Kawotettaa Oduwaa Paydo 37

Saꞌaa Yuushuwan Deꞌiyaa Ubbaau Koshshiya Kiitaa

Worddo Hayimaanotiya Xayoy Matattiis!

▪ Worddo hayimaanotee aybee?

▪ I waanidi xayanee?

▪ Nena waati qohana danddayii?

Worddo hayimaanotee aybee?

Hayimaanotiyaa sunttan polettiyaa danuwa beꞌada unꞌꞌetta eray? Xoossaa haggaazoos giyaageeti, olettiyo olaa, poliyo shabbirssaa, balibakkuwaanne eti oottiyo pirddaa paccaa beꞌada yiillota eray? Hayimaanotee daro metuwayyo gaaso gididoy aybissee? Ha balay xeelliyoy, ubba hayimaanotiya gidennan worddo hayimaanotiya xalaala. Haymaanotiyaara oyqettidabaan daroti bonchchiyo Yesuus Kiristtoosi, hayimaanotetuba qonccissiidi, worddo hayimaanotee oottiyo iita oosuwa, “iita mitti iita aife aifees” yaagiis. (Maattiyoosa 7:15-17) Worddo hayimaanotee ayfiyo ayfee aybee?

Worddo hayimaanotee . . .

◼ OLAANINNE POLOTIKKAN KALTTIYAA GELEES: “Iissiyaaninne hara heeran,” Asiaweek geetettiyaa xuufee qonccissiidi “sunttetanau koyiyaageeti hayimaanotiyau deꞌiya asaa koshshaa hiillan bantta goꞌꞌau laammidosona” yaagees. Hegaappe denddidaagan, ha xuufee akeekissidi: “Alamee aqi peeꞌidi gooyana hanees” yaagees. Amerkka biittan deꞌiya erettida hayimaanotiya kaalettiyaagee: “SHabirssiyaageeti asaa woridi wurssenan kasetidi eta xayssite” yaagidi qoncciyaan haasayiis. “SHabirssiyaageeta ubbaa Godaa sunttan worite” yaagidi bau loꞌꞌo malatida qofaa immiis. Geeshsha maxaafay, “Ooninne, ‘Taani Xoossaa siiqais’ giidi ba ishaa ixxikko, i worddanchcha” yaagidi a qofaara phalqqettees. (1 Yohaannisa 4:20) Yesuusi ubba: “Intte morkketa siiqite” yaagiis. (Maatiyoosa 5: 44) Eta garssan deꞌiyaa asaay olaan shaahettiyoo aappun hayimaanoteta eray?

◼ WORDDO TIMIRTTIYA TAMAARISSOOSONA: Daro hayimaanoteti shemppoy woykko ayyaanay ashoy hayqqi simmin kiyidi biyaa beettenaba yaagidi tamaarissoosona. Hegaa giidi tamaarissido gishshau, ha hayimaanotetuppe dariyaageeti hayqqidaageetu shemppuwaassi woossanaayo miishshaa qanxxisanaau injjetiis. Gidikkokka, Geeshsha Maxaafay hegaappe dumma timirttiyaa tamaarissees. “Nagaraa oottiya shemppoi i bau haiqqana.” (Hizqqeela 18:4) “Paxa de7iya asati issitoo haiqqanau de7iyoogaa eroosona; shin haiqqidaageeti aibanne erokkona.” (Eranchchaa 9:5) Asaassi hayqqenna shemppoy deꞌidaba gidiyaakko, Yesuusi tamaarissido hayquwappe denddoy koshshenaba. (Yohaannisa 11:11-25) Ne hayimaanotee shemppoy hayqqena giidi tamaarisii?

