Nabbabiyaageetu Oyshaa

Suuttaa waatana bessiyaakko Geeshsha Maxaafan deꞌiya azazuwaara gayttidaagan issi asi akkamuwan ba suuttaa goꞌettiyoogaa xeelliyaagan Yihoowa Markkatu xeelay aybee?

Kiristtaaneti bantta dooro woy akkamuwaara gayttida issi issi zore xalla goꞌettidi issibaa kuuyiyoogaappe Geeshsha Maxaafay yootiyoobaa akeekan qoppana bessees. Hegee issi izaawunne Yihoowa giddon deꞌiya allaalle.

Nuussi deꞌuwaa immida Yihooway asi suuttaa meennaadan azaziis. (Doomettaabaa 9:3, 4) Beni Israaꞌeelatussi imettida Higgiyan suuttay deꞌo gidiyo gishshawu, asi hegaa goꞌettennaadan Xoossay azaziis. I hagaadan giis: “Asho maayida ubbaa de7oi a suuttaa giddon de7ees; suuttaikka qassi de7oy a giddon de7iyoogaappe denddidaagan nagaraa atto giissiyaagaa gidiyo gishshau, intte nagaraa atto giissanaadan, taani intteyyo yarshshiyoosaa bolli yarshshanaadan immaas.” Issi asi asho maanawu doꞌa worikko shin? “A suuttaa sa7an gussidi, biittaa kammo” yaagidi Xoossay yootiis.a (Wogaabaa 17:11, 13) Yihooway ha azazuwaa zaari zaaridi yootiis. (Zaarettido Wogaa 12:16, 24; 15:23) Sonsino SHumash giyo Ayhudatu maxaafay hagaadan gees: “Suuttaa dagayana koshshenna, shin meetettenna mala saꞌan gussana koshshees.” Israaꞌeela asi ooninne deꞌoy Xoossaaba gidido hara meretaa suuttaa ekkana, dagayana woy goꞌettana bessenna.

Masee hayqqido wode Muuse Higgiyaa kaalliyoogee attiis. Giddoppe attin, Xoossay suuttaa geeshsha oottidi xeelliyoogee attibeenna. Kiitettidaageeti Xoossaa geeshsha ayyaanaa kaaletuwan ‘suuttaappe haakkanaadan’ Kiristtaaneta azazidosona. He azazoy xoqqu ootti xeellana bessiyooba. Hegee shaaramuxiyoogaappe woy eeqawu goynniyoogaappe haakkiyoogaa keena koshshiyaaba. (Oosuwaa 15:28, 29; 21:25) Suuttaa hara asawu immiyoogeenne ekkiyoogee meeze gidido 20tta xeetu layttan, hegaadan oottiyoogee Xoossaa Qaalaara maayettennaba gidiyoogaa Yihoowa Markkati eridosona.b

Issi dottoree harggiyaa uri shuhettanaappe amarida saaminttaa kasetidi ba suuttaa dagayanaadan (shuhettanaappe kase aawu suuttaa awu immiyoogaa woykko PAD) issi issitoo oychchana danddayees; hegee koshshiyo wode hargganchchawu A suuttaa zaaridi immanaassa. SHin suuttaa hegaadan duuqqiyoogee, dagayiyoogeenne immiyoogee Wogaabaa maxaafaaninne Zaarettido Wogaa maxaafan odettidabaa palqqiyaaba. Suuttay dagattana bessenna; saꞌan gukkana bessees, hegee Xoossawu zaaridi immiyoogaa mala. Haꞌꞌi Muuse Higgiyaa naagana bessennaagaa qoncce. Gidikkokka, Yihoowa Markkati Xoossay he higgiyan yootido maaraa bonchchoosona, qassi ‘suuttaappe haakkanawu’ murttidosona. Hegaa gishshawu, ‘saꞌan gussana’ bessiyo suuttaa nuuni asawu immokko, qassi zaarettidi ekkanawu dagayokko. Hegaadan oottiyoogee Xoossaa higgiyaa kanttiyooba.

