Hosppun Asati Attidosona

Nohee, a soo asay, meheenne doꞌay markkabiyaa gelidosona. Yihoowi kariyaa gorddin, iray bukkiyoogaa doommiis. Iray keehi bukkin haattay markkabiyaa tookkiyoogaa doommiis. Wurssettan, kumetta saꞌaa haattay kammiis. Markkabiyaappe karen deꞌiya iita asa ubbay hayqqiis. SHin markkabiyan Noheenne a soo asay attidosona. Eti Yihoowawu azazettidoogan ay keena ufayttidaakko qoppana danddayay?

Iray 40 gallassaanne 40 qammaa bukki simmidi, bukkiyoogaa aggiis. Loddan loddan haattay wodhiis. Wurssettan, markkabee deretu bolli shemppiis. SHin haattay ubbasan kumo gishshawu, Noheenne a soo asay markkabiyaappe sohuwaara kiyana danddayibookkona.

Loddan loddan, haattay meliis. Noheenne a soo asay markkabiyan issi layttappe daruwaa takkidosona. Hegaappe simmin, Yihoowi eti markkabiyaappe kiyana danddayiyoogaa yootiis. Yihoowi ashshido gishshawu eti a keehi galatidosona; qassi eti ayyo yarshshuwaa yarshshiyoogan hegaa bessidosona.

Ha yarshshuwan Yihoowi ufayttiis. I saꞌan deꞌiya ubbabaa naaꞌꞌantto haattan mule xayssennaagaa yootiis. I he yootidobawu malaata gidana mala, koyro zuullay saluwan beettanaadan oottiis. Neeni zuullaa beꞌa eray?

Hegaappe simmin Yihoowi, Noheenne a soo asay naata yelidi saꞌaa kumanaadan etawu yootiis.