◼ TUNA ASHO GAYTTOTETTA COꞌꞌU GIIDI XEELEES: Issi issi biittatun, hayimaanotiya kaalliyaageeti, attuma asay attuma asaaranne macca asay macca asaara asho gayttotetta poliyaageeta qeese oottidi sunttoosonanne hegeetu mala asa ekuwaanne geluwaa kawotettay maayana mala oyichchoosona. Haraay atto kase kandduwa maaraay moorettiyoo wode bohiya hayimaanoteti haꞌꞌi eta qeeseti naatu bolla asho gayttotetta wolqqan poliyoo wode coꞌꞌu giidi xeeloosona. Hagaappe dumma ogiyaan, Geeshsha maxaafay, ay tamaarisii? Geeshsha maxaafay qonccisiidi: “Baloppite. SHaaramuxana qaaqqatiyaageeti woi eeqassi goinniyaageeti woi shaaramuxiyaageeti woi attumaasa gidiiddi, attumaasaara shaaramuxiyaageeti, . . . Xoossaa kawotettaa laattokkona” yaagees. (1  Qoronttoosa 6:9, 10) Kandduwa maaraappe kareera deꞌiyaa asho gayttotetta coꞌꞌu giidi xeeliya hayimaanoteta neeni eray?

Iita ayife ayifiya hayimaanotetu sintta hidootay ayibee? Yesuusi: “Lo77o aife aifenna mitta ubbai qanxxettidi, taman yegettana” yaagidi akeekisiis. (Maatiyoosa 7:19) Ee, worddo hayimaanotee qanxxettidi xayana! SHin hagee waanidinne awude hananee? Geeshsha maxaafan, sinttanau hananabaa yootiya Ajjuutaa shemppo 17⁠ynne 18y, zaaruwa immees.

Worddo hayimaanotee waanidi xayanee?

Issi shaaramuxiyaa issi yashshiya doꞌaa zokkuwaan uttaasu. Doꞌaayyo laappun huupheenne tammu kacee deꞌees. Ane ha hanotaa ne guuggiyan qoppa. (Ajjuutaa 17:1-4) SHaaramuxa mishiriyaa oona malaatay? “Sa7aa kawoti” i sheniyaadan hanana mala oottawusu. A teera ochcha milatiya maayuwaa maayasu, ixaanaan goꞌettawusunne daro dure. Hegaa bollaan, a bitiyooga gaasuwan ‘asa zare ubbai cimettiis.’ (Ajjuutaa 17:18; 18:12, 13, 23) Ha shaaramuxa mishiriyaa saꞌaa yuushuwaan deꞌiya hayimaanote dirijjite gidiyooga akeekanaadan Geeshsha Maxaafay nuna maaddees. A issi hayimaanote gidennan, iita ayife ayifiya ubbaa hayimaanotiya malaatawusu.

Mishiriya toggido doꞌay saꞌaa bollan deꞌiya polotikka haaruwa malaatees.a (Ajjuutaa 17:10-13) Worddo hayimaanotee ha doꞌaa toggidoogee, i oottiyoobaanne hananau bessiyaaba ba koyidoogaadan oottiyoogaa bessees.

Gidikkokka, matan, malaalissiya hanotay polettes. “Qassi neeni be7ido tammu kaceenne do7ai shaaramuxiyo ixxana. Eti iyyo de7iya ubbabaa ekkirggana. Qassi o kallo ashshananne i ashuwaa mirggana; yaatidi eti o taman xuuggana.” (Ajjuutaa 17:16) Qoppenan, saꞌa ubban deꞌiya polotikka yameti, worddo hayimaanotiya bolli daganttiya tangguwa ekkidi o xayssana! Ha tangguwa ekkana mala aybee denttettiyay? Geeshsha Maxaafan Ajjuutaa maxaafay: “Xoossai qoppidoogaa eti oottanaadan, eta wozanan Xoossai amuwaa wottiis.” giidi zaaruwa immees. (Ajjuutaa 17:17) Ee, Xoossay A sunttan a polido toochchisiyaa iita ooso ubbau worddo hayimaanotiya ooychchana. Polo gidida tumu pirddan, iira shaaramuxida polotikka yameta goꞌetidi hayquwan o pirdana.

Neeni worddo hayimaanotiya gakkiyaa pirddaappe attana koykko ay oottanau bessii? Xoossaa kiitanchchay, “Ta asau, ippe kiyite!” yaagidi mintti yootiis. (Ajjuutaa 18:4) Tumukka, worddo hayimaanotiyaappe kiyanau wodee haꞌꞌa! SHin neeni kiyada baanasay awee? Xoossi baawa yaagiyaa sintta wode hidooti baynnageetukko gidenna. (2  Tasalonqqe 1: 6-9) Baqatana sohoy tumu hayimaanotiyaakko xalaala. Neeni tumu hayimaanotiyaa waatada shaakka erana danddayaay?

