Yesuusi Kiitettida Tammanne Naaꞌꞌata Dooriis

Yesuusi issi layttanne bagga gidiyaagaa sabbaki simmidi, issi gitabaa kuuyana hanees. I banaara oottanawu oona dooranee? Kiristtaane galchchaa kaalettanawu i oona loohissanee? Yesuusi hegaa kuuyanawu Yihoowa kaaletuwaa koyiis. Hegaa gishshawu, i barkka issi deriyaa biidi kumetta qammaa woossiis. Wonttetta gallassi, ba erissiyo ashkkaratuppe amaridaageeta issippe xeesidi kiitettida 12ta dooriis. Eta sunttaappe neeni oogaa hassayay? Eta sunttay PHeexiroosa, Inddiraasa, Yaaqooba, Yohaannisa, Piliphoosa, Barttalamoosa, Toomaasa, Maatiyoosa, Ilppiyoosa naꞌaa Yaaqooba, Taaddiyoosa, Simoonanne Asqqorootu Yihudaa.

Tammanne Naaꞌꞌati Yesuusaara issippe hemettana. I eta loohissi simmidi, eti banttarkka sabbakanaadan kiittiis. Daydanttata kessanaadaaninne sahettida asaa pattanaadan Yihoowi etawu wolqqaa immiis.

Yesuusi Tammanne Naaꞌꞌata ba lagge giidi xeesees; qassi i etan ammanettees. Kiitettidaageeti tamaaribeenna coo asa giidi Parssaaweti qoppidosona. SHin eti oottiyo oosuwawu Yesuusi eta loohissiis. Yesuusa hayquwaappe kasenne i hayquwaappe denddi simmin deꞌiya wodetu mala a deꞌuwan keehi gita wodetun eti aara issippe takkidosona. Yesuusadan, Tammanne Naaꞌꞌatuppe dariya baggay Galiila asa. Etappe issoti issoti machidaageeta.

Kiitettidaageeti balabaa oottiya nagarancha asa. Issi issitoo eti qoppennan haasayidosona; qassi iitabaa kuuyidosona. Eti issi issitoo danddayancha gidibookkona. Ubba qassi eti bantta giddon ooni aadhiyaakko palamettidosona. SHin eti Yihoowa siiqiya loꞌꞌo asa. Yesuusi saluwaa bi simmin, eti Kiristtaane galchchawu koyro yame gididi gitabaa oottana.