Kawotettaa Oosuwawu Miishshaa Waatidi Demmiyoo?

1, 2. (a) Woosa Keettan haggaaziyaagee Geeshsha Maxaafaa Tamaareti bantta oosuwawu miishshaa waati demmiyaakko eranawu oychin Ishaa Rasili woygi zaaridee? (b) Nuuni ha shemppuwan ay beꞌanee?

ISSI wode Riformid CHerch giyo Woosa Keettan haggaaziyaagee Geeshsha Maxaafaa Tamaareti bantta oosuwawu miishshaa waati demmiyaakko eranawu Ishaa Rasila oychiis.

Ishaa Rasili, “Nuuni muxuwaataa mule shiishshokko” yaagiis.

He bitanee, “Miishshaa awuppe demmeetii?” yaagiis.

Rasili assi hagaadan giidi zaariis: “Taani neeyyo tumaa yootana shin neeni hegaa ammanakka. Nu shiiquwan muxuwaataa yeggiyoobaa yuushshokko. SHin nu shiiquwaa yiya asay miishshay koshshiyoogaa akeekees. Eti, ‘Ha addaraashawu miishsha koshshees . . . Taani hegawu guutta miishshaa waatada immana danddayiyaanaa?’ yaagidi qoppoosona.”

He bitanee ba wozanan siriiddi Ishaa Rasila xeelliis.

Rasili kaallidi hagaadan giis: “Taani neeyyo tumaa yootays. Eti tana, ‘Taani hegawu guutta miishshaa waatada immana danddayiyaanaa?’ yaagidi oychoosona. Issi uri miishsha demmiyo wode, i hegaa Godawu goꞌettanawu koyees. Assi miishshi baynnaba gidikko, i hegaadan oottanaadan nuuni ayssi denttettiyoo?”a

² Ishaa Rasili “tumaa” yootiis. Xoossaa asay beniisappe doommidi tumu goynuwawu miishshaa ba dosan immees. Hegaadan oottidoogaa Geeshsha Maxaafay odiyo amaridabaanne ha wodiyan oosettiyaabaa ha shemppuwan pilggana. Kawotettaabaa oosuwawu ha wodiyan miishshaa awuppe demmiyaakko tobbiyo wode, nuuni ubbay, ‘Taani Kawotettaabaa oosuwaa maaddiyoogaa waata bessana danddayiyaanaa?’ giidi nuna oychana koshshees.

Yihoowayyo “Immiyoobaa Ehaanau Koyiya Ooninne” Eho

3, 4. (a) Yihooway baassi goynniyaageeti ay oottanaagaa ammanettii? (b) Israaꞌeelati gayttiyo dunkkaaniyaa keexxiyo oosuwan waati maaddidonaa?

³ Yihooway tumuppe baassi goynniyaageetun ammanettees. Eti immana koshshiyo wode bantta dosan ufayssan immiyoogan, baassi aqidoogaa bessanaagaa i erees. Israaꞌeelatu wode hanidabaappe naaꞌꞌu leemisuwaa ane beꞌoos.

⁴ Yihooway Israaꞌeelata Gibxxeppe kessi simmidi, goynuwawu gayttiyo dunkkaaniyaa keexxanaadan etawu yootiis. Hegaa keexxanawu daro miishshaa koshshees. Yihooway asay hegaa miishshan maaddanawu, “GODAAYYO immiyoobaa ehaanau koyiya ooninne” ehaana mala Muusee etawu yootanaadan azaziis. (Kes. 35:5) “Daafurssiya ooso ubbaa qareti bainnan” ootissiyaageetuppe naxa kiyidi takkibeenna asay waatidee? (Kes. 1:14) Eti daro worqqaa, biraanne hara alꞌꞌo miishshaa bantta dosan immiyoogan maaddidosona; hegaappe dariya baggay eta aylletettan haarida Gibxxetuppe ehiidoogaa gidennan waayi aggana. (Kes. 12:35, 36) Israaꞌeelati koshshiyaagaappe daruwaa ehiido gishshawu, ‘ehiyoogaa aggi bayanaadan’ odettiis.—Kes. 36:4-7.

5. Beeta maqidasiyaa keexxiyoogan Israaꞌeelati maaddana mala Daawiti oychin eti waatidonaa?

⁵ Daawiti 475 gidiya layttay aadhi simmin, beeta maqidasiyaa keexxiyoogaa maaddanawu ba “buzo” aquwaappe immiis; he keettay saꞌan tumu goynuwaa goynniyo soho. Yaati simmidi i, “Intteppe hachchi ba sheniyan GODAAYYO kehidi immanai oonee?” yaagidi, ba mala Israaꞌeelata oychiis. Oychin “asai ba sheniyan ba kumetta wozanan GODAAYYO” immiis. (1 Odi. 29:3-9) Daawiti eti immidobaa ooppe demmidaakko akeekido gishshawu, Yihoowakko woossiyo wode, “Ubbabai neeppe yees; nuuni ne kushiyaappe ekkidobaa neeyyo zaaretti immida” yaagiis.—1 Odi. 29:14.

