Waatada Loꞌꞌo Zoriya Wozanaa Oyqqada Deꞌana Danddayay?

1, 2. Komppaasee keehi goꞌꞌiya miishsha gididoy aybissee? I waanidi zoriya wozanaara malatettana danddayii?

MARKKABIYAA laaggiyaagee issi dalgga abbaa dambbalaa ba markkabiyaa laaggidi kanttees; allaxxanau issisaa biya issi uri battaale bazzuwan hemettees; horophilliyaa laaggiyaagee degaara saluwaa kammida shaaraappe bollaara ba horophilliyaa laaggidi kanttees. Ha asata malatissiyaabi aybakko eray? Ha wodiyaa tekinolojiyan giigida harabaa demmennaba gidikko, ubbaykka bantta biyo ogiyan komppaase geetettiya miishshay baynnan metuwan gelana danddayoosona.

² Komppaasee darotoo huuphessa bagga malaatiya, maaginetiyaappe merettida marppe malabaynne xaafettida malaatay deꞌiyooba. Komppaasee suure oottiyo wodenne ubba qassi loꞌꞌo karttaara a goꞌettiyo wode, shemppuwaa ashshiyaabaa gidana danddayees. Amarida ogetun Yihoowa alꞌꞌo imota gidida zoriya wozanaara malatettana danddayees. (Yaaqooba 1:17) Zoriya wozanay baynnaakko, nuuni kaalettiyaabi xayin bayi attoos. Zoriya wozanaa bessiyaagaadan goꞌettiyaaba gidikko, nu ogiyaa demmanaadaaninne deꞌuwan suure ogiyaa kaallidi deꞌanaadan maaddana danddayees. Hegaa gishshau, zoriya wozanay aybakkonne i waati oottiyaakko ane beꞌoos. Hegaappe: (1) Zoriya wozanaa loohissana danddayiyo ogiyaa, (2) haratu zoriya wozanau qoppana koshshiyoy aybissaakkonne, (3) loꞌꞌo zoriya wozanay nuna waatidi goꞌꞌiyaakko, ha yohotun tobbana danddayoos.

ZORIYA WOZANAANNE I OOTTIYO OGIYAA

3. “Zoriya wozanaa” geetettida Giriike qaalau sitta birshshettay woygiyaagee? Zoriya wozanay asaa naatu xallau deꞌiya waatiyo abbiyaa malaatii?

³ Geeshsha Maxaafan “zoriya wozanaa” geetettida Giriike qaalau sitta birshshettay “ba huuphiyaa eriyoogaa” yaagiyooga. Saꞌaa bollan deꞌiya hara ubba meretattuppe dummatiya hanotan, Xoossay immido nu huuphiyaa eriyo abbee nuuyyo deꞌees. Nuuni eqqi ekkidi, kandduwan suurekkonne nu huuphiyaa pilggana danddayoos. Nu zoriya wozanay, nu oottiyoobaa, nu xeelaanne nu dooruwaa pilggidi markkattees woykko pirddees. Nuuni loꞌꞌo kuushshaa kuuyanaadan woykko iita kuushshaa kuuyiyoogaappe naagettanaadan kaaletuwaa immana danddayees. Hegaappe loꞌꞌobaa dooridoogan minttettanau woykko iitabaa dooridoogan keehippe azzananaadan oottidi wallassana danddayees.

4, 5. (a) Addaameyyoonne Hewaaniyyo zoriya wozanay deꞌiyoogaa waatidi erana danddayiyoo? Eti Xoossaa higgiyaa azazettennan ixxidoogan aybi gakkidee? (b) Kiristtaane ammanoy eqqanaappe kase deꞌida ammanettida asati bantta zoriya wozanaa goꞌettidoogaa bessiya leemisoti awugeetee?

⁴ Ha abbee attuma asaunne macca asau koyroppe doommidi meretan imettidaba. Addaameenne Hewaana banttau zoriya wozanay deꞌiyoogaa bessiyaabaa oottidosona. Eti nagaraa ootti simmin etau siyettida yeellaappe hegau naqaasha gidiyaabaa beꞌoos. (Doomettaabaa 3:7, 8) Azzanttiyaabay, qumꞌꞌiya zoriya wozanay he wodiyan eta goꞌꞌana danddayennaagaa. Eti Xoossaa higgiyaa eriiddi azazettennan ixxidosona. Hegaadan oottiyoogan, eti eriiddi Xoossaa Yihoowaara eqettiya makkalancha gidiyoogaa dooridosona. Polo asa gidiyoogaadan eti oottiiddi deꞌiyoobaa eroosona; hegaa gishshau, Xoossaakko simmanau danddayokkona.

