Yihoowi Samssoonawu Wolqqaa Immiis

Daro Israaꞌeelati zaarettidi eeqaa goynuwawu simmido gishshawu, eta biittaa Pilisxxeema asati haaranaadan Yihoowi oottiis. SHin he wode Yihoowa siiqiya amarida Israaꞌeelati deꞌoosona. He asatuppe issoy Maanuha. Inne a machiyaa naata yelibookkona. Yihoowi issi gallassi Maanuhe maccaaseekko kiitanchaa kiittiis. Kiitanchay o hagaadan giis: ‘Neeni attuma naꞌa yelana. I Israaꞌeelata Pilisxxeematupppe ashshana. I naaziraawe gidana.’ Naaziraaweti oonakko neeni eray? Eti Yihoowayyo oottiya dumma asata. Naaziraawetu binnaanay meedettenna.

Guyyeppe, Maanuhe naꞌay yelettin, i a Samssoona giidi sunttiis. Samssooni diccin, Yihoowi ayyo wolqqaa immiis. I ba kushiyan aybanne oyqqennan gaammuwaa woriis. Issi wode, Samssooni barkka 30 Pilisxxeemata woriis. Pilisxxeemati a ixxiyo gishshawu, a woriyo ogiyaa muletoo koyoosona. Samssooni issi galla qammi Gaaza kataman xiskkidaashin, eti katamaa penggiyaa biidi, maallado a woranawu yan naagidosona. SHin qammi bilahe, Samssooni denddidi katamaa penggiyaakko biis; biidi penggiyaa dirssaappe shoddiis. He penggiyaa ba hashiyan tookkidi Kebroona katamaa matan deꞌiya issi deriyaa huuphiyaa gakkanaassi biis!

Hegaappe simmin, Pilisxxeemati Samssoona laggee Daliilikko biidi hagaadan giidosona: ‘Samssooni hagaa keena wolqqaa awuppe demmidaakko neeni erikko, nuuni issoy issoy neeyyo issi shaꞌanne issi xeetu xaqara biraa immana. Nuuni a oyqqanawunne qasho keettan yegganawu koyoos.’ Daliila miishshaa koyido gishshawu, maayaasu. Koyro heeran, Samssooni i wolqqaama gididoy aybissakko iyyo odennan ixxiis. SHin i ba xuuraa yootana gakkanaassi a shemppuwaa diggaasu. I iyyo hagaadan giis: ‘Taani Naaziraawe gidiyo gishshawu, ta huuphiyaa binnaanay mule meedetti erenna. Ta binnaanay meedettikko, ta wolqqay taappe xayana.’ Samssooni hegaa iyyo yootiyoogan moorobaa oottidoogee qoncce.

Daliila sohuwaara Pilisxxeematussi, ‘A xuuraa taani eraas!’ yaagada yootaasu. A ba kiyuwan Samssoona xiskkissada, issi uri a huuphiyaa binnaana meedanaadan oottaasu. Daliila, ‘Samssoonaa, Pilisxxeemati yiichidosona!’ yaagaasu. Samssooni beegottiyo wode, a wolqqay xayiichiis. Pilisxxeemati a oyqqidi, a ayfiyaa toyssidosona; qassi a qasho keetti gelissidosona.

Issi gallassi Pilisxxeemati bantta xoossaa Daagoona beeta maqidasiyan shiiqidi hagaadan giidosona: ‘Nu xoossay Samssoona nuuyyo aattidi immiis! Samssoona haa ekki yiite! Nuuni guuttaa an ufayttana.’ Eti i naaꞌꞌu tuussatuppe gidduwan eqqanaadan oottidi, a bolli qilliiccidosona. Samssooni, ‘Abeet Yihoowa, hayyanaa tana issiton minttarkkii!’ yaagidi woossiis. He wode, Samssoona huuphee zaarettidi dicci uttiis. I bawu deꞌiya wolqqa ubban beeta maqidasiyaa tuussata sugiis. Keettay muleera kunddidi beeta maqidasiyan deꞌiya asaa woriis; qassi Samssoonikka hayqqiis.