6. Kawotettaa oosuwaa ha wodiyan oottanawu miishshay koshshiyoy aybissee, qassi ayba oyshata oychana danddayiyoo?

⁶ Muuseekka Daawitikka Xoossaa asay immanaadan giddibookkona. Asay ba wozanan qoppidoogaa immiis. Ha wodiyan shin? Xoossaa Kawotettaara gayttidabaa oottanawu miishsha koshshiyoogaa nuuni loyttidi eroos. Geeshsha Maxaafaanne a qofay deꞌiyo xuufeta attamissanawunne asawu immanawu, shiiqiyo sohotanne macara biirota keexxanawunne loytti oyqqanawu, qassi daafabay gakkido nu mala Kiristtaaneta koshshiyaaban sohuwaara maaddanawu daro miishshaa koshshees. Yaatiyo gishshawu, ‘Koshshiya miishshaa waati demmiyoo? Kawuwawu haarettiyaageeta miishshaa immanaadan denttettana koshshii?’ yaagiya keehi koshshiya oyshata oychiyoogee bessiyaaba.

“Ha Maxeetee Asi Maaddanaadan Mule Woossenna”

7, 8. Yihoowa asay harati miishshaa immanaadan woossennay aybissee?

⁷ Ishaa Rasilinne a laggeti Kiristtaane giyo woosa keettati miishshaa demmanawu oottiyo meeze gidida oosuwaa malaa oottokkona. Naaꞌꞌantto Wochiyo Keelaa maxeetiyan “‘Xiyoone Wochiyo Keelaa’ Doseetii?” giya huuphe yohuwaa giddon Rasili hagaadan giis: “‘Xiyoone Wochiyo Keelaa’ attamanaadan maaddiyaagee YIHOOWA gidiyoogaa ammanoos; yaatiyo gishshawu, ha maxeetee asi maaddanaadan mule woossenna. ‘Birai tabaa; worqqaikka tabaa’ yaagida Xoossay koshshiya miishshaa immennan aggiyo wode, hegee maxeetiyaa attamissiyoogaa aggiyo wode gidiyoogaa eroos.” (Hag. 2:7-9) Hegaappe simmin 130⁠ppe dariya layttay aadhin ha wodiyankka, Wochiyo Keelaynne a attamissiya dirijjitee keehi erettiyaageeta!

⁸ Yihoowa asay miishshaa demmanawu woossenna. Eti shiiquwan muxuwaataa yeggiyoobaa yuushshokkona woy miishshaa oychanawu dabddaabbiyaa kiittokkona. Eti miishshaa demmanawu giidi dumma dummabaa oottokkona. Eti Wochiyo Keelay daro wodiyaappe kase hagaadan yootidoogaadan oottoosona: “Nuuni hara woossa keettati oottiyoogaadan Godaassi giidi miishshaa oychiyoogee likke giidi mule qoppi erokko . . . Godaa sunttan dumma dumma ogiyan woossidi miishshaa demmiyoogee Godaa bonchissennabanne i koyennaba giidi qoppoos; qassi he miishshaa immiyaageetikka an oosettiya oosoykka anjjettokkona.”b

“Immiya Urai Huuphen Huuphen Ba Wozanan Qoppidobaa Immo”

9, 10. Nuuni nu dosan immanaadan oottiya issibay aybee?

⁹ Imotaa immanaadan ha wodiyan Kawotettawu haarettiya nuna giddana koshshenna. Hegaappe dumma ogiyan, nu miishshaanne nuussi deꞌiya harabaa Kawotettaa oosuwaa maaddanawu ufayssan immoos. Nuuni hegaadan nu dosan immiyoy aybissee? Ane heezzu qofaa beꞌa.

¹⁰ Koyruwan, nuuni Yihoowa siiqiyo gishshawunne ‘a ufayssiyaabaa oottana’ koyiyo gishshawu, nu dosan immoos. (1 Yoh. 3:22) Yihooway bantta wozanan qoppidobaa immiya baassi goynniyaageetun keehi ufayttees. Kiristtaaneti immiyoogaa xeelliyaagan Kiitettida PHawuloosi yootidobaa ane pilggoos. (2 Qoronttoosa 9:7 nabbaba.) Tumu Kiristtaanee immanawu koyenna ura woy giddin immiya ura gidenna. I ‘ba wozanan qoppido’ gishshawu immees.c Yaatiyo gishshawu, immana koshshiyoobaanne hegawu i immana danddayiyoobaa qoppidi immees. “Xoossai ufaissan immiya uraa siiqiyo gishshau,” hegaadan immiya uran Yihooway ufayttees. Hara Geeshsha Maxaafaa birshshettay, “Immiyoogaa dosiyaageeta Xoossay siiqees” yaagees.