⁵ Polo gidenna asaa naati daroy, Addaameeppenne Hewaanippe dumma hanotan bantta zoriya wozanaa siyoosona. Leemisuwau, ammanettida asa gidida Iyyoobi: “Ta xillotettaa mintta oiqqanaappe attin, xillotettaa aggikke; taani de7ido laitta ubban ta wozanai kahai tana walassenna” gaana danddayiis.a (Iyyooba 27:6) Iyyoobi tumukka wozannaama asa. Oottiyoobaaninne kuuyiyooban ba zoriya wozanay kaaletuwaa immanaadan oottidi, a akeekan ezggiya asa. Hegaa gishshau, tumuppe woppatettay siyettin, oottidoban yeellattiyoogaaninne mooranchadan xeelliyoogan zoriya wozanay bana walassennaagaanne barchiya bessennaagaa yootana danddayees. Iyyoobinne Daawiti immido zaaruwan deꞌiya dummatettaa akeeka. Yihooway tiyido kawuwaa Saaꞌoola bonchennan aggido wode, “Daawiti ba wozanan azzaniis.” (1 Sameela 24:5) Zoriya wozanay Daawita hegaadan walassidoogee, hegaappe guyyiyan hegaa mala boncho bessennaba oottiyoobaappe haakkanaadan tamaarissidi a goꞌꞌidoogee tuma.

6. Zoriya wozanay asaa naatu ubbau imettidaba gidiyoogaa bessiyaabay aybee?

⁶ Ha zoriya wozanaa imotay deꞌiyoy Yihoowa ashkkaratu xallaassee? Kiitettida PHauloosi geeshsha ayyaanay kaalettin xaafido qaalata qoppa: “Aihuda gidenna asau higgee baawa; shin banttana zoriya wozanan higgee azaziyoogaa oottoosona; etau higgee xayikkokka, eti bantta huupheyyo higge. Higgee azaziyoogee eta wozanaa giddon xaafettidoogaa eta hanotettai bessees; issi issitoo eta zoriya wozanai etau markkattiyo gishshaunne qassi issi issitoo eta qofai eta mootiyo gishshau, woikko qassi etaara gaaddetiyo gishshau, hegee tuma gidiyoogaa erissees.” (Roome 2:14, 15) Ubba Yihoowa higgiyaa mule erennaageetikka bantta zoriya wozanay denttettin Xoossaa baaso siraataara moggottiyaabaa oottoosona.

7. Issi issitoo zoriya wozanay bala ogiyan kaalettana danddayiyoy aybissee?

⁷ Gidikkonne, issi issi hanotatun zoriya wozanay bala gidida ogiyaa kaalettana danddayees. Aybissi? Komppaasiyaa biratappe merettidabaa matan wottiyaaba gidikko, huuphessa baggi malaatiyoogaappe hara ginaa malaatana danddayees. Qassi issi sohuwaa suure bessiya karttaara goꞌettana xayikko, komppaasiyaa goꞌꞌay he keena. Hegaadankka, nu huuphe xallaa siiqiyo nu wozanaa koshshan keehippe sugettiyaaba gidikko, nu kahay nuna bala ginaa kaalettana danddayees. Qassi suure gidida Xoossaa Qaalaa kaaletoy baynnan nu zoriya wozanaa goꞌettikko, keehi koshshiya daro allaalletun iitaa kehaappe shaakki erennan aggana danddayoos. Tumukka, nu zoriya wozanay suure oottanaadan, nuuyyo Yihoowa geeshsha ayyaanaa kaaletuwaa koshshees. PHauloosi: “Geeshsha Ayyaanai haariyo tana zoriya wozanai taani worddotennaagaa taayyo markkattees” yaagidi xaafiis. (Roome 9:1) Gidikkonne, nu zoriya wozanay Yihoowa Geeshsha ayyaanaara moggottiyoogaa waatidi geeshshi erana danddayiyoo? Loohissiyoogan hegaadan oottana danddayoos.

