SHemppuwaa Tammanne Uddufuna
Xoossaa Siiquwan Deꞌa
Xoossaa siiqiyoogaa giyoogee woygiyoogee?
Xoossaa siiquwan waani deꞌana danddayiyoo?
Yihooway ba siiquwan deꞌiyaageeta waati anjjii?
1, 2. Ha wodiyan baqati attiyo ammanttiya sohuwaa awappe demmana danddayiyoo?
WOLQQAAMA uushoy uushiyo gallassi ogiyan nerkka hemettaydda deꞌiyaabadan qoppa. Saloy xumiiddi yin, wolqqanttay wolqqamiyoogaa, daday guummiyoogaanne hegaappe iray soosiyoogaa doommiis. Woxxada eesuwan attiyoosaa koyaasa. Yaataydda, ogiyaa doonan attiyo issi sohuwaa demmadasa. He sohoy mino gidi oosettidanne iraakka aattenna loꞌꞌo soho. He sohuwaa neeni keehippe nashshiyoogee qoncce!
2 Nuuni deꞌiyo wodeekka uushodan metiya wode. Alamiyaa hanotay yaa iiti iiti bees. SHin attiyo ammanttiya sohoy, addussa wodiyau qohuwaa gattana danddayiyaabaappe naagettiyo sohoy deꞌees. He sohoy aybee? Geeshsha Maxaafay: “Neeni taayyo qatonne baqata attiyo soho; neeni taani ammanettiyo ta Xoossaa” giidi tamaarissiyoogaa akeeka.—Mazamure 91:2.
3. Yihoowa nuuyyo baqati attiyo soho waati oottana danddayiyoo?
3 Yihooway, Medhdhidaagee, yuniverssiyan Ubbaappe Bollay, nuussi baqati attiyo soho gidana danddayiyoogaa qoppa! Nuna qohana danddayiya ooppenne woykko aybippenne keehi wolqqaama gidiyo gishshau, i nuna naagana danddayees. Nuuni qohettiyaaba gidikkokka, he qohoy kaalettiyo iitabaa ubbaa Yihooway xayssana danddayees. Yihoowa baqati attiyo soho waati oottana danddayiyoo? Nuuni an ammanettiyoogaa koshshees. Hegaa bolli, Xoossaa Qaalay: “Intte huuphiyaa Xoossaa siiquwan wottite” yaagidi minttettees. (Yihudaa 21) Ee, saluwan deꞌiya nu Aawaara deꞌiya siiquwaa minttiyoogan, Xoossaa siiquwan deꞌana bessees. I nuuyyo baqati attiyo soho gidiyoogan ammanettidi deꞌana danddayoos. SHin hegaa mala issippetettaa waati medhdhana danddayiyoo?
YIHOOWA SIIQUWAA AKEEKADA HEGAU ZAARUWAA IMMA
4, 5. Yihooway nuussi siiquwaa bessido ogetuppe amaridaageeti awugeetee?
4 Xoossaa siiquwan deꞌanau, Yihooway ba siiquwaa nuussi waati bessidaakko akeekana koshshees. Ha maxaafan goꞌettada neeni erido issi issi Geeshsha Maxaafaa timirtteta qoppa. Yihooway Medhdhidaagaa gidiyoogaadan, saꞌaa ufayssiya keetta oottidi nuuni deꞌanaadan immiis. I saꞌan daro kattaynne haattay, mereta aqoy, maalaalissiya meheenne doꞌay, qassi beꞌanau loꞌꞌiyanne ufayssiya darobay kumanaadan oottiis. Xoossay Geeshsha Maxaafaa xaafissidaagaa gidiyoogaadan, ba sunttaanne ba eeshshsaa nuussi qonccissiis. Hegaappe haray, i ba dosiyo Naꞌaa, Yesuus Kiristtoosa saꞌaa kiittidi, waayiyan nuussi hayqqanaadan oottidoogaakka a Qaalay qonccissees. (Yohaannisa 3:16) He imotay nuussi ay keena koshshiyaabee? He imotay maalaalissiya sinttanaa hidootay nuussi deꞌanaadan oottiis.