Tumu hayimaanotiya shaakki eriyo ogiya

Tumu hayimaanotee ayifiyo loꞌꞌo ayifee aybee?—Maatiyoosa 7:17.

Tumu Hayimaanotee . . .

◼ SIIQUWA OOSUWAN PEESHSHEES: Tumatettan goynniyaageeti “sa7aassa gidokkona,” Zariyaan woy wogaan shaakettokkonanne, ‘issoy issuwara siiqettiyooga’ bessoosona. (Yohaannisa 13:35; 17:16; Oosuwaa 10:34, 35) Issoy issuwa woriyogee atto shin, issoy issuwassi bantta shemppuwaa aattidi immanau koyoosona.—1 Yohaannisa 3:16.

XOOSSAA QAALAAN AMMANETEES: Tumu hayimaanotee tamaarissiyoogee, ‘asi oottido azazuwaanne’ “wogaa” gidennan, Xoossaa Qaalaa Geeshsha Maxaafan baasettida timirttiya. (Maatiyoosa 15:6-9) Aybissi giyaaba gidikko, ‘Xoossaa maxaafa ubban Xoossaa Ayyaanay de7ees. Tumatettaa tamaarissanau, balaa seeranau, mooruwaa suurissanaunne xillotetta de7uwau zoriyaa immanau maaddoosona’ yaagiyo gishshatasa.—2 Ximootiyoosa 3:16.

SO ASA DUUSAA MINTTETEESINNE KANDDUWAA MAARAA XOQQU OOTTI XEELEES:

Tumu hayimaanotee, azinay ‘ba maccaasiyo ba bollaadan siiqanaadan,’ maccaasay ‘bantta azinaa bonchchanaadaaninne,’ naati ‘yelidaageetuyyo azazettanaadan’ loohisseesinne tamaarissees. (Efisoona 5:28, 33; 6:1) Gujjidikka, aawatettay immettido ammanettidaageeti kandduwa maaraan haratuyyo leemiso gidanaadan tamaarissees.—1 Ximootiyoosa 3:1-10.

Ha baaso siraata bonchchiya hayimaanotee deꞌii? Holocaust Politics geetettiya, 2001n attamettida xuufee yaagees: “Daro asay Yihoowa Markkati tamaarissiyoogaadaaninne oottiyoogaadan deꞌidaakko, olaan busakkettiyoogeenne issi zariyaa shaakkidi buttiyoogee deꞌenaadan kasetidi teqqanau danddayetees.”

Tuma, Yihoowa Markkati 235 biittan, Geeshsha Maxaafaa kandduwa maaraa tamaarissiyooga xalaala gidennan—aara moggotidi deꞌoosona. Xoossay neeppe koyiyoy ayibakko tamaaranayoonne i koyiyo ogiyaan goynnanau Yihoowa Markkati nena maaddana mala oychchanaadan nena minttetoos. Tangguwa ekkana koshshiya wodee haꞌꞌa. Mammottoppa. Worddo hayimaanotiyaa xayoy matattiis!—Sofonaasa 2:2, 3.

Yihoowa Markkati tamaarissiyo Geeshsha Maxaafan baasettida timirttiya guujjada eranau koykko, kaallidi deꞌiya qatuwan etaara gayttanau guyye gooppa.

□ Hayyanintta Xoossay Nuuppe Koyiyoy Aybee? yaagiya issi birooshuriya taayyo kiittite.

□ Geeshsha Maxaafaa xannayanau koyiyo gishshau hayyanintta tanaara gayttite.

[Tohossa qofata]

[Sinttaa 3n deꞌiya misiliyaa qonccissuwaa]

“Ta asau, ippe kiyite!”

[Sinttaa 3n deꞌiya misiliyaa qonccissuwaa]

Worddo hayimaanotee ‘sa7aa kawota’ ba koyidoogaa oottanaadan oottees.