ZORIYA WOZANAA LOOHISSANA DANDDAYIYO OGIYAA

8. (a) Wozanay kahaa waati denttettana danddayii? Nuuni kuuyiyooban keehippe qoppana koshshiyaabay aybee? (b) Issi Kiristtaaniyau qumꞌꞌenna zoriya wozanay deꞌiyoogaa xallay ubbatoo gidennay aybissee? (Tohossa qofaa xeella.)

⁸ Zoriya wozanan baasettida kuushshaa waata kuuyuutee? Issi issi asati oottanau koyiyoobaa, bantta wozanaa qofaanne banttau siyettiyaabaa pilggidi kuuyiyaaba malatees. Hegaappe guyyiyan, “Hegee ta zoriya wozanaa qumꞌꞌiyaaba gidenna” gaana danddayoosona. Wozanaa koshshay keehippe wolqqaama; ubba kahaa denttettana danddayees. Geeshsha Maxaafay: “Asa wozani ubbabaappe aadhdhi cimmiyaabaanne keehi daro iita. A ooni eranau danddayii?” yaagees. (Ermmaasa 17:9) Yaatiyo gishshau, nu wozanaa koshshay keehippe xoqqu ootti xeelliyooba gidana bessenna. Hegaappe, nuuni kaseyidi qoppana koyiyoy, Xoossaa Yihoowa ufayssiyaaba.b

9. Xoossau yayyiyoogee woygiyoogee? Xoossau yayyiyoogee nu zoriya wozanaa aybaassi denttettana danddayii?

⁹ Nuuni kuuyiyo issi kuushshay tumuppe loohettida zoriya wozanan baasettidaagaa gidikko, hegee qonccissiyoy nu huuphe koshshaa gidennan Xoossau yayyiyoogaa. Hegaara moggiya issi leemisuwaa ane qoppa. Deriyaa ayssiya ammanettida Nahimiyau Yerusalaamen deꞌiya asaappe qaraxaanne issi issiban peeriyaa oychiyo maatay deꞌees. Gidikkokka i oychibeenna. Aybissi? I Xoossaa asaa huqqunnidi Yihoowa ufayssennabaa oottiyoogaa qoppanaukka mule koyibeenna. I: “Taani Xoossaassi yayyido gishshau, hegaadan oottabeikke” yaagiis. (Nahimiyaa 5:15) Wozanappe Xoossau yayyiyoogee woykko saluwan deꞌiya nu Aawaa azanttenna mala kumetta wozanaappe ayyo yayyiyoogee keehippe koshshiyaaba. A bonchiyoogaappe denddidaagan hegaadan yayyiyoogee, nuuni kuushshaa kuuyiyo wode Xoossaa Qaalaappe kaaletuwaa koyanaadan denttettees.

10, 11. Cammiya ushshaa uyiyoogaa xeelliyaagan oosuwan peꞌiya Geeshsha Maxaafaa baaso siraatati awugeetee? Hegeeta oosuwan peeshshiyo wode Xoossaa kaaletuwaa waati demmana danddayiyoo?

¹⁰ Leemisuwau, cammiya ushshaara gayttida allaalleta qoppa. Bullachaaninne hegaadan issippe shiiqiyo sohuwan nuuppe darota, Taani cammiya ushshaa uyana bessi woy bessennee? giyaagan kuuyiyoobay gayttees. Koyrottidi nu huuphiyaa loohissana koshshees. He allaalliyaa xeelliyaagan oosuwan peꞌiya Geeshsha Maxaafaa baaso siraatati awugeetee? Cammiya ushshaa bessiyaagaa keenaa uyiyoogaa Geeshsha Maxaafay diggenna. Woiniyaa imotau Yihoowa galatidoogee Geeshsha Maxaafan xaafettiis. (Mazamure 104:14, 15) Gidikkokka, likkiyaappe aatti uyiyoogaanne uyidi cabbottiyoogaa Geeshsha Maxaafay diggees. (Luqaasa 21:34; Roome 13:13) Hegaa bollakka, Geeshsha Maxaafay mattottiyoogaa, wodiraa laammiyoogaaranne bessenna asho gaytotettaa milatiya deexo nagaraara gattidi yootees.c—1 Qoronttoosa 6:9, 10.