5 Nu sinttanaa hidootay, Xoossay nuussi oottido harabaanikka zemppees. Yihooway saluwan deꞌiya aysuwaa, Masiyaa Kawotettaa essiis. He Kawotettay ubba waayiyaa mata wode xayissidi, saꞌaa gannate oottana. Ane qoppa! Nuuni yan saruwaaninne ufayssan merinau deꞌana danddayoos. (Mazamure 37:29) He wode gakkanaashin, haꞌꞌi ubbaappe loꞌꞌo ogiyan deꞌanaadan oottiya kaaletuwaa Xoossay immiis. Nuuni awudenne gidin awankka gididi aara gayttana danddayiyo woosaa imotaakka immiis. Hageeti, Yihooway neessi ne huuphenne asaa naatu ubbau siiquwaa bessido amarida ogeta.
6. Yihooway neessi bessido siiquwaa gishshaa ay oottana danddayay?
6 Neeni qoppana bessiya oyshay: Yihoowa siiquwau taani ayba ogiyan zaaruwaa immanee? yaagiyaagaa. Daroti, “Taanikka zaarada a siiqana bessees” gaana danddayoosona. Neenikka hegaadan qoppay? Yesuusi ubbaappe aadhdhiya azazoy: “Neeni Godaa ne Xoossaa ne kumetta wozanaappe, ne kumetta shemppuwaappe, ne kumetta qofaappe siiqa” yaagiyaagaa gidiyoogaa yootiis. (Maatiyoosa 22:37) Neeni Xoossaa Yihoowa siiqanaadan oottiya daro gaasoti deꞌoosona. SHin neeni hegaadan siiqiyoogaadan qoppiyoogaa xallay, Yihoowa ne kumetta wozanaappe, shemppuwaappenne qofaappe siiqiyoogaa gidii?
7. Xoossaa siiqiyaadan coo qoppiyoogaappe, Xoossaa siiqiyoogaa bessiyo hara aadhdhiya ogee deꞌii? Qonccissa.
7 Geeshsha Maxaafay qonccissiyoogaadan, Xoossaa siiqiyoogee, a siiqiyoogaadan qoppiyoogaappe aadhdhiyaaba. Xoossaa siiqiyaabadan qoppiyoogee koshshiyaaba gidikkonne, hegee a tumuppe siiqiyoogau doometta xalla gidiyoogee qoncce. Ayfiyaa miyo mittaa zeridi mokissanau zerettaa koshshees. SHin neeni teera ayfiyaa maanau koyidaba gidikko, issi uri neessi he mittaa ayfiyaa zeretta xallaa immin, neeni ufayttanee? Akkay! Hegaadan, Xoossaa Yihoowa siiqiyaabadan qoppiyoogee, doometta xalaala gidiyo gishshau hegaa xallay gidenna. Geeshsha Maxaafay: “Nuuni Xoossaa siiqiyoogee a azazuwaa naagiyoogaa; a azazoikka deexo gidenna” yaagidi tamaarissees. (1 Yohaannisa 5:3) Tumuppe Xoossaa siiqiyaageeta gidiyoogee, ayfiyo loꞌꞌo ayfiyan beettees. Xoossaa siiqiyoogee oosuwan qonccana bessees.—Maatiyoosa 7:16-20.
8, 9. Nuuni Xoossaa siiqiyoogaanne galatiyoogaa waati bessana danddayiyoo?
8 Nuuni Xoossaa siiqiyoogaa, a azazuwaa naagiyoogaaninne i kessido baaso siraataa oosuwan peeshshiyoogan bessoos. A azazoy polanau deexxiyaagaa gidenna. Yihoowa higgeti deexxiyaageeta gidennan, nuuni loꞌꞌo, ufayssiyanne woppa deꞌuwaa deꞌanau maaddanaadan geetettidi imettidaageeta. (Isiyaasa 48:17, 18) Yihoowa kaaletuwaara maayetti deꞌiyoogan, i nuussi oottido ubbabau saluwan deꞌiya nu Aawaa wozanappe galatiyoogaa bessoos. Ha wodiyan alamiyan deꞌiya asaappe, hegaadan galatiyaagee keehippe guutta gidiyoogee azzanttiyaaba. Yesuusi saꞌan deꞌido wode deꞌida issi issi asaadan, nuuni galati baynnaageeta gidanau koyokko. Inchchirichchay oyqqido tammu asata Yesuusi pattiis; shin issuwaa xallay a galatanau yiis. (Luqaasa 17:12-17) Nuuni galatibeenna uddufanatuppe galatida issuwaadan hanana koyiyoogee qoncce!