11. Nuuni Yihoowawu keehi loꞌꞌobaa immanaadan denttettiyaabay aybee?

¹¹ Naaꞌꞌanttuwan, Yihooway nuna daroban anjjido gishshawu a galatanawu nu aquwaappe immoos. Muuse Higgiyan deꞌiya, wozanaa qoranaadan oottiya maaraa ane beꞌa. (Zaarettido Wogaa 16:16, 17 nabbaba.) Layttan layttan heezzu baalata bonchiyo wode Israaꞌeela attuma asa ubbaykka Yihooway “anjjidoogaa keenaa” imotaa assi immana koshshees. Hegaa gishshawu, Israaꞌeela attuma asi baalaa bonchanawu baanaappe kase ay keena imotaa immana danddayiyaakko ba demmido anjjuwaa qoodananne ba wozanaa qorana koshshees. Hegaadankka, Yihooway nuna anjjido darobaa wotti denttidi qoppiyo wode ayyo keehi loꞌꞌo imotaa immanawu koyoos. Nuuni immiyo miishshaa gujjin, wozanappe immiyo imotay Yihooway nuussi immido anjjuwaa nuuni ay keena nashshiyaakko bessees.—2 Qor. 8:12-15.

12, 13. Nuuni nu dosan immiyoobay nu Kawuwaa siiqiyoogaa waati bessii, qassi issi uri ay keenaa immii?

¹² Heezzanttuwan, nu dosan immiyoogan nu Kawuwaa Yesuus Kiristtoosa siiqiyoogaa bessoos. Waatidi? Yesuusi saꞌan deꞌido wurssetta qammi ba erissiyo ashkkaratussi yootidobaa akeeka. (Yohaannisa 14:23 nabbaba.) Yesuusi, “Tana siiqiya ooninne ta qaalaa naagana” yaagiis. Yesuusa “qaalaa” geetettidabaappe issoy Kawotettaa mishiraachuwaa saꞌa ubban odanaadan i azazidoogaa. (Maa. 24:14; 28:19, 20) Kawotettaa mishiraachoy ubbasan odettanaadan nu wodiyaa, nu wolqqaanne nu aquwaa nuuyyo danddayettida ubban goꞌettiyoogan he “qaalaa” naagoos. Yaatiyoogan, nuuni Mase Kawuwaa siiqiyoogaa bessoos.

¹³ Ee, nuuni Kawotettawu ammanettidi haarettiyaageeta gidiyo gishshawu, miishshaa immiyoogan Kawotettaa oosuwaa wozanappe maaddiyoogaa bessanawu koyoos. Nuuni hegaadan waatidi oottiyoo? Hegee issi uri buzo kuuyiyooba. Ubba asay baassi danddayettidaagaa keenaa keehi loꞌꞌobaa immees. SHin nu mala Kiristtaanetuppe daroti hiyyeesa. (Maa. 19:23, 24; Yaaq. 2:5) Gidoppe attin, wozanappe koyidi immiyo guuttabaakka Yihoowaynne a Naꞌay nashshiyoogaa eriyoogee hegaa mala asata minttettana danddayees.—Mar. 12:41-44.

Miishshaa Asaappe Waati Ekkiyoo?

14. Yihoowa Markkati bantta xuufeta asawu immiyo wode daro layttawu waatidonaa?

¹⁴ Yihoowa Markkati daro layttawu Geeshsha Maxaafaa qofay deꞌiyo xuufeta miishshaa qanxxissidi asawu immidosona. Daro miishshi baynna urikka xuufiyaa ekkana mala, immanaadan oychiyo miishshay keehi guutta. Issi uri koyiiddi miishsha qanxxana danddayennaba gidikko, Kawotettaabaa aassiyaageeti assi xuufiyaa immanawu keehi koyoosona. Eti xuufiyaa nabbabidi goꞌettana danddayiya ashkke urawu immanawu wozanappe koyoosona.

15, 16. (a) Bolla Gididi Heemmiyaagee nuuni xuufiyaa asawu immiyo ogiyaa xeelliyaagan 1990n laammidobay aybee? (b) Asay ba dosan miishshaa waatidi immii? (“Nuuni Immiyo Miishshan Oosettiyaabay Aybee?” giya saaxiniyaakka xeella.)

