SHEMPPO 3
Xoossaa Siiqiya Laggeta Doora
“Aadhdhida eranchcha asatuura hemettiya asi aadhdhida eranchcha gidees.”—LEEMISO 13:20.
1-3. (a) Leemiso 13:20ppe ay tamaariyoo? (b) Nuuni nu laggeta akeekan doorana koshshiyoy aybissee?
GUUTTA naꞌi ba aawaa woy ba aayyiyo waati akeekan xeelliyaakko beꞌa eray? I haasayaa doommanaappe kasekka, beꞌiyo ubbabaanne siyiyo ubbabaa akeekees. I gitatiyo wode, aynne baaxetennan ba aawaanne aayyiyo qulliyoogaa doommees. Gita asaykka eti daro wodiyaa issippe aattiyo asatuugaadan qoppiyoogeenne eta qulliyoogaa doommiyoogee garamissiyaaba gidenna.
2 Leemiso 13:20y, “Aadhdhida eranchcha asatuura hemettiya asi aadhdhida eranchcha gidees” yaagees. Ha xiqisiyan, issi uraara ‘hemettiyoogaa’ geetettida qofay aara wodiyaa aattiyoogaa qonccissees. Hegaa giyoogee he uraa matan takkiyoogaa xalla gidenna. Geeshsha Maxaafaa eranchcha gidida issi bitanee issi uraara hemettiyoogaa giyoogee he uraa siiqiyoogaanne aara kaseegaappe aaruwan laggetiyoogaa bessiyaaba gidiyoogaa yootiis. Nuuni daro wodiyaa issippe aattiyoogeeta, ubba qassi etaara laggetiyoogeeta darotoo kaalloos.
3 Nu laggeti nuna maaddana woy qohana danddayoosona. Leemiso 13:20y gujjidi hagaadan gees: “Eeyya asatuura hemettiya [“zuppetiya,” NW] asi metuwan gelees.” Ibraawettuwan, issi uraara ‘zuppetiyoogaa’ giyoogee he uraara ‘laggetiyoogaa’ bessiyaaba gidana danddayees. (Leemiso 22:24; Daannata 14:20) Xoossaa siiqiya laggeti nuuni awu ammanettidi deꞌanaadan nuna minttettoosona. Nuuni nu laggeta akeekan dooranaadan maaddana mala, Yihooway ba dabbo oottidi dooriyoy ay mala asakko ane pilggoos.
XOOSSAA DABBOTI OONEE?
4. Xoossaa dabbo gidiyoogee gita maata giyoy aybissee? Yihooway Abrahaama “ta dabbuwaa” giidoy aybissee?
4 Ubbabaa Haariya Yihooway, nuuni A dabbo gidanaadan koyees. Hegee gita maata. Yihooway ba dabbota akeekan doorees. I bana siiqiyaageetanne bawu ammanettiyaageeta doorees. Abrahaamabaa qoppa. I Xoossawu aybanne oottanawu koyiis. Abrahaami ammanettiyaagaanne azazettiyaagaa gidiyoogaa darotoo bessiis. I ba naꞌaa Yisaaqa ba dosan yarshshanawukka eeno giis. “Xoossai Yisaaqa harai atto, haiquwaappekka pattanau danddayiyoogaa” Abrahaami ammaniis. (Ibraawe 11:17-19; Doomettaabaa 22:1, 2, 9-13) Abrahaami ammanettido gishshawunne azazettido gishshawu, Yihooway A, “Ta dabbuwaa” yaagiis.—Isiyaasa 41:8; Yaaqooba 2:21-23.
5. Yihooway bawu ammanettiyaageeta waati xeellii?
5 Yihooway ba dabbota xoqqu ootti xeellees. A dabboti hara aybippenne aaruwan awu ammanettidi deꞌanawu koyoosona. (2 Sameela 22:26 nabbaba.) Eti A siiqiyo gishshawu, ayyo ammanettoosonanne azazettoosona. Geeshsha Maxaafay Xoossay bawu azazettiya ‘suuretuyyo ulottiyoogaa’ yootees. (Leemiso 3:32) Yihooway ba dabboti ba ‘dunkkaaniyan’ imatta gidanaadan shoobbees. I baayyo eti goynnanaadaaninne awudenne A woossanaadan shoobbees.—Mazamure 15:1-5.