9 Yaatin, nuuni naagana bessiyo Yihoowa azazoti awugeetee? He azazotuppe darota nuuni ha maxaafan tamaarida; shin amaridaageeta ane zaarettidi beꞌoos. Xoossaa azazota naagiyoogee, nuuni Xoossaa siiquwan deꞌanaadan maaddees.
AWUDEEGAAPPENNE AARUWAN YIHOOWAKKO SHIIQA
10. Xoossaa Yihoowa xeelliyaagan, aggennan eraa demmiyoogee ayssi koshshiyaakko qinccissa.
10 Yihoowakko aaruwan shiiqanau abaa tamaariyoogee keehippe koshshiya tanggo. Hegee aggennan ubbatoo oottana bessiyooba. Keehi kinchchiya qammi dembban tamaa hoꞌꞌaydda deꞌiyaaba gidikko, tamay laafiiddi biidi toꞌanaadan oottay? CHii. Tamay pololattidi eexxanaadaaninne hoꞌꞌanaadan mittaa gujjaasa. Ne deꞌoy geella neeni hegaa oottiyoogan takkana danddayees! Mittay, tamay eexxanaadan oottiyoogaadan, ‘Xoossaa loytti eriyoogeekka’ Yihoowassi deꞌiya siiqoy nuugee minni minni baanaadan oottees.—Leemiso 2:1-5.
11. Yesuusi tamaarissido timirttee a kaalliyaageeti wananaadan oottidee?
11 Yesuusi bana kaalliyaageeti Yihoowayyonne A alꞌꞌo Qaalaa tumaayyo deꞌiya siiquwaa minttidi deꞌanaadan koyiis. Yesuusi hayquwaappe denddi simmidi, Ibraysxxe Geeshsha Maxaafaa hiraagatuppe, a bolli polettida amaridaageeta ba erissiyo ashkkaratuppe naaꞌꞌata tamaarissiis. Hegaappe denddidaagan eti waanidonaa? Eti guyyeppe: “I nuussi ogiyan odishiininne Xoossaa maxaafata birshshishin, nu wozanai mishettidi xuugettibeennee?” yaagidosona.—Luqaasa 24:32.
12, 13. (a) Ha wodiyan deꞌiya asaappe dariyaagee, Xoossaayyonne Geeshsha Maxaafaayyo bessiyo siiquwan waanidee? (b) Nu siiqoy irxxenna mala ay oottana danddayiyoo?
12 Tumuppe Geeshsha Maxaafay woygi tamaarissiyaakko neeni koyro erido wode, ne wozanay ufayssan, mishuwaaninne Xoossaa siiquwan seelettibeennee? Neessi hegaadan siyettidoogee sirissenna. Darotussi hegaadan siyettiis. Haꞌꞌi metiyay, he wolqqaama siiqoy ubbatoo deꞌanaadaaninne dicciiddi baanaadan oottiyoogaa. Ha wodiyan deꞌiya alamiyaa hanotaa kaallana koyokko. Yesuusi “Daro asaa siiqoi irxxana” yaagidi kaseti yootiis. (Maatiyoosa 24:12) Yihoowayyonne Geeshsha Maxaafaayyo deꞌiya siiqoy irxxenna mala ay oottana danddayay?
13 Xoossaa Yihoowanne Yesuus Kiristtoosa xeelliyaagan eraa demmiyoogaa aggoppa. (Yohaannisa 17:3) Xoossaa Qaalaappe neeni demmido eraa: ‘Hagee tana Xoossaa Yihoowabaa ay tamaarissii? Taani kumetta wozanaappe, qofaappenne shemppuwaappe a siiqanaadan oottiyaabaa ay akeekissii?’ yaagada nena oychchaydda wotta denttada qoppa. (1 Ximootiyoosa 4:15) Hegaadan wotti dentti qoppiyoogee, Yihoowayyo deꞌiya siiqoy neegee pooꞌi eexxiya tamaadan gujjiyoogaa aggennaadan oottees.
