TIMIRTTIYAA 51
Olanchaanne Guutta Naꞌiyo
Sooriyaa biittan, bantta sooppe keehi haahosan, Israaꞌeela biittaa guutta naꞌiyaa issinna deꞌawusu. Sooriyaa olanchati o eta soo asaappe shaakkidi efiidosona; qassi a haꞌꞌi olanchatu gadaawaa Naaꞌimaana maccaaseessi ashkkara. He biittaa asay Yihoowayyo goynnana xayikkonne, he guutta naꞌiyaa ayyo goynnawusu.
Naaꞌimaani hanttaara gogaa harggiyan oyqettido gishshawu, ubba wode sahettees. Guutta naꞌiyaa a maaddanawu wozanappe koyaasu. A Naaꞌimaana macheeyyo hagaadan gaasu: ‘Ne azinaa pattana danddayiya issi ura taani erays. Israaꞌeelan, Yihoowi erissidobaa yootiya Elssaꞌi deꞌees. I ne azinaa pattana danddayees.’
Naaꞌimaana machiyaa guutta naꞌiyaa iyyo yootidobaa Naaꞌimaanayyo odaasu. I aybanne mali beꞌanawu koyido gishshawu, Israaꞌeelan deꞌiya Elssaꞌa soo biis. Naaꞌimaani bana Elssaꞌi bonchettida asadan mokki ekkana giidi qoppiis. SHin Elssaꞌi a yiidi haasayissiyoogaappe, ba ashkkaray Naaꞌimaana sarotidi, hagaadan yootanaadan kiittiis: ‘Ba, baada Yorddaanoosa SHaafan laapputoo meecetta. Yaatikko neeni paxana.’
Naaꞌimaani keehi azzaniis. I hagaadan giis: ‘Xoossay erissidobaa yootiyaagee ba Xoossaa sunttaa xeesidi, qassi ba kushiyaa ta bolli qaattidi, tana pattana gaada qoppaas. SHin taani Israaꞌeelan deꞌiya shaafaa baanaadan i yootiis. Sooriyaa biittan hegaappe loꞌꞌo shaafati nuussi deꞌoosona. Taani yaa beennay aybissee?’ Naaꞌimaani keehi hanqqettidi, Elssaꞌa sooppe kiyidi biis.
Naaꞌimaana ashkkarati i loyttidi qoppanaadan maaddidosona. Eti ayyo hagaadan gidoosona: ‘Neeni paxanawu ayba gidikkonne oottikkiiyye? Xoossay erissidobaa yootiyaagee neessi odidobay metennaba. Neeni hegaadan oottiyaakko kehennee?’ Naaꞌimaani eti yootidobaa siyiis. I Yorddaanoosa SHaafaa biidi haattan laapputoo muukettiis. Naaꞌimaani Laapputoo muuketti simmidi haattaappe kiyiyo wode muleera paxiis. I keehi ufayttidi, Elssaꞌa galatanawu a soo zaarettidi biis. Naaꞌimaani, ‘Yihoowi tumu Xoossaa gidiyoogaa taani haꞌꞌi eraas’ yaagiis. Naaꞌimaani paxidi guyye ba soo yiido wode, Israaꞌeela biittaa guutta naꞌeeyyo aybi siyettiis gaada qoppay?
“Guutta naatinne xammiya naati nena galatana mala, eta erissadasa.”—Maatiyoosa 21:16