¹⁵ Bolla Gididi Heemmiyaagee nuuni xuufiyaa asawu immiyo ogiyaa 1990n laammiyoogaa doommiis. He layttaappe doommidi Amarkkan ubba xuufiyaakka asay ba dosan miishshaa immidi ekkees. He biittan deꞌiya gubaaꞌetussi xaafettida dabddaabbee hagaadan gees: “Aassiyaageetussinne koyiya hara asaassi hagaa keena miishshaa koshshees geennan maxeetiyaanne xuufiyaa etawu immana bessees. . . . Nu oosuwawu kessidobaa miishshan maaddanawu koyiya ooninne maaddana danddayees; shin maaddin agginkka xuufiyaa ekkana danddayees.” ‘Nuuni Xoossaa qaalaa walakkidi zalꞌꞌiyaageeta’ gidennan, nu oosoy dosan oottiyo haymaanoote ooso gidiyoogaa hegee loytti qonccissiis. (2 Qor. 2:17) Hegaappe simmin, kumetta saꞌan deꞌiya macara biirotunkka, hegaadan asay miishshaa ba dosan immiyoogaa doommiis.

¹⁶ Asay ba dosan miishshaa waatidi immii? Yihoowa Markkatu Kawotettaa Addaraashan asay miishshaa yeggiyo saaxineti deꞌoosona. Asay ba dosan immiyo miishshaa hegan yeggana woy Yihoowa Markkatu dirijjitiyawu kiittana danddayees. Asay ba dosan miishshaa waati immana danddayiyaakko layttan layttan Wochiyo Keelan issi huuphe yohuwan odettees.

Miishshaa Waati Goꞌettiyoo?

17-19. (a) Kumetta saꞌan oottiyo oosuwawu, (b) kumetta saꞌan Kawotettaa Addaraashaa keexxanawunne (c) gubaaꞌee kessiyoobawu asay immiyo miishshaa waati goꞌettiyaakko qonccissa.

¹⁷ Kumetta saꞌan oottiyo oosuwaa. Kumetta saꞌan sabbakiyo oosuwaa oottanawu hegawu shiiqida miishshaa goꞌettoos. Kumetta saꞌan asawu immiyo xuufiyaa giigissanawu, macara biirotanne Beeteele keettata keexxanawunne loytti oyqqanawu, qassi dumma dumma tiꞌokiraase timirtte keettawu koshshiyaabaa kunttanawu kessiyo miishshay hegaappe amaridaagaa. Hegaa bollikka, misoonaawetussi, yuuyidi xomoosiyaagetussinne dumma aqinyetussi koshshiyaabaa kunttanawu he miishshaa goꞌettoos. Qassi nu mala Kiristtaaneta daafabay gakkiyo wode, nuuni immiyo miishshan sohuwaara maaddoos.d

¹⁸ Kumetta saꞌan Kawotettaa Addaraashaa keexxiyoogaa. Gubaaꞌeti Kawotettaa Addaraashaa keexxanaadan woy wotti yeggi giigissanaadan hegawu shiiqida miishshaa goꞌettoos. SHiiqida miishshaa yeddiyo wode, hara gubaaꞌeta maaddana danddayettees.e

¹⁹ Gubaaꞌee kessiyo miishshaa. Kawotettaa Addaraashaa loytti oyqqanawu hegawu shiiqida miishshaa goꞌettoos. He miishshaappe amaridaagee kumetta saꞌan oosettiya oosuwaa maaddanawu imettana mala macara biiruwawu kiittanawu cimati qofaa qachana danddayoosona. He wode, cimati gubaaꞌee kuuyanaadan oychoosona. Kuuyikko, he miishshaa kiittoosona. Gubaaꞌiyan miishshaara gayttidabaa oottiya ishay aginan aginan hisaabiyaa irpporttiyaa giigissin, hegee gubaaꞌiyan nabbabettees.

20. Ne “duretettan” Yihoowa waatada bonchana danddayay?

²⁰ Kumetta saꞌan Kawotettaa mishiraachuwaa sabbakiyoogaaranne erissiyo ashkkara oottiyoogaara gayttidaagan oosettiya ubbabaa qoppiyo wode, nuuni Yihoowa ‘nu duretettan bonchanawu’ wozanappe koyoos. (Lee. 3:9, 10) Nu duretettaappe amaridaagee nuuni asatettan, qofaaninne ayyaanaaban oottana danddayiyoobaa. Nuuni Kawotettaabaa oottanawu danddayettida ubban hegaa goꞌettana koyiyoogee qoncce. SHin, nu aqoykka nu duretettaappe issuwaa gidiyoogaa hassaya. Danddayiyo wode nu wolqqa keenaa immanawu murttidaageeta gidoos. Nuuni dosan immiyoobay Yihoowa bonchissees; qassi nuuni Mase Kawotettaa oosuwaa maaddiyoogaa bessees.