Yihoowi Yoosaafixa Maaddiis

Yihudaa kawoy Yoosaafixi, Baꞌaalayyo yarshshiyoosaanne eeqata biittaappe xayssiis. I asay Yihoowa higgiyaa eranaadan koyiis. Hegaa gishshawu Yihudaa asaa ubbaa Yihoowa higgiyaa tamaarissanaadan halaqatanne Leewata kiittiis.

Matan deꞌiya kawotettati Yihoowi ba asaara deꞌiyoogaa eriyo gishshawu, Yihudaa olanawu yayyidosona. Ubba qassi Yoosaafixayyo imotaa ehiidosona. SHin guyyeppe Mooꞌaabati, Amoonatinne Eedoomati Yihudaa olanawu yiidosona. Yihoowa maadoy koshshiyoogaa Yoosaafixi eriis. I asaa, attumaa, maccaanne naata ubbaa Yerusalaame shiishshiis. I eta sinttan, ‘Yihoowa, ne maaddennan, nu xoonana danddayokko. Nu oottanabaa hayyanaa yoota’ yaagidi woossiis.

Yihoowi hagaadan giidi he woosaa zaariis: ‘Yayyoppite. Taani inttena maaddana. Intte intte sohuwan sohuwan eqqite, ta inttena waata ashshanaakko intte beꞌana.’ Yihoowi eta waati ashshidee?

Wonttetta galla maallado, Yoosaafixi yexxiyaageeta dooridi eti olanchatu sinttan salppiyan baanaadan yootiis. Eti Yerusalaameppe Taqoꞌa giyo sohuwan deꞌiya olaa dembbaa biidosona.

Yexxiyaageeti ufayssan qaalaa xoqqu oottidi Yihoowa sabbiyo wode, Yihoowi ba asawu olettiis. I Amoonatinne Mooꞌaabati haniyoobaa xayanaadan oottin, eti issoy issuwaa worin, etappe issoykka attibeenna. SHin Yihoowi Yihudaa asaa, wotaaddaratanne qeeseta naagiis. Matan deꞌiya biittaa asay ubbay Yihoowi oottidobaa siyiis; qassi Yihoowi ba asaa maaddiyoogaa eti eridosona. Yihoowi ba asaa waati ashshii? Daro ogiyan ashshees. I yaatanawu asi a maaddana koshshenna.