Yihoowi Yesuusa Naagiis

Israaꞌeelappe arshsho baggan deꞌiya asay bana xoolinttetti kaalettana danddayoosona giidi ammanees. Issi gallassi qammi, Arshsho baggappe amarida asati xoolintte milatiya, keehi pooꞌiyaabay saluwan biishin beꞌidosona; beꞌidi hegaa kaallidosona. Xoolintte milatiyaabay eta Yerusalaame kaalettiis. Eti hagaadan asaa oychidosona: ‘Ayhuda kawo gidana naꞌay awan deꞌii? Nuuni a sinttan gulbbatanawu yiida.’

Yerusalaame kawoy Heeroodisi ooratta kawuwaabaa siyido wode, keehi hirggiis. I qeese halaqata, ‘Ha kawoy awan yelettana giidi qoppeetii?’ yaagidi oychiis. Eti ayyo, ‘I Beetaliheeme kataman yelettanaagaa Xoossay erissidobaa yootiyaageeti odidosona’ yaagidosona. Hegaa gishshawu, Heeroodisi Arshsho baggappe yiida he asata xeesidi etayyo hagaadan giis: ‘Beetaliheeme biidi he naꞌaa demmite. Yaatidi taakko yiidi i awan deꞌiyaakko taassi yootite. Taanikka a sinttan gulbbatana koyays.’ SHin hegee worddo.

Xoolintte milatiyaabay haranttuwaa biyoogaa doommiis. He asati hegaa kaallidi Beetaliheeme gakkanassi biidosona. Xoolintte milatiyaabay issi keettaa gakkidi eqqin, asati soo gelidosona. Eti Yesuusa a aayee Mayraamiira demmidosona. Eti naꞌaa sinttan gulbbatidosona; qassi worqqaa, bootta ixaanaanne karbbiyaa imotaa imidosona. Yesuusa koyanaadan ha asata tumuppe Yihoowi kiittidee? CHii.

He galla qammi, aymuwan Yihoowi Yooseefa hagaadan giis: ‘Heeroodisi Yesuusa woranawu koyees. Ne machiyoonne ne naꞌaa ekkada Gibxxe biitti baqata. Taani, “Hirggissiyaabi baawa simma” gaana gakkanaassi, yan uttaashsha.’ Sohuwaara, Yooseefinne a soo asay Gibxxe biis.

Yihoowi Arshsho baggappe yiida asatuyyo eti Heeroodisakko simmana koshshennaagaa yootiis. Heeroodisi eti guyye simmibeennaagaa erido wode, keehi hanqqettiis. I Yesuusa demmana danddayenna gishshawu, Beetaliheemen Yesuusi yeletiyo wode yelettida guutta attuma naata ubbaa woranaadan azaziis. SHin Yesuusi haahosan Gibxxen deꞌiyo gishshawu, attiis.

Guyyeppe, Heeroodisi hayqqiis. Yihoowi Yooseefassi, ‘Hirggissiyaabi baynna gishshawu, neeni haꞌꞌi guyye simma’ yaagiis. Yooseefi, Mayraamanne Yesuusi Israaꞌeela biitti simmidosona; simmidi Naazireete kataman deꞌidosona.