6. Nuuni Yesuusa siiqiyoogaa waati bessana danddayiyoo?
6 Yesuusi hagaadan giis: “Tana siiqiya ooninne ta qaalaa naagana; ta Aawai a siiqana.” (Yohaannisa 14:23) Hegaa gishshawu Yihoowa dabbo gidanawu, nuuni Yesuusa siiqananne I nuna tamaarissidobaakka oottana koshshees. Leemisuwawu, nuuni mishiraachchuwaa sabbakanaadaaninne erissiyo ashkkara oottanaadan Yesuusi azazidobaa azazettoos. (Maatiyoosa 28:19, 20; Yohaannisa 14:15, 21) Nuuni Yesuusa siiqiyo gishshawu, ‘A kaalloos.’ (1 PHeexiroosa 2:21) Yihooway nuuni haasayiyoobaaninne oottiyooban ba Naꞌaa milatanawu nuuyyo danddayettida ubbabaa oottiiddi deꞌiyoogaa beꞌiyo wode ufayttees.
7. Nu laggeti Yihoowa dabbota gidana bessiyoy aybissee?
7 Yihoowa dabboti ammanettiyaageetanne azazettiyaageeta; qassi eti A Naꞌaa siiqoosona. Taani Yihooway ba dabbota oottidi dooriyoogeeta dooriyaanaa? Ne laggeti Yesuusa milatiyaageetanne harata Xoossaa Kawotettaabaa tamaarissiyaageeta gidikko, eti neeni loꞌꞌo asa gidanaadaaninne Yihoowayyo ammanettada deꞌanaadan nena maaddana danddayoosona.
GEESHSHA MAXAAFAN ETABAY ODETTIDO ASATUPPE TAMAARIYOOGAA
8. Urutinne Naaꞌoomi laggetettaappe neeni dosiyoobay aybee?
8 Urutinne I bollotee Naaꞌoomi laggetettaa mala, daro laggetettaabaa Geeshsha Maxaafay yootees. He maccaasatu biittaynne wogay dumma dumma; qassi Naaꞌooma Urutippe keehi bayra. SHin eti naaꞌꞌaykka Yihoowa siiqiyo gishshawu, mata lagge gididosona. Naaꞌooma Mooꞌaaba biittaappe Israaꞌeela biitti simmiyo wode, “Uruta o baqqa oiqqada ixxaasu.” A Naaꞌoomiyyo, “Ne asai ta asaa gidana; ne Xoossai ta Xoossaa gidana” yaagaasu. (Uruto 1:14, 16) Uruta Naaꞌoomiyyo daro keha. Eti Israaꞌeela biitti gakki simmin, Uruta ba laggiyo maaddanawu minnada oottaasu. Naaꞌooma Uruto keehi siiqiyo gishshawu, O loꞌꞌo zore zoraasu. Uruta A zoridobaa siyaasu; hegaappe denddidaagan, eti naaꞌꞌaykka keehi anjjettidosona.—Uruto 3:6.
9. Daawitanne Yonaataana laggetettaa xeelliyaagan nena garamissiyaabay aybee?
9 Loꞌꞌo lagge gidiyoogan leemiso gidiya harati Daawitanne Yonaataana; eti naaꞌꞌaykka Yihoowawu ammanettidosona. Yonaataani Daawitappe 30 laytta gidiyaagaa bayratees; qassi Israaꞌeelan kaalliya kawo gidana danddayiyay A. (1 Sameela 17:33; 31:2; 2 Sameela 5:4) Gidoppe attin, kawo gidanaadan Yihooway Daawita dooridoogaa I erido wode, qanaatibeenna woy keesettibeenna. SHin, Daawita maaddanawu Yonaataani danddayiyo ubbabaa oottiis. Leemisuwawu, Daawita qohiyaabay gakkido wodekka, Yonaataani Daawiti “GODAN wolqqaa demmanaadan” maaddiis. I Daawita gishshawu ba shemppuwaa aattidi immiis. (1 Sameela 23:16, 17) Daawitikka ammanettiya lagge. I Yonaataana keetta asawu koshshiyaabaa kunttanawu qaalaa geliis; Yonaataani hayqqi simminkka, I ba gelido qaalaa naagiis.—1 Sameela 18:1; 20:15-17, 30-34; 2 Sameela 9:1-7.
