A Ba Aawaanne Yihoowa Ufayssaasu

Ha misiliyan deꞌiya naꞌiyo beꞌay?— A Yofttaahe naꞌiyo. Geeshsha Maxaafay i sunttaa yootenna; shin a ba aawaanne Yihoowa ufayssidoogaa nuuni ereettees. Ane ibaanne i aawaa Yofttaahebaa beꞌoos.

Yofttaahee loꞌꞌo asa; qassi i Yihoowabaa ba naꞌiyo daro saatiyau tamaarissees. I mino asa; qassi loꞌꞌo daanna. Hegaa gishshau, Israaꞌeelati bantta morkketuura olettiyo olan i banttana kaalettanaadan oychidosona.

Yofttaahee xoonanau Xoossay bana maaddanaadan woossiis. Yofttaahee olan xoonikko, soo simmiyo wode a mokkanau a sooppe koyro kiyiya oonanne Yihoowau immanau shiiqettiis. He kiyiya uri ba deꞌo laytta ubban Xoossaa dunkkaaniyan oottananne hegaa heeran deꞌana koshshees. He wode asay dunkkaaniyan Xoossau goynnees. Yofttaahee olan xooniis! I soo simmiyo wode a mokkanau a sooppe koyro kiyiday oonakko eray?—

Ee, Yofttaahe naꞌiyaa kiyaasu! Yofttaahessi ippe hara naꞌi baawa; i qassi o moyssi yeddana koshshees. Hegan i keehi azzaniis. SHin i shiiqettidoogaa hassaya. A naꞌiyaa sohuwaara, ‘Ta aawau, neeni Yihoowau shiiqettido gishshau, hegaa pola’ yaagaasu.

Yofttaahe naꞌiyaakka azzanaasu. A biyoosan gelananne naꞌa yelana danddayukku. SHin, a ba aaway shiiqettidobaa polanaunne Yihoowa ufayssanau keehi koyaasu. Hegee azina geliyoogaappe woy naata yeliyoogaappe iyyo keehi aadhiyaaba. Hegaa gishshau, a sooppe kiyada ba deꞌo laytta ubban Xoossaa dunkkaaniyan oottaasu.

A oottidobay i aawaanne Yihoowa ufayssidee?— Ee, ufayssiis! Neeni azazettiyaabanne Yihoowa siiqiyaaba gidikko Yofttaahe naꞌee mala gidana danddayaasa. Neenikka ne aaway, ne aayyiyaanne Yihooway keehi ufayttanaadan oottana.