SHAAHO OYDDA
Zilꞌꞌettiyoogaa—“Ta Nagaraappe Tana Geeshsha”
“Ta ooratta oosoy nu soo asay kaseegaappe ishalidi deꞌanaadan maaddiis; shin taani Yihoowa ufayssenna darobaa oottanaadankka denttettiis. Baalaa bonchiyoogaa, polotikaara gayttidabaa oottiyoogaa, ubba woosa keetti biyoogaa doommaas. Taani Yihoowa Markka gidikkonne, 40 layttawu gubaaꞌiyaappe haakkada takkaas. Taani hegaadan hanidaashin daro wodee aadhido gishshawu mule Yihoowa maarotaa demmana danddayennabadan qoppaas. Ubbaa taani ta huuphiyawukka atto gaana danddayiyaabadan qoppabeykke. Hegaa bollikka, bashshawu efiya ha ogiyan hemettiyoogaa doommanaappe kasekka tumaa erays.”—Martto.
ZILꞌꞌETTIYOOGEE keehi narphiya tooho mala. Kawuwaa Daawiti, “Ta iitatettai di7uwaadan tana muukkiis; denddenna gita toohuwaadan taayyo deexxees” yaagiis. (Mazamure 38:4) Issi issi Kiristtaaneti Yihooway bantta nagaraa mule atto gaana danddayennabadan qoppidi, keehi daro azzanoosona. (2 Qoronttoosa 2:7) SHin hegaadan qoppiyoogee bessiyaabee? Neeni wolqqaama nagaraa oottidaba gidikkokka, Yihooway neeyyo mule atto gaana danddayennaagaa keenaa appe haakkadasa giyoogee? CHii, hegaadaana gidenna!
“Ane Zorettoos”
Bantta nagaraappe simmiyaageeta Yihooway yeggenna. Ubba i etakko shiiqees! Miishshaa laalida naꞌaa leemisuwan, Yesuusi he naꞌay so asaappe haakki biidi maari baynna deꞌuwaa deꞌidoogaa yootiis; qassi Yihooway qarettiya he naꞌaa aawa mala gidiyoogaa yootiis. Guyyeppe, naꞌay soo simmanawu koyiis. “[Naꞌay] biron haahuwan de7ishin, a aawai a be7idi, ayyo mishettiis; woxxi qoommidi, a yeriis.” (Luqaasa 15:11-20) Neeni Yihoowakko shiiqanawu koyiyaaba gidikkokka, appe “haahuwan” deꞌiyaabadan qoppay? Yesuusi yootido leemisuwan qonccida aawaadan Yihoowaykka neeyyo qarettees. I nena mokkanawu yeemottees.
SHin neeni ne nagaray Yihooway atto gaana danddayennaagaa keenaa daronne wolqqaama gaada qoppiyaaba gidikko shin? Isiyaasa 1:18n deꞌiya Yihoowa shoobiyaa akeeka: “Haayite; ane zorettoos. Intte nagarai baaraadan zo77ikkokka, shachchaadan booxxana; sinadan zo77ikkokka, puuttodan booxxana” yaagiis. Ee, bootta carqqiyaa bolli deꞌiya zoꞌo qalamiyaadan qucettidi xayana danddayennaba milatiya nagaraakka Yihooway atto gees.
Yihooway neeni oottido nagaraa gaasuwan ubbatoo zilꞌꞌettaydda deꞌanaadan koyenna. Yaatin, neeni waatada Yihoowa maarotaa demmananne ne kahay qumꞌꞌennaadan oottana, qassi hegaappe denddidaagan woppu gaana danddayay? Kawuwaa Daawiti oottido naaꞌꞌubaa akeeka. Koyruwan i, “Ta mooruwaa GODAASSI paaxana” yaagiis. (Mazamure 32:5) Yihooway neeni akko woossanaadaaninne aara ‘zorettanaadan’ nena shoobbi uttoogaa hassaya. He shoobiyaa ekka. Ne nagaraa Yihoowassi paaxa; qassi neeyyo siyettiyaabaa ayyo yoota. Daawiti ba deꞌuwan beꞌidobaa hassayidi, “Ta nagaraappe tana geeshsha. . . . Abeet Xoossau, ‘Nagara oottennan aggarkkinaashsha’ giya, meqqida wozanaa neeni karakka” yaagidi ammanettidi woossiis.—Mazamure 51:2, 17.
Naaꞌꞌanttuwan, Daawiti Xoossay akko kiittido, hananabaa yootiya Naataani bana maaddanaadan eeno giis. (2 Sameela 12:13) Ha wodiyan, Yihooway bantta nagaraappe simmiyaageeti banaara kaseegaadan dabbotanaadan maaddana mala gubaaꞌe cimata suntti wottiis. Cimati nena haasayissiyo wode, Geeshsha Maxaafaa goꞌettiyoogaaninne wozanappe woossiyoogan nena gazddissananne nena unꞌꞌissiyaabaappe woppissana; qassi ayyaanaaban nena pattana.—Yaaqooba 5:14-16.
Yihooway ne kahay nena qumꞌꞌennan woppu gaada deꞌanaadan koyees
‘A Mooroy Atto Geetettido Uri Anjjettidaagaa’
Ne nagaraa Xoossaa Yihoowawu paaxiyoogeenne cimatuyyo yootiyoogee harabaappe aaruwan nena deexxana danddayiyoogee tuma. Daawitikka yayyennan aggenna. I ba nagaraa “paaxennan” amarida wodiyaa takkiis. (Mazamure 32:3) SHin ba nagaraa paaxidi ba hemetaa suurissiyoogee a maaddiyaaba gidiyoogaa i guyyeppe akeekiis.
I demmido anjjuwaappe waannay kaseegaadan ufayttidoogaa. I, “A mooroi atto geetettidonne a nagarai kamettido urai anjjettidaagaa” yaagiis. (Mazamure 32:1) I gujjidikka, “Abeet Godau, ta doonaa dooya; yaatikko, ta inxxarssai ne galataa awaajjana” yaagidikka woossiis. (Mazamure 51:15) Daawiti ba nagaraappe geeyidonne Xoossaa maarotaa nashshido gishshawu Yihoowabaa haratuyyo yootanawu koyiis.
Yihooway ne kahay nena qumꞌꞌennan woppu gaada deꞌanaadan koyees. Qassi neeni zilꞌꞌettaydda gidennan, wozanappe ufayttaydda abaanne a halchuwaabaa haratuyyo yootanaadankka koyees. (Mazamure 65:1-4) Yihooway ‘ne nagaray xayanaadaaninne a matappe ayyaanaa minotettaa wodee neeyyo yaanaadan’ amottiyoogaa hassaya.—Oosuwaa 3:19, 20.
Marttakka hegaadan woppu gaasu. A hagaadan gaasu: “Ta naꞌay Wochiyo Keelaanne Beegottite! maxeetiyaa aggennan tawu kiittees. Wodiyaappe wodiyan, zaarettada Yihoowabaa loytta akeekaas. Yihoowakko simmanawu tana deexxida waannabay ta oottido nagara ubbawu maarotaa oychiyoogaa. SHin wurssettan, Yihoowakko woossaas; qassi tawu atto gaanaadan oychaas. Taani Yihoowakko simmennan 40 layttay aadhidoogee ammananawu metiyaabaa. Ayyo oottiyoogaa aggidi keehi daro layttawu takkida urikka baakko simmanaadan Yihooway hanotaa giigissiyoogawu ta deꞌuwan hanidabay markka.”