10. Neeni heezzu Ibraawetuppe laggetettaabaa ay tamaaray?
10 Sidiraaqa, Misaaqanne Abddanaago geetettiya heezzu yelaga Ibraawe laggeti naatettan sooppe omoodettidi biidosona. Eti bantta soo asaappe haakkidi deꞌikkokka, Yihoowawu ammanettidi deꞌanaadan issoy issuwaa maaddidosona. Guyyeppe, eti gitaa gidin, Kawuwaa Naabukadanaxoori worqqaa misiliyawu goynnanaadan eta azazido wode, eta ammanoy paacettiis. Sidiraaqi, Misaaqinne Abddanaagoy he misiliyawu goynnennan ixxidosona; qassi kawuwaayyo hagaadan giidosona: ‘Nuuni ne xoossatuyyo oottokkonne neeni essido worqqaa misiliyaayyo goynnokko.’ Eta ammanoy paacettido wode, he heezzu laggeti bantta Xoossawu ammanettidi deꞌidosona.—Daaneela 1:1-17; 3:12, 16-28.
11. PHawuloosinne Ximootiyoosi waanidi loꞌꞌo lagge gididonaa?
11 Kiitettida PHawuloosi yelaga Ximootiyoosaara gayttido wode, Ximootiyoosi Yihoowa siiqiyoogaanne gubaaꞌiyawu wozanappe qoppiyoogaa akeekiis. Hegaa gishshawu, dumma dummasan deꞌiya ishanttanne michchontta maaddanaadan PHawuloosi Ximootiyoosa loohissiis. (Oosuwaa 16:1-8; 17:10-14) Ximootiyoosi keehi minni oottin PHawuloosi hagaadan giis: ‘I tanaara issippe wonggeliyaa oosuwaa oottiis.’ Ximootiyoosi ishanttuyyoonne michchontuyyo “wozanappe” qoppiyoogaa PHawuloosi erees. Yihoowawu issippe minnidi oottido gishshawu, PHawuloosinne Ximootiyoosi loꞌꞌo lagge gididosona.—Piliphphisiyuusa 2:20-22; 1 Qoronttoosa 4:17.
NU LAGGETA WAATI DOORIYOO?
12, 13. (a) Gubaaꞌiyankka nuuni nu laggeta akeekan doorana koshshiyoy aybissee? (b) Kiitettida PHawuloosi 1 Qoronttoosa 15:33n deꞌiya qofaa yootidoy aybissee?
12 Gubaaꞌiyan, nu ishanttuppenne michchonttuppe tamaarananne ammanettidi deꞌanaadan issoy issuwaa maaddana danddayoos. (Roome 1:11, 12 nabbaba.) SHin, gubaaꞌiyankka, nuussi mata lagge gidanaadan oona dooranaakko akeekanchcha gidana koshshees. Nu ishanttunne michchonttu wogaynne diccido hanotay dumma dumma. Issoti issoti gubaaꞌiyawu ooratta, harati qassi daro layttawu Yihoowawu haggaaziiddi takkidosona. Mittaa ayfee teeranawu wodiyaa koshshiyoogaadan, issi uri Yihoowaara dabbota minttanawu wodiyaa koshshees. Yaatiyo gishshawu, nuuni issoy issuwaa danddayananne siiqana koshshees; qassi nu laggeta ubbatoo akeekan doorana koshshees.—Roome 14:1; 15:1; Ibraawe 5:12–6:3.
13 Issi issitoo, gubaaꞌiyan gita metoy merettana danddayees; qassi he wode nuuni naagettana koshshees. Metoy merettana danddayiyoy issi ishay woy michchiyaa Geeshsha Maxaafay bala giyoobaa oottido gishshataassa gidana danddayees. Woy qassi issi uri gubaaꞌiyaa qohana danddayiya hanotan amassalana danddayees. Koyro xeetu layttankka issi issitoo gubaaꞌiyan metoy merettido gishshawu, hegee nuna garamissenna. Kiitettida PHawuloosi he wode deꞌiya Kiristtaaneta, “Cimettoppite; iita laggetettai lo77o hanotettaa moorees” yaagiis. (1 Qoronttoosa 15:12, 33) Ximootiyoosi bawu mata lagge gidanaadan oona dooranaakko naagettana malakka PHawuloosi zoriis. Ha wodiyan nuuni hegaadan oottana koshshees.—2 Ximootiyoosa 2:20-22 nabbaba.
