Haattaa Ollaa Matan Gayttida Maccaasiyo

Paasikaa Baalaappe simmin, Yesuusinne i erissiyo ashkkarati Galiila biitti simmiiddi Samaariyaara kanttidosona. Sikaara giyo katamaa matan, Yaaqooba haattaa ollaa giyoosan Yesuusi uttiis. I yan shemppishin, i erissiyo ashkkarati qumaa shammanawu katamaa biidosona.

Issi maccaasiyaa ollaappe haattaa duuqqanawu yaasu. Yesuusi o, “Tana haattaa ushsharkkii!” yaagiis. A, ‘Neeni tana ayssi haasayissay? Taani Samaariyaa maccaasa. Ayhudati Samaaretuura haasayokkona’ yaagaasu. Yesuusi iyyo, ‘Taani oonakko neeni eriyaakko, neeni tana haattaa woossana shin; qassi taani neeyyo deꞌo haattaa immana’ yaagiis. Maccaasiyaa, ‘Neeni woyganawu koyadii? Neeyyo duuqqiyoobikka baawa’ gaada oychaasu. Yesuusi, ‘Taani immiyo haattaa uyiya ooninne haranttuwaa mule saamettenna’ yaagiis. Maccaasiyaa, ‘Godawu, taayyo he haattaa imma!’ yaagaasu.

Yaagin Yesuusi o, ‘Baada ne azinaa haattaa ollaakko ekkada ya’ yaagiis. A, ‘Tawu azini baawa’ yaagaasu. I hagaadan giis: ‘Neeni odiyoobay tuma. Neeni ichashutoo geladasa; qassi neeni haꞌꞌi a gelabeenna bitaniyaara deꞌaasa.’ Maccaasiyaa hagaadan gaasu: ‘Neeni Xoossay erissidobaa yootiyaagaa gidiyoogaa taani akeekaas. Samaariyaa asay nuuni ha deriyan Xoossawu goynnana danddayoos giidi ammanees; shin Ayhudati nuuni goynnana danddayiyoy Yerusalaame xallaana gidiyoogaa yootoosona. Masee yiyo wode, i nuuni waati goynnanaakko nuna tamaarissanaagaa taani ammanays.’ He wode Yesuusi, ‘Taani Masiyaa’ yaagidi, oossinne yootibeennabaa iyyo yootiis.

Maccaasiyaa eesuwaara ba katamaa baasu; baada Samaariyaa asaayyo, ‘Taani Masiyaa demmennan aggikke. I tabaa ubbabaa erees. Yiidi beꞌite’ yaagaasu. Eti o kaallidi haattaa ollaakko biidosona; qassi Yesuusi tamaarissiyoogaa siyidosona.

Samaariyaa asay Yesuusi bantta kataman takkana mala shoobbidosona. I naaꞌꞌu gallassaa yan tamaarissiis; qassi daro asay a ammaniis. Eti Samaariyaa maccaasiyo, ‘Ha bitanee yootiyoobaa siyi simmidi, i tumu ha saꞌaa ashshiyaagaa gidiyoogaa nuuni erida’ yaagidosona.