¹¹ Issi Kiristtaaniyaa zoriya wozanay hegaa mala baaso siraatatun loohissuwaanne akeekissuwaa demmees. Yaatiyo gishshau, bullachaaninne hegaa mala issippe shiiqiyoosan ushshaa xeelliyaagan kuuyiyoobay nunan gayttiyo wode, nu huuphiyaa kaallidi deꞌiyaageetu mala oyshaa oychoos: ‘He sohuwan giigiyaabay aybee? Maara xayidi uyidi wocamiyoosa gidana danddayii? Ta huuphe koshshay aybee? Taani cammiya ushshau yeemottiyaanaa woy ayyo haarettiyaanaa woy tau siyettiyaabaanne ta eeshshaa laammanaadan an goꞌettiyaanaa? Taani ay keena uyana bessiyaakko ta huuphiyaa naagana danddayiyaanaa? Nuuni Geeshsha Maxaafaa baaso siraatatanne eti denttettiyo oyshata wotti dentti qoppiiddi, Yihoowa kaaletuwaa woosan oychana bessees. (Mazamure 139:23, 24) Hegaadan oottiyoogan Yihooway ba geeshsha ayyaanan nuna kaalettanaadan shoobboos. Qassi nu zoriya wozanay Xoossaa baaso siraatatuura moggottanaadan loohissoos. Gidikkonne, kuuyiyo wode akeekan qoppana bessiya harabaykka deꞌees.

HARATU ZORIYA WOZANAU QOPPANA BESSIYOY AYBISSEE?

12, 13. Kiristtaanetu zoriya wozanay dummatanaadan oottiya issi issi gaasoti awugeetee? Hegaa mala dummatettaa nuuni ayba ogiyan oyqqana bessii?

¹² Kiristtaanetu zoriya wozanay issoy issuwaappe keehi dumma gidiyoogan garamettana danddayaasa. Issi meeziyaa woy wogaa issi uri ixettiyaabadan xeellees; haray qassi doseesinne ixxiyo gaasoy baynnabadan xeellees. Leemisuwau, bullachaaninne hegaa mala issippe shiiqidosan uyiyoogaa xeelliyaagan, issi uri amarida laggetuura issippe omarssan uyiyoogan ufayttees; haray hegaa malabaa beꞌiyo wode dagammees. Hegaa mala dummatettay deꞌidoy aybissee? Hegee nu kuushshaa waati bochana bessii?

¹³ Daro gaasotun asay issoy issuwaappe dummatees. Diccido hanotan keehi daro dummatettay deꞌees. Leemisuwau, issoti issoti, hegaappe kase eti baaxiyaa oottido pacaa loyttidi eroosona; hegee eti ubbatoo xooni kiyibeennabaa gidana danddayees. (1 Kawotu 8:38, 39) Cammiya ushshaa xeelliyaagan hega mala asatu zoriya wozanay eti akeekan qoppanaadan oottana danddayees. Hegaa mala uri nena oychanau ne soo yiyo wode neeni ushshaa a shoobbikko, a zoriya wozanay i ixxis gaanaadan oottiyoogee bessiyaaba gidana danddayees. Hegee nena lanccissanee? Uyanaadan minttettuutee? CHii. Neeni i uyenna gaasuwaa erin aggin—hegaa mala sohuwan i asau yootana koyennaba gidana danddayees—i uyanaadan minttettenna mala ishatettaa siiqoy nena denttettees.

14, 15. Koyro xeetu laytta gubaaꞌetun deꞌidaageetu zoriya wozanan dummatettay deꞌidoy ayba allaalliyaanee? PHauloosi ayba zoriyaa immidee?

¹⁴ Koyro xeetu layttan deꞌida Kiristtaanetu zoriya wozanay darotoo keehippe dummatiyoogaa kiitettida PHauloosi akeekiis. He wode, issi issi Kiristtaaneta eeqau yarshshido qumaara gayttidaagan zoriya wozanay eta qumꞌꞌiis. (1 Qoronttoosa 10:25) Eeqau yarshshoogaappe guyyiyan giyan bayzettiya hegaa mala qumaa xeelliyaagan PHauloosa zoriya wozany a qumꞌꞌibeenna. Eeqay ayyo hadaba; koyroppekka gidin ay ogiyankka Yihoowaaba gidida qumay eeqatuba gidana danddayenna. Gidikkokka, PHauloosi ha allalliyan haratussi aagaa mala xeelay deꞌennaagaa akeekiis. Issoti issoti Kiristtaane gidanaappe kase eeqau goyniyoogan erettidaageeta gidana danddayoosona. Issi wode eeqaara gayttidabay aybinne hegeeti ixxiyooba. PHauloosi ha yohuwaa waati giigissidee?