14. Nuuni dooriyo laggeti Yihoowaara dabbotay nuuyyo moorettanaadan waati oottana danddayiyoonaa?
14 Nuuni Yihoowaara dabbotido dabbotaa naagana bessees. Hegee nuuyyo deꞌiya ubbabaappe aadhdhiya alꞌꞌoba. Hegaa gishshawu, nuuni nu ammanuwaa shugissana danddayiyaanne he dabbotaa moorana danddayiya uraara mata lagge gidennaadan naagettoos. Caala woyne eessan yeggido ispponjjee haattaa xunxxennaagaadan, iitabaa oottiyaageetuura laggetidi nuuni metootennan suurebaa oottana giidi naagana danddayokko. Nuuni nu mata laggeta akeekan doorana koshshees.—1 Qoronttoosa 5:6; 2 Tasalonqqe 3:6, 7, 14.
Neeni Yihoowa siiqiyaageetuppe loꞌꞌo laggeta demmana danddayaasa
15. Gubaaꞌiyan loꞌꞌo laggeta demmanawu neeni waatana danddayay?
15 Gubaaꞌiyan, Yihoowa wozanappe siiqiyaageeta demmana danddayaasa. Eti neeyyo mata lagge gidana danddayoosona. (Mazamure 133:1) Ne lagge woy neegaa mala wogan diccida asatu xallaara laggetanawu koyoppa. Yonaataani Daawitappe keehi bayratiyoogaanne Uruta Naaꞌoomippe keehi kaalo gidiyoogaa hassaya. Geeshsha Maxaafay ‘intte uluwaa aassi dooyite’ giyo zoriyaa nuuni kaallanawu koyoos. (2 Qoronttoosa 6:13; 1 PHeexiroosa 2:17 nabbaba.) Qassi neeni Yihoowa milatiyo wode, harati kaseegaappe aaruwan ne lagge gidanawu koyana.
METOY MERETTIYO WODE
16, 17. Gubaaꞌiyan issi uri nuna yiilloyikko, ay oottana bessennee?
16 Eeshshan, qofaaninne issibaa oottiyo ogiyan, ubba keettan deꞌiya asay dumma dumma. Gubaaꞌiyankka hanotay hegaa mala. Hegaadan dummatiyoogee deꞌoy ufayssiyaagaa gidanaadan oottees; qassi nuuni issoy issuwaappe darobaa tamaarana danddayoos. SHin, issi issitoo nu dummatettaa gaasuwan nu ishanttu woy michchonttu hanotaa bala ogiyan akeekoos; qassi nuuni etan yiillotoos. Issi issitoo, nuuni lanccana woy qohettana danddayoos. (Leemiso 12:18) Hegaa mala metoy nuna hidootaa qanxxissanaadan woy gubaaꞌiyaappe haassanaadan nuuni oottana bessii?
17 Bessenna. Issi uri issiban nuna azzanttikkokka, nuuni gubaaꞌiyaappe haakkokko. Nuuni lanccanaadan oottiday Yihoowa gidenna. I nuussi deꞌuwaanne hara ubbabaa immiis. Nuuni A siiqiyoogeenne awu ammanettiyoogee bessiyaaba. (Ajjuutaa 4:11) Gubaaꞌee nuuni ammanuwan minnidi deꞌanaadan nuna maaddana mala Yihooway immido imota. (Ibraawe 13:17) Issi uri nuna azzanttido gishshawu, Yihoowa imotaa mule ekkennan ixxokko.—Mazamure 119:165 nabbaba.
18. (a) Nuuni nu ishanttuuranne michchonttuura laggetanawu nuna aybi maaddana danddayii? (b) Nuuni haratuyyo atto gaana bessiyoy aybissee?
