Tamaadan Eexxiya Yihoowa Olanchata

Sooriyaa kawoy Benihadaadi, Israaꞌeelata oliyoogaa aggibeenna. SHin Xoossay erissidobaa yootiya Elssaꞌi Israaꞌeela kawuwawu ubbatoo yootido gishshawu, kawoy baqatiis. Hegaa gishshawu, Benihadaadi Elssaꞌa wolqqan efaanawu qofaa qachiis. I Elssaꞌa Dootaana giyo kataman demmidi, Sooriyaa olanchati a yan oyqqanaadan kiittiis.

Sooriyaa olanchati Dootaana katamaa qammi yiidosona. Wonttetta gallassi, Elssaꞌa ashkkaray kare kiyidi, daro olanchati katamaa dooddidoogaa beꞌiis. I yayyidi, ‘Elssaꞌaa, nuuni ay oottana koshshii?’ yaagidi waassiis. Elssaꞌi ayyo, ‘Nunaara deꞌiyaageeti etaara deꞌiyaageetuppe daroosona’ yaagiis. He wode, Elssaꞌa ashkkaray katamaa yuushuwan deꞌiya dere ubban paratinne tamaa olaa paraa gaareti kummidoogaa beꞌanaadan Yihoowi oottiis.

Sooriyaa wotaaddarati Elssaꞌa oyqqanawu malido wode, i, ‘Yihoowawu, hayyanaa ha asatu ayfiyaa qooqissa’ yaagidi woossiis. Sohuwaara, wotaaddarati xeellana danddayikkonne, eti awan deꞌiyaakko erokkona. Elssaꞌi wotaaddaratuyyo, ‘Intte hara kataman deꞌeeta. Tana kaallite, intte koyiyo asa taani inttena bessana’ yaagiis. Eti Israaꞌeela kawoy deꞌiyo Samaariyaa katamaa gakkanaassi Elssaꞌa kaallidosona.

Sooriyaa asati bantta deꞌiyoosay awakko akeekanawu wodee aadhiichiis. Israaꞌeela kawoy Elssaꞌa ‘Taani eta woroo?’ yaagidi oychiis. Elssaꞌi hegaa bana woranwu malida asata haluwaa kiyana mala goꞌettanawu qoppidee? CHii. Elssaꞌi, ‘Eta woroppa. Etawu qumaa imma; eti bantta ogiyaa boona’ yaagiis. Hegaa gishshawu, kawoy daro qumaa giigissi eta miziis; hegaappe simmin eti bantta soo baanaadan eta yeddiis.