Suuttaara gayttida hara akkamo qommoti Xoossay kessido maaraa phalqqiyaaba gidokkona. Leemisuwawu, daro Kiristtaaneti bantta suuttaappe amaridaagaa pilggettawu immoosona; shin hegaappe simmin he suuttay harabawu goꞌettiyooba gidenna. Suuttaara gayttida hara deexxiya akkamo ogiyaakka goꞌettana danddayettees.

Leemisuwawu shukkidi akkamiyo wode, suuttaappe amaridaagee hara miishshaara kanttidi bollawu simmanaadan oottiyo hemodayliyushin giyo akkamo hiillay deꞌees. Yaatiyo wode, akkamettiya uraa bolla giddon attida suuttay qacinees. Hegaapppe, hankko miishshan deꞌiya suuttay bollawu simmees; yaatiyoogan, suuttaa qooday likke gidees. Hegaadankka, bollay qanxxettidosaara goggiya suuttaappe zoꞌꞌo suuttaa seeleta gaccidi izaawu balla giddo zaariyo hiillaykka deꞌees; hegee sel salvej geeteettees. Hara akkamo hiillan qassi darotoo (leemisuwawu, wozanay, goofinee, woy kilahoy) oottiyoobaa issi maashinee oottiyo wode suuttay he maashine giddo gelees. Hegaappe guyyiyan, maashine giddon deꞌiya suuttay izaawu bollawu simmees. Hara hiillan qassi, qohettida woy moorettida seeleta digganawu suuttay gacettees. Woy suutta giddon deꞌiya issi issibaa shaakkidi bolla giddon harasan goꞌettanawu halchchidoba gidana danddayees. Issi urappe ekettida suuttaa bolli malaataa wottidi, woy xaliyaara walakkidi, amarida wodiyaappe guyyiyan awu zaari immana danddayettees.

Issi akkamoy haraappe dummatana danddayees, ooratta akkamo hiillaynne pilggiyo ogee zammaanana danddayees. Akkamo hiillatu giddon deꞌiya dummatettaanne issi asi ay kuuyanaakko yootiyoogee nu ooso gidenna. Issi Kiristtaanee shuhettiyo wode, pilggettiyo wode, woy haꞌꞌi deꞌiya akkamo hiillan akkamettiyo wode suuttaara gayttidabaa ba huuphe kuuyana bessees. Akkamuwaa wode A suuttaara gayttidaagan aybi oosettanaakko dottoretuppenne haakimetuppe kasetidi siyana koshshees. Hegaappe guyyiyan, A kahay yootiyoobaara maayettiyaabaa kuuyana bessees. (Saaxiniyaa xeella.)

Kiristtaaneti banttana Xoossawu sheedhdhidoogaanne ‘bantta kumetta wozanaappe, kumetta shemppuwaappe, kumetta wolqqaappenne kumetta qofaappe A siiqana’ bessiyoogaa hassayana koshshees. (Luqaasa 10:27) Alamiyan deꞌiya daro asaappe dumma ogiyan, Yihoowa Markkati Xoossaara deꞌiya bantta dabbotaa xoqqu oottidi xeelloosona. Deꞌuwaa immida Xoossay ubba asay gukkida Yesuusa suuttan ammananaadan minttettees. Geeshsha Maxaafay, “Nuuni Xoossaa aaro kehatettaa daruwaadan, Kiristtoosa suuttan wozettida; hegan Xoossai nu nagaraa atto giis” yaagees.—Efisoona 1:7.

[Tohossa qofaa]

[Saaxiniyaa/​Misiliyaa]

NE HUUPHIYA OYCHCHIYO OYSHATA

Ta suuttaappe amaridaagee maashine giddoora kanttidi ta bollawu simmikko, ubba guutta wodiyawu gogettaa aggidi simmikko, he suuttay ‘saꞌan gukkana’ bessenna ta suuttadan xeellanaadan ta kahay eeno gaanee?

Pilggettaa wode woy akkamuwaa wode ta suuttaappe amaridaagee ekettidi issi issibaa giigissin, ta bolla giddo zaarikko, Geeshsha Maxaafan loohida ta kahay tana qumꞌꞌanee?