Ximootiyoosi Asaa Maaddanau Koyiis

Ximootiyoosi asaa maaddiyoogan ufayttiya yelaga. I harata maaddanau daro sohuwaa biis. Hegaa gaasuwan, i keehi ufayssiya deꞌo deꞌiis. He deꞌuwaabaa siyanau koyay?—

Ximootiyoosi diccido katamay Lisxxira geetettees. A aayyiyaa Loydanne a aayee aayyiyaa Euniiqa Yihoowabaa a naatettan tamaarissiyoogaa doommidosona. Ximootiyoosi diccidi, harati Yihoowabaa tamaaranaadan maaddanau koyiis.

Ximootiyoosi yelagatettan hara sohuwaa banaara biidi sabbakanaadan PHauloosi oychiis. Oychin Ximootiyoosi, ‘Ero!’ yaagiis. I harata maaddanau baanau giigi uttiis.

Ximootiyoosi PHauloosaara Maqidooniyan deꞌiya Tasalonqqe giyo katamaa biis. Eti yaa gakkanau adussa ogiyaa hemetti simmidi wolwoluwaa toggidi biidosona. Eti wurssettan yaa gakkidi, daro asay Yihoowabaa tamaaranaadan maaddidosona. SHin amarida asay eta bolli hanqqettidi eta qohanau maliis. Hegaa gishshau, PHauloosinne Ximootiyoosi he katamaappe kiyidi hara sohuwan sabbakidosona.

Guutta aginaappe simmin, Ximootiyoosi Tasalonqqe guyye biidi ishantti waani deꞌiyaakko beꞌanaadan PHauloosi oychiis. He iita katamaa guyye baanau keehi xalana koshshees! SHin Ximootiyoosa yan deꞌiya ishanttubay qofissido gishshau, i biis. I PHauloosau mishiraachuwaa ekkidi simmiis. Tasalonqqen deꞌiya ishanttu hanotay keehi loꞌꞌo!

Ximootiyoosi PHauloosaara daro layttau oottiis. Gubaaꞌiyaa maaddanaadan yeddana danddayiyo loꞌꞌo asi Ximootiyoosa gidiyoogaa PHauloosi issi wode xaafiis. Ximootiyoosi Yihoowanne asaa siiqees.

Asaa siiqay, qassi eti Yihoowabaa tamaaranaadan maaddanau koyay?— Yaatikko, neenikka Ximootiyoosadan ufayssiya deꞌo deꞌana danddayaasa.