Xoossaayyo Dirijjitee Deꞌiyoy Aybissee?

1. Xoossay beni Israaꞌeelata daraajjayidoy aybissee?

Xoossay Abrahaama zerettata issi dere ootti daraajjayidi, etau higgiyaa immiis. I he deriyaa “Israaꞌeela” giidi sunttiis; qassi tumu goynuwaanne ba qaalaa naaganaadan etau aawatettaa immiis. (Mazamure 147:​19, 20) Hegaa gishshau, saꞌaa asa ­ubbay Israaꞌeelatu baggaara goꞌettees.​—Doomettaabaa 22:18 nabbaba.

Xoossay Israaꞌeelati ba markka gidanaadan dooriis. Asay Xoossaa higgiyaa azazettiyoogan waani goꞌettana danddayiyaakko eta taarikee qonccissees. (Zaarettido Wogaa 4:6) Yaatiyo gishshau, Israaꞌeelatu baggaara hara asay tumu Xoossaabaa erana danddayees.​—Isiyaasa 43:​10, 12 nabbaba.

2. Tumu Kiristtaaneti daraajjayettana koshshidoy aybissee?

Guyyeppe, Israaꞌeelati Xoossan nashettiyoogee attin, Yihooway eta sohuwan Kiristtaane gubaaꞌiyaa essiis. (Maatiyoosa 21:43; 23:​37, 38) Ha wodiyan, tumu Kiristtaaneti Israaꞌeelatu gishshaa Yihoowa markka gididi oottoosona.​—Oosuwaa 15:​14, 17 nabbaba.

Yesuusi bana kaalliyaageeti citan Yihoowabaa markkattanaadaaninne ubba biittaappe asaa erissiyo ashkkara oottanaadan yootiis. (Maatiyoosa 10:​7, 11; 24:14; 28:​19, 20) Ha siraatay ­xayana haniyo ha wodiyan, he oosoy wuranau matattiis. Hanno gakkanau hani erenna hanotan, Yihooway ubba dere asaappe miilooniyan qoodettiyaageeta tumu goynuwan issippe shiishshiis. (Ajjuutaa 7:​9, 10) Tumu kiristtaaneti issoy issuwaa minttettanaunne maaddanau daraajjayettidosona. Eti alame yuushuwan bantta shiiqotun Geeshsha Maxaafaappe issi mala timirttiyaa tamaaroosona.​—Ibraawe 10:​24, 25 nabbaba.

3. Ha wodiyan Yihoowa Markkatu dirijjitee doommidoy ayba ogiyaanee?

Geeshsha Maxaafaa tamaareti daro wodiyau dogettida Geeshsha Maxaafaa tumaa, 1870 heeran zaarettidi akeekiyoogaa doommidosona. Haggaazanaadan Yesuusi Kiristtaane gubaaꞌiyaa darajjayidoogaa eti eridosona. Yaatiyo gishshau, eti ­zamachan Kawotettaabaa alame yuushuwan sabbakiyoogaa doommidosona. Eti 1931n Yihoowa Markkata giya sunttan xeesettiyoogaa doommidosona.​—Oosuwaa 1:8; 2:​1, 4; 5:42 nabbaba.

4. Yihoowa Markkati daraajjayettidoy ayba ogiyaanee?

Koyro xeetu layttan, daro biittan deꞌiya Kiristtaane gubaaꞌeti Yesuusi gubaaꞌiyau Huuphe gidiyoogaa ammanidi ekkida, bollaara heemmiyaagaa kaaletuwan goꞌettidosona. (Oosuwaa 16:​4, 5) Ha wodiyankka hegaadan, Yihoowa Markkati kaymida cimati deꞌiyo Bollaara Heemmiyaagaa kaaletuwan goꞌettoosona. Geeshsha Maxaafaa xannaꞌanau maaddiya xuufeta 600ppe ­dariya qaalan birshshanau, attamanaunne gubaaꞌetussi gattanau Yihoowa Markkatu macara biirotun oottiyoobaa Bollaara Heemmiyaagee kaallees. Yaatiyoogan, Bollaara Heemmiyaagee 100,000ppe dariya gubaaꞌeta Geeshsha Maxaafaa qofan minttetteesinne kaalettees. Ubba gubaaꞌetun, giday deꞌiyo attuma asati gubaaꞌe cima gididi oottoosona. He asati Xoossaa wudiyaa siiquwan heemmoosona.​—Oosuwaa:​2, 3 nabbaba.

Yihoowa Markkati mishiraachuwaa sabbakanaunne erissiyo ashkkara oottanau daraajjayettidosona. Kiitettidaageeti oottidoogaadan nuuni sooppe soo biidi sabbakoos. (Oosuwaa 20:​20, 21) Tumaa wozanappe siiqiyaageeti Geeshsha Maxaafaa xannaꞌanaadankka shoobboos. Yihoowa Markkatu dirijjitee issibaa oottanau daraajjayettidaba xalla gidenna. Nuuni siiqiya Aaway deꞌiyo so asa. Nuuni issoy issuwau qoppiya ishanttanne michontta. (2 Tasalonqqe 1:3) Yihoowa asay Xoossaa ufayssiyaabaa oottanaunne hara asaa maaddanau daraajjayettido gishshau, eti keehi ufayttiya asa.​—Mazamure 33:12; Oosuwaa 20:35 nabbaba.