TIMIRTTE 12
Aggennan Geeshsha Maxaafaa Xannaꞌanaadan Nena Aybi Maaddanee?
Geeshsha Maxaafaa xannaꞌiyoogee goꞌꞌiyaaba gidikkonne, yaatiyoogee metana danddayees. Geeshsha Maxaafaa aggennan xannaꞌana danddayiyaanaashsha gaada issi issitoo qoppana danddayaasa. Aggennan xannaꞌanawu baaxetiyoogee koshshiyoy aybissee? Metiyaabati deꞌishinkka, xannaꞌiyoogaa aggennaadan nena aybi maaddana danddayii?
1. Geeshsha Maxaafaa xannaꞌiyoogee keehi goꞌꞌiyaaba gidiyoy aybissee?
“Xoossaa qaalai paxa de7eesinne oottees.” (Ibraawe 4:12) Geeshsha Maxaafay Xoossaa qofaanne I neessi qoppiyoogaa qonccissiyo gishshawu keehi goꞌꞌees. Nuussi era xalla gidennan, aadhdhida eratettaynne hidootay deꞌanaadan maaddees. Ubbaappe aaruwan, neeni Yihoowaara dabbotanaadan Geeshsha Maxaafay maaddees. Neeni Geeshsha Maxaafaa xannaꞌiyo wode, I ne deꞌuwaa kaseegaappe giiga oottanaadan eeno gaasa.
2. Geeshsha Maxaafaa tumaa goꞌꞌaa akeekiyoogee keehi koshshiyaaba gidiyoy aybissee?
Geeshsha Maxaafaa tumay alꞌꞌo aqo mala. Geeshsha Maxaafay, “Tumaa . . . shammappe attin, mulekka baizzoppa” yaagidi nuna minttettiyoy hegaassa. (Leemiso 23:23) Nuuni Geeshsha Maxaafaa tumaa goꞌꞌaa akeekiyo wode, wayssiyaabay deꞌishinkka, aggennan xannaꞌanawu baaxetoos.—Leemiso 2:4, 5 nabbaba.
3. Aggennan xannaꞌanaadan Yihoowi nena waati maaddana danddayii?
Nena Medhdhida, ubbaa danddayiya ne Dabboy Yihoowi neeni abaa eranaadan maaddanawu koyees. I nena ‘eeno giissananne ba koyiyoobaa ootissana’ danddayees. (Piliphphisiyuusa 2:13 nabbaba.) Hegaa gishshawu, xannaꞌanawu woy tamaaridobaa oosuwan peeshshanawu neeni wozanappe koyanaadan I nena maaddana danddayees. Wayssiyaabati woy yedetay gakkishin gencciyo wolqqi neeyyo koshshikko, I neessi immana. Geeshsha Maxaafaa aggennan xannaꞌanawu Yihoowi nena maaddana mala ubbatoo woossa.—1 Tasalonqqe 5:17.
LOYTTA AKEEKA
Oosoy darikkokka woy harati eqettishinkka Geeshsha Maxaafaa aggennan waata xannaꞌana danddayiyaakko akeeka. Yaatada aggennan xannaꞌanaadan Yihoowi nena waati maaddanaakko qoppa.
4. Geeshsha Maxaafaa xannaꞌiyoogee neessi keehi koshshiyoogaa bessa
Nuussi issi issitoo Geeshsha Maxaafaa xannaꞌanawu wodee baynnabaa milatana danddayees. Maaddana danddayiyaabay aybee? Piliphphisiyuusa 1:10 nabbabite; yaatidi ha oyshata tobbite:
Ne deꞌuwan ‘loꞌꞌoba’ woy keehi koshshiyaaba gaada ne qoppiyo amaridabati aybee?
Geeshsha Maxaafaa xannaꞌiyoogee neessi keehi koshshiyoogaa waata bessana danddayay?
