14; Luqaasa 17:26, 27.

Bashshaa haattaa wode iita kiitanchchati waanidaakko eray?— Eti asaagaa mala bollaa maayiyoogaa aggidi, guyye saluwaa simmidosona. SHin eti Xoossaa kiitanchcha gidana danddayibeenna gishshawu, Seexaanaa kiitanchchata woykko daydanttata gididosona. SHin keehi gita gidida eta naati waanidonaa?— Eti bashshaa haattan hayqqidosona. Xoossawu azazettibeenna hara asay ubbaykka hegaadan hayqqiis.

Bashshaa haattaappe simmin, daydanttati asa milatidi deꞌennaadan Xoossay diggiis. Nuuni daydanttata beꞌana danddayennaba gidikkokka, eti asaa keehi iitabaa ootissanawu maloosona. Eti ay wodeegaappenne aaruwan iitabaa oottiiddi deꞌoosona. Aybissi? Eti saluwaappe duge saꞌawu olettido gishshataassa.

Nuuni daydanttata beꞌennay aybissakko eray?— Eti ayfiyan beettenna gishshataassa. SHin eti deꞌiyoogaa ammanettana danddayoos. Geeshsha Maxaafay Seexaanay kumetta saꞌan deꞌiya asaa balettiyoogaa yootees; qassi daydanttati A maaddoosona.—Ajjuutaa 12:9, 12.

Seexaanaynne daydanttati nunakka balettana danddayiyoonaa?— Ee, nuuni naagettana xayikko, balettana danddayoosona. SHin nuuni etawu yayyana bessenna. Gita asttamaaree, ‘Dabloosi tana aynne oottana danddayenna’ yaagiis. Nuuni Xoossaara dabbotaa minttikko, I nuna Dabloosappenne daydanttatuppe naagana.—Yohaannisa 14:30.

Nuuni oottanaadan daydanttati koyiyo iitabay aybakko, nuuni erana koshshees. Ane issibaa qoppa. Daydanttati saꞌan deꞌiyo wode oottido iitabay aybee?— Bashshaa haattaappe kase, eti macca asaara mattumaa gayttidosona. Kiitanchchati hegaadan oottiyoogee bala. Ha wodiyan asay Xoossay mattumaa gaytettawu kessido higgiyawu azazettennan ixxiyo wode, daydanttati ufayttoosona. Nena issibaa oychchoo? Ay mala asa xallay mattumaa gayttana koshshii?— Likke zaaradasa. Ee, ekkida gelida asaa xalla.

Ha wodiyan attuma naatinne macca naati mattumaa gayttoosona. SHin eti yaatiyoogee bala. Xoossay attumatettaa bollaanne maccatettaa bollaa medhdhidoogaa Geeshsha Maxaafay yootees. Yihooway ha bollaa azinaynne machchiya dummabawu goꞌettanaadan qoppidi medhdhiis. Yihooway diggidobaa asay oottiyo wode, daydanttati ufayttoosona. Leemisuwawu, issi naꞌaynne naꞌiya issoy issuwaa attumatettaaninne maccatettan kaaꞌiyo wode, daydanttati ufayttoosona. Daydanttati ufayttanaadan koyokko gidennee?

Yihooway ixxiyooba gidikkonne, daydanttati dosiyo harabaykka deꞌees. Hegee aybakko eray?— Hanttaarabaa oottiyoogaa. (Mazamure 11:5) Asay keehi iitiyoogeenne harata shociyoogee hanttaaraba. Keehi gita gidida daydanttatu naati oottidobaa hassaya.

Hegaa bollikka, daydanttati asaa yashissoosona. Issi issitoo, eti hayqqida asaa milatidi qonccoosona. Eti hayqqida asaa cenggurssaa milatissidikka haasayana danddayoosona. Yaatiyoogan, asay hayqqidaageeti paxa deꞌoosona, qassi haratuura haasayana danddayoosona giidi qoppanaadan oottiyoogan eta cimmoosona. Ee, daydanttati daro asay moytillee deꞌees giidi ammananaadan oottoosona.

Yaatiyo gishshawu, Seexaanaynne daydanttati nuna cimmennaadan naagettana koshshees. Geeshsha Maxaafay hagaadan gees: ‘Seexaanay loꞌꞌo kiitanchcha milatanawu malees. A ashkkaratikka hegaadan oottoosona. (2 Qoronttoosa 11:14, 15) SHin daydanttati keehi iita. Daydanttati etaagaadan oottanaadan nuna denttettanawu waati maliyaakko ane beꞌoos.

Asay hanttaarabaa, Xoossaa higgiyaara maayettenna mattumaa gaytettaabaa, iita ayyaanatubaanne moytilletubaa darobaa aybippe tamaarii?— Televizhiiniyaaninne pilmiyan beꞌiyooban, woy timirtte keettan iita naatuura gayttiyoogan, woy iita laggetuura peꞌiyoogaana gidennee? Hegaadan oottiyoogee Xoossaara dabboyiiyye, Dabloosaaranne daydanttatuura dabboyii? Hegaa neeni woyga zaaruutii?

Nuuni he iitabaa beꞌanaadaaninne siyanaadan koyiyay oona gaada qoppay?— Ee, Seexaanaanne daydanttata. Yaatin, neeninne taani ay oottana koshshii?— Nuuni nuna goꞌꞌiyaabaanne Yihoowawu oottanawu maaddiyaabaa nabbabana, siyananne beꞌana koshshees. He loꞌꞌobatuppe amaridaageeta yootuutii?

Nuuni loꞌꞌobaa oottikko, daydanttatussi yayyanaadan oottiyaabi baa. Yesuusi etappe wolqqaama, qassi eti awu yayyoosona. Issi gallassi daydanttati Yesuusa, bantta qaalaa xoqqu oottidi, “Nuna xaissanau yaadii?” yaagidosona. (Marqqoosa 1:24) Sinttappe Yesuusi Seexaanaanne daydanttata xayssiyo wode nuuni keehi ufayttokkoo?— He wode gakkanaashin, nuuni Yesuusaaranne A Aawaara dabbotaa minttikko, I nuna naaganaagaa ammanettana danddayoos.