Nerkka Deꞌiyaabadan Qoppada Yayya Eray?

Misiliyan guutta naꞌaa beꞌa. I barkka deꞌiyaabadan qoppidi yayyidaba milatennee? Neeni hegaadan hana eray?— Ubba asaykka issi issitoo hegaadan hanees. Geeshsha Maxaafay Yihoowa dabbo gidida, barkka deꞌiyaabadan qoppidi yayyida asatubaa yootees. Etappe issoy Eelaasa. Ane abaa beꞌoos.

Eelaasi Yesuusi yelettido wodiyaappe daro layttaa kasetidi Israaꞌeelan deꞌiis. Israaꞌeela biittaa kawoy Akaabi tumu Xoossau Yihoowau goynnenna. Akaabinne a machiyaa Elzzaabeela Baꞌaala giyo worddo xoossau goynnoosona. Hegaa gishshau, Israaꞌeela asaappe dariya baggay Baꞌaalau goynniyoogaa doommiis. Kawiyaa Elzzaabeela keehi iita asa gidiyo gishshau, Eelaasanne Yihoowau goynniya hara asaa ubbaa woranau koyaasu! Eelaasi waatidaakko eray?—

Eelaasi baqatiis! I haaho sohuwaa biidi qosettiis. I hegaadan oottidoy aybissee?— Ee, i yayyiis. SHin Eelaasi yayyana koshshenna. Ayssi giikko, i Yihooway bana maaddanaagaa erees. Hegaappe kase Yihooway Eelaasau ba wolqqaa bessiis. Issi wode, Yihooway Eelaasa woosaa siyidi saluwaappe tamaa yeddiis. Hegaa gishshau, Yihooway Eelaasa maaddana!

Eelaasi qosetti uttidaashin Yihooway a, ‘Hagan ay oottay?’ yaagidi oychiis. Eelaasi hagaadan giis: ‘Neessi goynniyay ta xalaala. Taani tarkka attaas; tana asay worana gaada yayyaas.’ Eelaasi Elzzaabeela Yihoowau goynniya harata ubbaa worissaychidabadan qoppiis. Gidoppe attin, Yihooway Eelaasau, ‘CHii, hegee tuma gidenna. Haꞌꞌikka tau goynniya 7,000 asati deꞌoosona. Minna. Neeni tau oottanabay deꞌees’ yaagiis. Eelaasi hegaa siyidi ufayttideeshsha?—

Eelaasa hanotaappe ay tamaarana danddayay?— Nerkka deꞌiyaabadan qoppada yayyana koshshenna. Neeyyo Yihoowakka nenakka siiqiya laggeti deꞌoosona. Yihooway keehi wolqqaama gidiyo gishshau, nena ubbatoo maaddees! Neeni awudenne nerkka deꞌennaagaa eriyo gishshau ufayttikkii?—