14. Nuuni Xoossaa siiqidi deꞌanaadan woosay waati maaddana danddayii?
14 Yihoowayyo deꞌiya siiqoy neegee pooꞌi eexxiya tamaadan gujjiyoogaa aggennaadan oottiyo hara ogee, ubbatoo woossiyoogaa. (1 Tasalonqqe 5:17) Ha maxaafan SHemppuwaa 17n, woosay, Xoossay immido alꞌꞌo imota gidiyoogaa tamaarida. Asaara deꞌiya dabbotay ubba wode zawi baynna hanotan haasayiyoogan minniyoogaadan, Yihoowaara deꞌiya dabbotaykka nuuni ubba wode akko woossiyoogan minnees. Nuuni nu wozanan tumuppe siyettibeennabaa, coo doonan yiida, ubba wode meezetido qaalan zaari zaari woossana bessennaagee koshshiyaaba. Issi naꞌay ba siiqo aawaa haasayissiyoogaadan, nuunikka Yihoowa hegaadan haasayissana koshshees. Nu woosay, qoncciyan, tumuppenne wozanappe gididi, bonchchuwana gidana bessiyoogee erettidaagaa. (Mazamure 62:8) Ee, Geeshsha Maxaafaa buzo xannꞌiyoogeenne wozanappe woossiyoogee, nu goynuwau koshshiyaabanne Xoossaa siiquwan deꞌanaadan nuna maaddiyaaba.
GOYNUWAN UFAYSSAA DEMMA
15, 16. Kawotettaa mishiraachchuwaa sabbakiyo oosuwaa dumma maatadaaninne minjjadan xeelliyoogee bessiyaaba gidiyoy aybissee?
15 Geeshsha Maxaafaa buzo xinaateenne woosay, nuuni nu huuphe oottana danddayiyo goyno ogeta. Gidikkokka, hara goyno oge gidida, asau nu ammanuwaabaa yootiyoogaa ane haꞌꞌi qoppoos. Neeni Geeshsha Maxaafaa tumaa amaridaagaa hara asau yootiyoogaa doommadii? Hegaa gidikko, keehi ufayssiya dumma maataa demmadasa. (Luqaasa 1:74) Xoossaa Yihoowabaa tamaarido tumaa haratuyyo yootiyo wode, ubba Kiristtaanetussi imettida keehi koshshiya oosuwaa poliiddi deꞌoos; hegeekka Xoossaa Kawotettaa mishiraachchuwaa sabbakiyoogaa.—Maatiyoosa 24:14; 28:19, 20.
16 Kiitettida PHauloosi haggaazuwaa alꞌꞌobadan xeelliisinne minjja giidi xeegiis. (2 Qoronttoosa 4:7) Yihoowabaanne a halchchuwaabaa asau yootiyoogee, neeni oottana danddayiyo ooso ubbaappe aadhdhiya ooso. Nuuni oottiyo oosoy ooppenne aadhdhiya Godaa oosuwaa; he oosoy hara ay oosuwaappenne aadhdhiya goꞌꞌaa immees. Ha oosuwaa oottiyoogan, loꞌꞌo wozana koshshay deꞌiyo asata saluwan deꞌiya nu Aawaakko shiiqanaadan maaddaasanne merinaa deꞌuwaa ogiyan hemettiyoogaa doommanaadan oottaasa! Ay mala keehi ufayssiya oosoo! Hegaa bolli, Yihoowabaanne a Qaalaabaa markkattiyo wode, ne ammanoy gujjeesinne ayyo deꞌiya ne siiqoy minnees. Yihoowaykka ne oottiyo baaxiyaa nashshees. (Ibraawe 6:10) He oosuwaa aggennan genccada oottiyoogee, neeni Xoossaa siiquwan deꞌanaadan maaddees.—1 Qoronttoosa 15:58.
17. Kiristtaanetu haggaazoy ha wodiyan eesuwan oosettana bessiyoy aybissee?
17 Kawotettaa mishiraachchuwaa sabbakiyo oosoy eesuwan oosettana bessiyoogaa hassayiyoogee koshshiyaaba. Geeshsha Maxaafay: “Qaalaa yoota; . . . minnada [“eesuwan,” NW] yoota” yaagees. (2 Ximootiyoosa 4:2) Ha wodiyan hegaadan eesuwan yootiyoogaa ayssi koshshidee? Xoossaa Qaalay nuussi: “GODAA gita gallassai matiis; matidikka qassi keehippe eesotees” yaagidi yootees. (Sofoniyaasa 1:14) Ee, Yihooway ha siraataa kumettaa xayssiyo wodee, eesuwan gakkiiddi deꞌees. Asaa akeekissana koshshees! Eti banttana Haariyaagaa oottidi, Yihoowa doorana koshshiyoy haꞌꞌa gidiyoogaa erana bessees. Wurssettay “gam77enna.”—Imbbaaqooma 2:3.
