Eti Yesuusabaa Xaafidosona

Misiliyan deꞌiya asata beꞌay?— Eti Maatiyoosa, Marqqoosa, Luqaasa, Yohaannisa, PHeexiroosa, Yaaqooba, Yihudaanne PHauloosa. Eti ubbaykka Yesuusi saꞌan deꞌiyo wode deꞌidosona; qassi Yesuusabaa xaafidosona. Ane etabaa loytti tamaaroos.

He asatuppe heezzati Yesuusaara issippe sabbakidaageeta. He heezzati oonakko eray?— Maatiyoosa, Yohaannisanne PHeexiroosa. Kiitettida Maatiyoosinne Yohaannisi Yesuusa loytti eroosona; qassi huuphiyan huuphiyan Yesuusa deꞌuwaabaa issi maxaafaa xaafidosona. Yohaannisi Ajjuutaa maxaafaanne Koyro Yohaannisa, Naaꞌꞌantto Yohaannisanne Heezzantto Yohaannisa geetettiya dabddaabbetakka xaafiis. Kiitettida PHeexiroosi naaꞌꞌu dabddaabbeta xaafiis. Eti Koyro PHeexiroosanne Naaꞌꞌantto PHeexiroosa geetettoosona. PHeexiroosi ba naaꞌꞌantto dabddaabbiyan Yihooway saluwaappe Yesuusa haasayissido wode, ‘Hagee ta naꞌaa. Taani a siiqays; qassi an ufayttays’ yaagidoogaa xaafiis.

Misiliyan deꞌiya hara asatikka xaafido maxaafaappe nuuni Yesuusabaa tamaaroos. Etappe issoy Marqqoosa. I Yesuusi oyqettido wode hanida ubbabaa beꞌennan aggenna. Haray qassi Luqaasa. I aakime; qassi i Kiristtaane gididoy Yesuusi hayqqi simmiina gidennan aggenna.

Geeshsha Maxaafaa xaafetuppe misiliyan beꞌiyo hara naaꞌꞌati Yesuusa kaalo ishantta. Eta sunttaa eray?— Eta sunttay Yaaqoobanne Yihudaa. Koyro eti Yesuusa ammanibookkona. Eti ubba i gooyees giidi qoppidosona. SHin eti guyyeppe Yesuusa ammanidi Kiristtaane gididosona.

Misiliyan neeni beꞌiyo haray PHauloosa. Kiristtaane gidanaappe kase a sunttay Saaꞌoola. I Kiristtaaneta ixxees; qassi etau keehi iita. PHauloosi Kiristtaane gididoy aybissakko eray?— Issi gallassi, PHauloosi oge biishin i qoppennan issi uri a saluwaappe haasayissiis. Haasayissidaagee Yesuusa! I PHauloosa, ‘Tana ammaniyaageetussi neeni keehi iitiyoy aybissee?’ yaagidi oychiis. Hegaappe simmin, PHauloosi laamettidi Kiristtaane gidiis. PHauloosi Geeshsha Maxaafan Roomeppe biidi Ibraawe gakkanaassi deꞌiya 14 maxaafaa xaafiis.

Nuuni Geeshsha Maxaafaa galla galla nabbabana koshshennee?— Geeshsha Maxaafaa nabbabiyoogan Yesuusabaa darobaa tamaaroos. Neeni tamaaranau koyay?—