¹⁵ PHauloosi: “Nuuni ammanuwan minnidaageeti daafuranchchatu toohuwaa tookkanau bessees; nuuni nu xalaalaa ufaissanau bessenna. Aissi giikko, harai atto Kiristtoosikka bana ufaissibeenna” yaagiis. (Roome. 15:1, 3) Kiristtoosi oottidoogaadan nuuni nu ishanttu koshshaa nuugaappe kaseyana koshshiyoogaa PHauloosi qonccissiis. PHauloosi hegaara gayttidabaa yootiiddi, Kiristtoosi ba shemppuwaa immido issi alꞌꞌo dorssaa xubbanaappe asho mule meennaagaa yootiis.—1 Qoronttoosa 8:13; 10:23, 24, 31-33.

16. Issi issibaa oottennaadan diggiya zoriya wozanay deꞌiyoogeeti banttaagaappe dummatiya zoriya wozanay deꞌiyoogeeta boriyoogaappe haakkana bessiyoy aybissee?

¹⁶ Hara baggaara, issi issibaa oottennaadan diggiya zoriya wozanay deꞌiyoogeeti, zoriya wozanaa xeelliya allaalliyan ubbaukka banttaagaa mala xeelay deꞌana bessees giidi borana bessenna. (Roome 14:10) Tumuppe, nu zoriya wozanaa nu huuphiyaa pirddanaassappe attin, haratu bolli pirddanau danddayissiyaabadan goꞌettana bessenna. “Xoossai intte bolli pirddenna mala, inttekka haratu bolli pirddoppite” yaagiya Yesuusa qaalaa hassaya. (Maatiyoosa 7:1) Issi ura zoriya wozanaara gayttida allaalletun palamettiyoogaappe gubaaꞌiyan deꞌiya ubbay haakkanau koyoos. Hegaappe, issoy issuwaa minttettiyoogan siiqoynne issippetettay aakkanaadan oottiyo ogiyaa koyoosippe attin, harata hidootaa qanxxissiyaaba oottanau koyokko.—Roome 14:19.

LOꞌꞌO ZORIYA WOZANAY DEMISSIYO GOꞌꞌATA

17. Ha wodiyan deꞌiya darotu zoriya wozanay waanidee?

¹⁷ Kiitettida PHeexiroosi: “Inttena zoriya wozanai geeshsha gido” yaagidi xaafiis. (1 PHeexiroosa 3:16) Xoossaa Yihoowa sinttan geeshsha gidida zoriya wozanay keehippe gita imota. Hegee ha wodiyan deꞌiya darotu zoriya wozanaa mala gidenna. PHauloosi “zoriya wozanai taman bonqqida biratan xuuggidobaadan donjjillida” asatubaa xaafiis. (1 Ximootiyoosa 4:2) Bonqqida biratan xuugettida ay bollankka malaatay kiyeesinne he sohoy donjjillees. Darotussi hayqqidaba mala gidida zoriya wozanay deꞌees—iitabaa oottiyo wode seerennaagaa, eqettennaagaa woykko bana mooranchadan xeelliyoogan woy yeellatiyoogan mootennaagaa keena donjjilliisinne malaatay a bolli kiyiis. Daro asay ha wodiyan bau mooranchaadan siyettiya xeelaa eriiddi aggibayees.

18, 19. (a) Bana mooranchadan xeelliyoogau woykko oottidoban yeellatiyoogau ayba goꞌꞌay deꞌana danddayii? (b) Nuuni hagaappe kase oottido nagaraappe simmi makkinkka zoriya wozanay nuna mootiyoogaa aggana xayikko, waatana danddayiyoo?

¹⁸ Bana mooranchadan xeelliyoogee nuuni balabaa oottidoogaa zoriya wozanay odiyo oge gidana danddayees. Hegaadan siyettiyaabay issi nagaranchay ba nagaraappe simmanaadan denttettiyo wode, keehi deexo nagaraykka atto geetettana danddayees. Leemisuwau, Kawuwaa Daawiti keehippe iitabaa oottidi, ba nagaraa gishshau zilꞌꞌettiis. SHin i wozanappe nagaraappe simmido gishshau a nagaray atto geetettiis. Ba oottido iita oosuwaa Daawiti shenetidoogeenne hegaappe simmidi Yihoowa higgiyau azazettanau murttidoogee, Yihooway “kehanne atto giyaagaa” gidiyoogaa i ba huuphe beꞌanaadan oottiis. (Mazamure 51:1-19; 86:5) Gidikkonne, nuuni nagaraappe simmidi atotettaa demmi simminkka, nuna mooranchaadan xeelliyoogeenne yeellatiyoogee aggennan siyettiyaaba gidikko waatana danddayiyoo?