18. Nuuni tumu Kiristtaanetuura issippe Yihoowassi goynnana koshshiyoy aybissee?
18 Yihooway, nuuni tumu Kiristtaanetuura issippetettan assi goynnanaadan koyees. A Qaalay: “Issoy issuwaara waani siiqettanaakkonne qassi loꞌꞌo oosuwaa waati oottanaakko, issoy issuwau qoppoos. Issooti issooti shiiquwaa aggiyoogaa meeze oottidoogaadan, nuuni issippe shiiqiyoogaa aggokko; shin wurssettay matattiyoogaa intte beꞌiyo gishshau, issoy issuwaa minttettoos” yaagiyoy hegaassa. (Ibraawe 10:24, 25, NW) Nu mala ammaniyaageetuura Kiristtaane shiiqotun shiiqiyo wode, nu siiqo Xoossaa sabbiyoonne assi goynniyo keehippe loꞌꞌo injjiyaa demmoos. Qassi issoy issuwaa loꞌꞌobau denttettoosinne minttettoos.
19. Kiristtaane gubaaꞌiyan deꞌiya siiquwaa minttanau ay oottana danddayiyoo?
19 Nuuni Yihoowassi goynniya haratuura issippe gidiyo wode, gubaaꞌiyaa giddon deꞌiya siiquwaanne dabbotaa minttoos. Nuussi deꞌiya loꞌꞌo eeshshaa Yihooway xeelliyoogaadan, nuunikka haratu loꞌꞌo eeshshaa xeelliyoogee koshshiyaaba. Nenaara ammaniyaageetuppe polotettaa naagoppa. Ubbatikka dumma dumma ayyaana dichchaa xekkan deꞌiyoogaanne nuuni ubbay balaa oottana danddayiyoogaa hassaya. (Qolasiyaasa 3:13) Yihoowa wozanappe siiqiyaageetuura deꞌiya mata dabbotaa minttanau baaxeta. Hegaadan oottiyoogan, neeni ayyaanan dichchaa bessiyoogaa akeekaasa. Ee, ne ayyaana ishanttuuranne michchenttuura Yihoowassi goynniyoogee, Xoossaa siiquwan deꞌanaadan nena maaddees. Assi ammanettidi goynniiddi, a siiquwan deꞌiyaageeta Yihooway ayba ogiyan anjjii?
“TUMU DE7UWAA” OYQQA
20, 21. ‘Tumu deꞌoy’ aybee? Hegee maalaalissiya hidoota gidiyoy aybissee?
20 Ayyo ammanettidi oottiyaageetussi Yihooway deꞌuwaa immiyoogan eta anjjees; shin hegee ay mala deꞌoo? Neeni haꞌꞌi tumuppe deꞌay? Nuuppe dariyaageeti, hegaa zaaroy qoncce gaana danddayoos. Nuuni shemppoos, moosinne uyoos; deꞌuwan deꞌiyoogee tuma; yaagidi deꞌuwan deꞌiyoogaa yootana danddayoos. Keehippe ufayttido wode, “Ta deꞌo layttan taani tumuppe deꞌidoy hachcha!” yaagana danddayoos. Gidikkokka, issi keehippe koshshiya hanotan xeelliyo wode, ha wodiyan ay asinne tumuppe deꞌiiddi deennaagaa Geeshsha Maxaafay qonccissees.
21 Xoossaa Qaalay nuuni ‘tumu deꞌuwaa oyqqanaadan’ minttettees. (1 Ximootiyoosa 6:19) He qaalati, ‘tumu deꞌoy’ nuuni sinttappe demmanau hidootiyooba gidiyoogaa malaatoosona. Ee, nuuni polo gidiyo wode, he qaalaa birshshettaadan kumetta hanotan, Xoossay koyro doomettan nuussi halchchido deꞌuwaa deꞌana. Nuuni “tumu de7uwaa” deꞌanay, gannate gidiya saꞌan kumetta payyatettan, saruwaaninne ufayssan merinaa deꞌuwaa deꞌiyo wode. (1 Ximootiyoosa 6:12) Hegee keehippe maalaalissiya hidoota gidennee?
