Ribiqa Yihoowa Ufayssanau Koyaasu

Ribiqa Yihoowa siiqiya maccaasa. I azinaa sunttay Yisaaqa. Ikka Yihoowa siiqees. Ribiqa Yisaaqaara waana gayttadee? A Yihoowa ufayssanau koyiyoogaa waata bessadee? Ane koyro i azinaa Yisaaqabaa beꞌoos.

Yisaaqa aaway Abrahaama; qassi a ayyiyaa Saaro. Eti Kanaanen deꞌidosona; he biittaa asay Yihoowau goynnenna. SHin Abrahaami ba naꞌay Yihoowau goynniya macho ekkanaadan koyiis. Yaatiyo gishshau, Abrahaami ba dabboti deꞌiyo Kaaraaneppe Yisaaqassi macho oychanaadan ba ashkkaraa kiittiis; he ashkkaray Elꞌꞌeezara gidennan waayi aggana.

I Abrahaama ashkkaratu haratuura yaa biis. Eti biido sohoy keehi haaho. Eti shinqqiyaanne imotaa tammu gaameelan caanidi biidosona. Elꞌꞌeezari Yisaaqau doorana macho waatidi eranee? Elꞌꞌeezarinne aara biya ashkkarati Kaaraane gakkiyo wode, haattaa ollaa matan shemppidosona; ayssi giikko, Elꞌꞌeezari asay haattaa tikkanau sohuwaara yaanaagaa erees. I hagaadan giidi Yihoowa woossiis: ‘Taani tana haattaa ushshanaadan oychin tananne ta gaameelata haattaa ushshiya yelagiyaa neeni dooridooro gidiyoogaa taani hegan erana.’

He wode yelaga naꞌiyaa Ribiqa haattaa tikkanau yaasu. Geeshsha Maxaafay a keehi loꞌꞌiyoogaa yootees. Elꞌꞌeezari bana haattaa ushshanaadan oychin a, “Hekko uya; qassi ne gaameelatakka taani ushshana” yaagaasu. Saamettida gaameelati keehi daro haattaa uyoosona; Ribiqa haattaa duuqqanau ollaakko aapputoo simerettidaakko ane qoppa! A ay keena daafurada oottiyaakko ha misiliyan beꞌay?— Elꞌꞌeezari ba woosaa Yihooway waati zaaridaakko eridi garamettiis.

Elꞌꞌeezari Ribiqissi loꞌꞌiya daro imotaa immiis. A Elꞌꞌeezaranne hara ashkkarata bantta soo shoobbaasu. Elꞌꞌeezari Abrahaami bana aybissi kiittidaakko, qassi Yihooway ba woosaa waati zaaridaakko yootiis. Ribiqintta soo asay o Yisaaqau ufayttidi immidosona.

SHin Ribiqa Yisaaqa gelanau koyadeeshsha?— Ribiqa Elꞌꞌeezara Yihooway kiittidoogaa eraasu. Yaatiyo gishshau, Ribiqintta soo asay Kanaane baada Yisaaqa gelanau koyiyaakkonne o oychin a, ‘Ee; taani baana koyays’ yaagaasu. A Elꞌꞌeezaraara baanau kiya aggaasu. Eti Kanaane gakkin, a Yisaaqa gelaasu.

Ribiqa Yihooway ippe koyiyoobaa oottido gishshau, Yihooway o anjjiis. Daro layttaappe guyyiyan, Yesuusi i zerettaappe yelettiis! Neeni Ribiqiigaadan Yihoowa ufayssikko, i nenakka anjjana.