Yesuusi Ba Erissiyo Ashkkarati Waati Woossanaakko Tamaarissees

Parisaaweti ubbabaa asay garamettanaadan oottoosona. Eti kehabaa oottikko, hara asaa bessanawu oottoosona. Ubba asay eta beꞌana mala eti dabaaban woossoosona. Parisaaweti eti hassayiyo adussa woosaa, Ayhuda woosa keettaaninne ogiyan, hara asay siyana danddayiyoosan zaaretti zaarettidi woossoosona. Hegaa gishshawu, Yesuusi hagaadan haasayido wode asay garamettiis: ‘Parisaawetuugaadan woossoppite. Eti bantta haasayaa daroy Xoossaa ufayssiyaabadan qoppoosona; shin i ufayttenna. Woosay neeninne Yihoowi eriyooba. Issibaa zaaretta zaarettada biddoppa. Yihoowi neessi wozanan siyettiyaabaa neeni ayyo yootanaadan koyees.

‘Neeni hagaadan woossana koshshees: “Saluwan deꞌiya nu Aawawu, ne geeshsha sunttay anjjetto. Ne kawotettay yo; ne shenee saluwan hanidoogaadan, saꞌankka hano.”’ Eti issi gallassawu banttawu koshshiya qumaa demmanawu, bantta nagaray atto geetettanaadaaninne banttawu koshshiya harabawu woossana bessiyoogaakka Yesuusi etawu yootiis.

Yesuusi hagaadan giis: ‘Woossiyoogaa mule aggoppa. Loꞌꞌobaa demmanawu ne Aawa, Yihoowa aggennan woossa. Aawatinne aayoti ubbay bantta naꞌawu loꞌꞌobaa immanawu koyoosona. Ne naꞌay nena oytta oychikko, ayyo neeni shuchaa immuutee? I nena mole oychikko, neeni ayyo shooshsha immuutee?’

THegaappe tamaariyoobaa Yesuusi hagaadan yootiis: ‘Neeni ne naatussi loꞌꞌobaa immiyoogaa erikko, saluwan deꞌiya ne Aaway, Yihoowi geeshsha ayyaanaa neessi waati darissidi immanddeeshsha! Neeppe koyettiyaabay woossiyoogaa.’ Yesuusa zoriyaa neeni kaallay? Neeni aybawu aybawu woossay?