22. Neeni waatada ‘tumu deꞌuwaa oyqqana’ danddayay?
22 Nuuni waatidi ‘tumu deꞌuwaa oyqqana’ danddayiyoo? PHauloosi hegaa gaanaappe kasetidi, Kiristtaaneti “lo77obaa oottanaadan” qassi “lo77o oosuwan duretanaadan” minttettiis. (1 Ximootiyoosa 6:18) Hegee, nuuni Geeshsha Maxaafaappe tamaarido tumaa oosuwan peeshshiyoogan qonccidi beettees. SHin PHauloosi gaana koyidoy, loꞌꞌo oosuwaa oottiyoogan “tumu de7uwaa” demmoos gaanaassee? CHii; hegaa mala maalaalissiya hidootaa nuuni demmana danddayiyoy, tumuppe Xoossaa ‘aaro kehatettaana.’ (Roome 5:15) Gidikkonne, baayyo ammanettidi oottiyaageeta anjjiyoogan Yihooway ufayttees. Neeni “tumu de7uwaa” deꞌanaadan i koyees. Xoossaa siiquwan deꞌiyaageeti, hegaa mala ufayssaynne sarotettay deꞌiyo merinaa deꞌuwaa demmanau naagana danddayoosana.
23. Xoossaa siiquwan deꞌiyoogee koshshiyaaba gididoy aybissee?
23 Nuuni ubbay, ‘Xoossay Geeshsha Maxaafan yootido ogiyan, taani assi goynnaydda deꞌiyaanaa?’ yaagidi nuna oychchana bessees. Galla galla nu huuphiyaa pilggiyo wode, he oyshau zaariyo zaaroy ee yaagiyaagaa gidikko, nuuni deꞌiyoy suure ogiyaana yaagiyoogaa. Yihooway nuussi baqati attiyo soho gidiyoogan ammanettana danddayoos. I banan ammanettiyaageeta metoy dariyo, ha galꞌꞌa siraataa wurssetta gallassatuppe naagidi saruwan pinttana. Haꞌꞌi matan yiya maalaalissiya ooratta siraataukka, Yihooway saruwan gattana. He wode nuuni deꞌana deꞌoy ay keena ufayssiyaagaa gidanee! Ha wurssetta gallassatun bessiya dooruwaa doorido gishshau, hegee nuna ayba ufayssanee! Neeni haꞌꞌi hegaa mala dooruwaa dooridaba gidikko, Yihooway koyro doomettan halchchido merinaa deꞌuwaa, “tumu de7uwaa” deꞌana danddayaasa!
GEESHSHA MAXAAFAY TAMAARISSIYOOBAA
▪ Nuuni Xoossaa azazotanne baaso siraatata oosuwan peeshshiyoogan, wozanappe a siiqiyoogaa bessoos.—1 Yohaannisa 5:3.
▪ Xoossaa Qaalaa xannaꞌiyoogee, Yihoowakko wozanappe woossiyoogee, abaa harata tamaarissiyoogeenne Kiristtaane shiiqotun ayyo goynniyoogee, Xoossaa siiquwan nuuni deꞌnaadan maaddees.—Maatiyoosa 24:14; 28:19, 20; Yohaannisa 17:3; 1 Tasalonqqe 5:17; Ibraawe 10:24, 25.
▪ Xoossaa siiquwan deꞌiyaageetussi “tumu de7uwaa” deꞌiyo hidootay deꞌees—1 Ximootiyoosa 6:12, 19; Yihudaa 21.
[Sinttaa 184n diya misiliyaa]
Ha uushiya wodiyan neessi Yihoowa baqata attiyo soho ne oottanee?
[Sinttaa 187n diya misiliyaa]
Tamay eexxiiddi takkanaadan mittaa gujjiyoogaadan, Yihoowa siiqiyoogankka gujjiyoobaa koshshees
[Sinttaa 190n diya misiliyaa]
Neeni “tumu de7uwaa” deꞌanaadan Yihooway koyees. Neeni deꞌaneeshsha?