18 Nuuni nu ishanttanne michchontta siiqiyo gishshawu, eti nu lagge gidanaadan koyoos. Yihooway ay asinne wottiyoobi baynnaagaa gidana giidi qoppenna; nuunikka qoppana bessenna. (Leemiso 17:9; 1 PHeexiroosa 4:8) Nuuni ubbay baloos; shin siiqoy “issoi issuwau atto” gaanaadan nuna maaddana. (Qolasiyaasa 3:13) Balan akeekido issi guuttabay wolqqaama metoy merettanaadan oottenna mala siiqoy nuna teqqees. Issi uri nuna yiilloyiyo wode, hegaabaa qoppiyoogaa agganawu metootana danddayiyoogee qoncce. He uraa bolli eesuwan yiillotoosinne uluwan lancciyaa oyqqoos. SHin, hegee nuuni ufayttennaadaaninne hanqqettanaadan oottana. Hara baggaara qassi, nuuni nuna yiilloyida uraa atto giyo wode, woppu gaana, gubaaꞌiyaara issippetettan deꞌananne ubbaappe aaruwan Yihoowaara mino dabbotay deꞌiyoogeeta gidana danddayoos.—Maatiyoosa 6:14, 15; Luqaasa 17:3, 4; Roome 14:19.
ISSI URI BOHETTIYO WODE
19. Nuuni gubaaꞌiyan issi uraara laggettiyoogaa aggana koshshiyoy awudee?
19 Siiqettiya keettan, harati ufayttanaadan so asay huuphiyan huuphiyan oottiyoobay deꞌees. SHin issi uri makkalidabadan qoppa. Son deꞌiya asa ubbay A maaddanawu darotoo baaxetikkonne, I maaduwaa koyennan ixxiis. I sooppe kiyanawu qofaa qachchana danddayees, woy son aawatiya uri I sooppe kiyanaadan oychchana danddayees. Gubaaꞌiyan hegaa malabay merettana danddayees. Issi uri Yihoowa ufayssennabaanne gubaaꞌiyaa qohiyaabaa aggennan oottana danddayees. I maaduwaa koyenna, qassi I ba oottiyooban hegaappe simmin gubaaꞌiyaa yame gidanawu koyennaagaa bessees. I ba huuphe gubaaꞌiyaa agganawu doorana danddayees, woy bohettana danddayees. Hegaadaana gidikko, Geeshsha Maxaafay nuuni aara ‘gayttana’ koshshennaagaa yootees. (1 Qoronttoosa 5:11-13 nabbaba; 2 Yohaannisa 9-11) I nu lagge woy nu soo asa gidikko, hegee keehi deexxiyaaba gidana danddayees. SHin hegaa mala hanotan, nuuni Yihoowayyo ammanettiyoogee hara ooyyoonne ammanettiyoogaappe aadhdhana bessees.—Wurssetta Qofaa 8 xeella.
20, 21. (a) Bohihoogee siiqiyoogaa waati bessii? (b) Nuuni nu laggeta akeekan dooriyoogee keehi koshshiyaaba gidiyoy aybissee?
20 Bohiyoogee Yihooway siiquwan giigissidoba. Hegee Yihooway kessido maaraa kaallennaageetun gubaaꞌee qohettennaadan maaddees. (1 Qoronttoosa 5:7; Ibraawe 12:15, 16) Bohiyoogee nuuni Yihoowa geeshsha sunttaa, I kessido kandduwaa maaraanne A siiqiyoogaa bessanaadan maaddees. (1 PHeexiroosa 1:15, 16) Bohiyoogee gubaaꞌiyaa yame gidiyoogaa aggida uraa siiqiyoogaa bessiyaaba. He wolqqaama seeray I oottiiddi deꞌiyoobay bala gidiyoogaa akeekanaadan maaddana danddayees; qassi I laamettanaadan oottees. Kase bohettida daroti guyyeppe Yihoowakko simmin gubaaꞌee eta ufayssan mokki ekkiis.—Ibraawe 12:11.
21 Nu laggeti nuna maaddiyoogee woy qohiyoogee attennaba. Hegaa gishshawu, nuuni eta akeekan dooriyoogee keehi koshshiyaaba. Nuuni Yihooway siiqiyoogeeta siiqikko, eti nuuni merinawu awu ammanettidi deꞌanaadan maaddana danddayoosona.