Kawuwaa Daawita Nagaraa

Saaꞌooli hayqqin, Daawiti kawo gidiis. He wode ayyo layttay 30. I kawotoosappe amarida layttay aadhi simmin, issi galla omarssi ba kawo keettaa bolli dembbayidi keexxidosan deꞌiiddi, issi loꞌꞌiya maccaasiyo beꞌiis. I sunttay Berssaabo gidiyoogaanne a Ooriyoona giyo wotaaddaraa maccaasiyo gidiyoogaa Daawiti eriis. Daawiti Berssaaba ba kawo keettaa yaanaadan xeesissiis. I iira zinꞌꞌin, a shahaaraasu. Daawiti ba oottidobaa qosanawu maliis. I ba olaa gadaaway Ooriyoona olawu sintta baggaara essidi, appe guyyessan deꞌiyaageeti baqatanaadan yootiis. Ooriyooni olan hayqqi simmin, Daawiti Berssaabo ekkiis.

SHin hanida iitabaa ubbaa Yihoowi beꞌiis. Yaatin i waatanee? Yihoowi ba erissidobaa yootiya Naataana Daawitakko kiittiis. Naataani hagaadan giis: ‘Issi dure bitaniyawu daro dorssay deꞌees; qassi issi manqqo bitaniyawu i iyyo keehi qarettiyo issi dorssa maree xallay deꞌees. Dure bitanee he manqqo bitaniyawu deꞌiya issi dorssa mariyo ekkiis.’ Daawiti hanqqettidi, ‘He dure bitanee hayqqanawu bessees’ yaagiis. Yaagin Naataani Daawitayyo, ‘He dure bitanee nena!’ yaagiis. Daawiti azzanidi, Naataanayyo, ‘Taani Yihoowa bolli nagaraa oottaas’ yaagiis. Ha nagaray Daawita bollinne a soo asaa bolli daro metuwaa kaalettiis. Yihoowi Daawita qaxxayiis; shin Daawiti tumabaa haasayiyaanne ba huuphiyaa kawushshiya asa gidiyo gishshawu i hayqqennaadan oottiis.

Daawiti Yihoowayyo garuwa keexxanawu koyiis; shin Yihoowi A garuwa keexxanaadan Daawita naꞌaa Solomona dooriis. Daawiti Solomonayyo issi issibaa giigissiyoogaa doommidi, hagaadan giis: ‘Yihoowa beeta maqidasee keehi maalaalissiyaagaa gidana bessees. Solomoni naꞌa, shin taani koshshiyaabaa giigissiyoogan a maaddana.’ Keexxiyo oosuwawu Daawiti daro miishshaa immiis. I qara oosanchata giigissiis. I worqqaanne biraa shiishshiis; qassi Xiiroosappenne Sidoonappe zigaa ehiissiis. Daawiti hayqqanawu matido wode, Solomonayyo Xoossaa garuwa halchuwaa immiis. I hagaadan giis: ‘Yihoowi taani hagaa neeyyo xaafanaadan oottiis. Yihoowi nena maaddana. Yayyoppa. Minna; oosuwaa doomma.’