Balaama Hariyaa Haasayaasu

Israaꞌeelati bazzuwan 40 gidiya layttaa takkidosona. Eti wolqqaama katamata darota xoonidosona. Eti Mooꞌaaba dembban Yorddaanoosa SHaafaappe arshsho baggaara dunkkaanidosona; eti Hidootaa Biittaa geliyo wodee haꞌꞌi gakkiis. Mooꞌaaba kawoy Baalaaqi Israaꞌeelati ba biittaa ekkoosona giidi hirggiis. Hegaa gishshawu, Balaama giyo bitanee Mooꞌaaba biitti yiidi Israaꞌeelata qangganaadan xeesiis.

SHin Yihoowi Balaama, ‘Neeni Israaꞌeelata qanggoppa’ yaagiis. Yaatiyo gishshawu Balaami beennan ixxiis. Kawuwaa Baalaaqi a naaꞌꞌanttuwaa xeesidi, i koyiyo ubbabaa immanawu qaalaa geliis. Haꞌꞌikka, Balaami beennan ixxiis. Guyyeppe Xoossay, ‘Neeni baana danddayaasa; shin taani neeyyo yootiyoobaa xalaalaa oda’ yaagiis.

Balaami ba hariyo toggidi tohossa baggaara deꞌiya Mooꞌaaba biis. I Israaꞌeelata qanggennaadan Yihoowi yootikkonne, i eta qangganawu qoppiis. Yihoowa kiitanchay ogiyan heezzutoo beettiis. Balaami kiitanchaa beꞌibeenna; shin Balaama hariyaa beꞌaasu. Hariyaa koyro, ogiyaa aggada goshshaa giddo gelaasu. Yaata simmada hariyaa gimbbe dirssaakko baada Balaama tohuwaa gimbbiyaara daraxaasu. Wurssettan, hariyaa ogiyawu gidduwan zinꞌꞌaasu. He wode ubban, Balaami hariyo xamꞌꞌan bukkiis.

Heezzanttuwaa kiitanchay beetti simmin, Yihoowi hariyaa haasayanaadan oottiis. Hariyaa Balaama, ‘Neeni tana aybissi bukkay?’ yaagada oychaasu. Balaami, ‘Neeni tana eeyya milatissadasa. Taayyo bisoy deꞌiyaakko, taani nena worana’ yaagiis. Hariyaa, ‘Neeni daro layttawu tana toggadasa. Taani neeyyo hagaadan hana eriyaanaa?’ yaagaasu.

Guyyeppe, Yihoowi Balaami kiitanchaa beꞌanaadan oottiis. Kiitanchay, ‘Neeni Israaꞌeelata qanggennaadan Yihoowi neeyyo yootiis’ yaagiis. Yaagin Balaami, ‘Taani balaas. Taani guyye soo simmana’ yaagiis. SHin kiitanchay, ‘Neeni Mooꞌaaba baana danddayaasa; shin Yihoowi neeyyo yootiyoogaa xalaalaa haasaya’ yaagiis.

Balaami hegaappe tamaaridee? CHii. Hegaappe simmin, Balaami Israaꞌeelata qangganawu heezzutoo maliis; shin he wode ubban, Yihoowi i eta anjjanaadan oottiis. Wurssettan, Israaꞌeelati Mooꞌaabata xoonidosona; yaatidi Balaama woridosona. Balaami aybippenne aattidi Yihoowi yootiyoobaa siyiyaakko, ayyo loꞌꞌo gidennee?