Yihoowawu Gelido Qaalaa

Israaꞌeelati Gibxxeppe kiyi simmidi naaꞌꞌu agina gidiya wodiyaappe guyyiyan, Siinaa Deriyaa gakkidi dunkkaaniyaa dunkkaanidosona. Muusee deriyaa huuphiyaa kiyin, Yihoowi a xeesidi hagaadan giis: ‘Taani Israaꞌeelata ashshaas. Eti taayyo azazettikkonne ta higgiyaa naagikko, eti taayyo dumma asa gidana.’ Muusee deriyaappe wodhidi Yihoowi yootidobaa Israaꞌeelatussi odiis. Eti waatidonaa? Eti, ‘Yihoowi yootidobaa ubbaa nuuni oottana’ yaagidosona.

Muusee zaarettidi deriyaa kiyiis. Yan, Yihoowi hagaadan giis: ‘Heezzantto gallassi, taani nena haasayissana. Asay Siinaa Deriyaa pude kiyennaadan seera.’ Muusee duge wodhidi Israaꞌeelati Yihoowi yootiyoogaa siyanawu giigettanaadan odiis.

Heezzu gallassappe guyyiyan, Israaꞌeelati wolqqanttay wolqqammiyoogaanne sikkida shaaraa deriyaa bolli beꞌidosona. Qassi eti dadaa gunttaanne malkkataa cenggurssaa siyidosona. He wode Yihoowi tamaara deriyaa bolli wodhiis. Israaꞌeelati keehi yayyidi kokkoridosona. Deree muleera keehi qaaxxiisinne cuwan kamettiis. Malkkataa cenggurssay keehippe dari dari biis. He wode Xoossay, ‘Taani Yihoowa. Taappe attin, hara xoossassi goynnoppa’ yaagiis.

Muusee deriyaa zaarettidi kiyin, asay Yihoowayyo waanidi goynnana bessiyaakkonne waanidi deꞌana bessiyaakko Yihoowi higgiyaa Muusessi immiis. Muusee higgeta xaafiis; qassi guyyeppe hegaa Israaꞌeelatussi nabbabiis. Eti, ‘Yihoowi yootidobaa ubbaa nuuni oottana’ yaagidi qaalaa gelidosona. Ee, eti Xoossaayyo qaalaa gelidosona. SHin eti hegaa naaganee?