¹⁹ Issito issito issi nagarachay bana mooranchadan xeelliyo xeelay nagaraappe simmin keehi gamꞌꞌidikka, a zoriya wozanay a mootananne keehippe pirddana danddayees. Hegaa mala hanotan, Yihooway asa qofaa ubbaappe gita gidiyoogaa nuna pirddiya wozanaa ammanttanau koshshana danddayees. Nuuni harati oottanaadan minttettiyoogaadan, a siiquwaanne a maarotaa ammanidi ekkana bessees. (1 Yohaannisa 3:19, 20) Hara baggaara, geeshsha gidida zoriya wozanay ha alamiyan daroppe beettenna garssa sarotettaa, woppatettaanne zawi baynna ufayssaa demissees. Issi wode deexo nagaaraa oottida daroti ha maalaalissiya woppaa demmidosonaanne ha wodiyan Xoossaa Yihoowayyo oottiyo wode loꞌꞌo zoriya wozanaa demmana danddayidosona.—1 Qoronttoosa 6:11.

20, 21. (a) Ha maxaafay neeni ay oottanaadan maaddanau giigidee? (b)  Kiristtaane gidiyoogan nuuni ayba laꞌatettaa demmiyoo? Gidikkokka he laꞌatettaa waatidi goꞌettana koshshii?

²⁰ Ha maxaafay, ha metuwan kumida Seexaanaa siraataa wurssetta gallassatun attida wodiyan loꞌꞌo zoriya wozanaara deꞌanaunne he ufayssaa demmanau nena maaddanaadan giigiis. Neeni qoppanaunne hachi hachi gakkiyaaban oosuwan peeshshanau koshshiya Geeshsha Maxaafaa higgetanne baaso siraatata ubbaa ha maxaafay aahuwan qonccissana danddayennaagee tuma. Hegaa bollankka, zoriya wozanaara gayttida allaalletun yaata woykko yaatoppa giya qoncce higgeta naagoppa. Ha maxaafaa halchoy neeni hachi hachi deꞌuwan Xoossaa Qaalaa waatada oosuwan peeshshanaakko xannaꞌiyoogan ne zoriya wozanaa loohissanaunne akeekissanau maaddanaassa. Muuse Higgiyaappe dumma hanotan ‘Kiristtoosa higgee,’ a kaalliyaageeti xaafettida higgeta naagiyoogaappe aaruwan bantta zoriya wozanaanne baaso siraataa kaallidi deꞌanaadan minttettees. (Galaatiyaa 6:2) Hegaa mala hanotan Yihooway Kiristtaanetuyyo daro laꞌatettaa immees. Gidikkonne, a Qaalay he laꞌatettaa “iitatetta genttiyoobaa” oottidi mule goꞌettennaadan nuna akeekissees. (1 PHeexiroosa 2:16) Hegaappe, hegaa mala laꞌatettay nuuni Yihoowayyo deꞌiya siiquwaa qonccissiyo maalaalissiya injjiyaa medhiyaaba gidees.

²¹ Geeshsha Maxaafaa baaso siraataadan loꞌꞌo ogiyan waanada deꞌanaakko woosan qoppiyoogaaninne hegaappe neeni kuuyidobaa oosuwan peeshshiyoogan, Yihoowa koyro erido wode doommido keehi koshshiyaabaa aggennan oottaasa. Neeni “iitaa kehaa shaakkiyo abbee” loohissuwaa demmiyoy “goꞌettiyoogaana.” (Ibraawe 5:14, NW) Geeshsha Maxaafan loohida ne zoriya wozanay, neeni deꞌido wode ubban nena maaddiyaaba gidana. Manddaridi biya urau kaaletuwaa immiya komppaasiyaadan, ne zoriya wozanay neeni saluwan deꞌiya ne Aawaa ufayssiya kuushshaa kuuyanaadan maaddees. Hagee neeni Xoossaa siiquwan deꞌiyo tumu oge.