Neeni balddiyan shafiyaa gujjada A bolli shuchchaa yeggikko, shuchchawu sohoy gidenna
Neeni kasetada shuchchaa yeggikko, daro shafiyaa gujjanawu sohuwaa demmana. Hegaadankka, neeni ne deꞌuwan ‘loꞌꞌobata’ woy keehi koshshiyaabata kaseyikko, hegeeta oottananne harabatuyyo wodiyaa demmana danddayaasa
Geeshsha Maxaafaa xannaꞌiyoogee ayyaanaaban, hegeekka Xoossaa eranawunne awu goynnanawu nuussi koshshiyaabaa kunttees. Maatiyoosa 4:4 nabbabite; yaatidi ha oyshaa tobbite:
Geeshsha Maxaafaa xannaꞌiyoogee nuussi keehi koshshiyoogaa bessiyo wode waani goꞌettiyoo?
5. Asay eqettishinkka gencca
Neeni Geeshsha Maxaafaa xannaꞌennaadan harati issi issitoo hidootaa qanxxissana danddayoosona. Francheskko hanotaa qoppa. BIIDUWAA beꞌite, yaatidi kaallidi deꞌiya oyshata tobbite.
Ha biiduwan, Francheskkoy I tamaariyoobaa ba laggetussinne ba aayeessi yootin eti A waatidonaa?
Genccido gishshawu I demmido anjjoy aybee?
Naaꞌꞌantto Ximootiyoosa 2:24, 25 nabbabite; yaatidi ha oyshata tobbite:
Ne tamaariyoobaa so asaynne laggeti waati xeelliyoonaa?
Issi uri neeni Geeshsha Maxaafaa xannaꞌiyoogaa dosana xayikko, ha xiqisee yootiyoogaadan neeni waatana koshshii? Aybissi?
6. Yihoowi nena maaddanaagaa ammanetta
Nuuni Yihoowaara dabbotaa minttiyo wode, A ufayssanawu keehi koyoos. Gidikkonne, Yihoowi koyiyoogaadan deꞌanawu nu deꞌuwan laamettiyoogee metana danddayees. Neeni hegaadan metootikko, hidootaa qanxxoppa. Yihoowi nena maaddana. BIIDUWAA beꞌite, yaatidi kaallidi deꞌiya oyshata tobbite.
Jimi Yihoowa ufayssanawu aybin laamettidoogaa biiduwaappe akeekadii?
A hanotay neeni waatanaadan denttettii?
Ibraawe 11:6 nabbabite; yaatidi ha oyshata tobbite:
Yihoowi wozanappe “bana koyiyaageetuyyo” woy A eranawunne ufayssanawu baaxetiyaageetuyyo ay oottanee?
Neeni Geeshsha Maxaafaa xannaꞌanawu baaxetiyoogaa Yihoowi beꞌiyo wode ayyo aybi siyettiyoogaa xiqisiyaappe akeekadii?
ISSI URI HAGAADAN OYCHCHANA DANDDAYEES: “Geeshsha Maxaafaa ayssi xannaꞌay?”
Woygada zaaruutee?
AY AKEEKADII?
Ne issi issitoo metootayddakka Geeshsha Maxaafaa xannaꞌiyoogan, merinawu ufayttada deꞌana. Ubbatoo Yihoowan ammanetta; yaatikko I nena anjjana.
Zaaretuwaa
Geeshsha Maxaafaa tumay neessi alꞌꞌoba gidiyoy aybissee?
‘Loꞌꞌobaa’ woy keehi koshshiyaabaa waata shaakka eruutee?
Neeni Geeshsha Maxaafaa ubbatoo xannaꞌana mala Yihoowa woossana koshshiyoy aybissee?
PILGGA
Daroti bantta wodiyaa akeekan goꞌettanaadan maaddida oyddu hiillata beꞌa.
“Wodiyaa Waata Loytta Goꞌettana Danddayay?” (Beegottite! huuphe yohuwaa)
Issi maccaasiyaa Xoossaa ufayssanawu baaxetiyoogaa I keettaaway akeekana xayikkonne Yihoowi O waati maaddidaakko akeeka.
Issi bitaniyaa keettaayiyaa genccidoogee A waati goꞌꞌidaakko akeeka.
So asaa deꞌuwaa laaloosona giidi Yihoowa Markkata issi issitoo mootoosona. SHin hegee tumee?
“Yihoowa Markkati So Asaa Deꞌuwaa Laaliyoonaayye Minttiyoonaa?” (Nu websaytiyan deꞌiyaaba)